Yokaana 13:1-38 LGCB2014 - Bible AI

¹Ku lunaku olukulembera Embaga eyʼOkuyitako, Yesu yamanya ngʼekiseera kye kituuse ave mu nsi muno agende eri Kitaawe. Yesu bwe yayagala ababe mu nsi, yabalagira ddala okwagala kwe kwonna okutuusiza ddala ku kiseera ekisembayo.

²Bwe baali balya ekyekiro, Setaani yali yamaze dda okuteeka mu mutima gwa Yuda Isukalyoti, omwana wa Simooni, ekirowoozo ekyʼokulya mu Yesu olukwe.

³Yesu bwe yamanya nti Kitaawe yateeka byonna mu mikono gye, era nga yava wa Katonda ate gyʼadda,

⁴nʼasituka ku mmere, ne yeggyako omunagiro gwe, ne yeesiba ettawulo mu kiwato,

⁵nʼateeka amazzi mu bensani, nʼatandika okunaaza abayigirizwa be ebigere nga bwʼabasiimuuza ettawulo gye yali yeesibye.

⁶Bwe yatuuka ku Simooni Peetero, Peetero nʼamugamba nti, “Mukama wange, ggwe onnaaze ebigere?”

⁷Yesu nʼamuddamu nti, “Ensonga enkozesa kino togimanyi kaakano, wabula ekiseera kirituuka nʼogitegeera.”

⁸Peetero nʼamuddamu nti, “Nedda, tolinnaaza bigere emirembe gyonna.” Yesu nʼamugamba nti, “Bwe siikunaaze bigere, nga tossa kimu nange.”

⁹Simooni Peetero nʼamugamba nti, “Mukama wange, tonnaaza bigere byokka, naye nnaaza nʼemikono nʼomutwe.”

¹⁰Yesu nʼamuddamu nti, “Anaabye omubiri, aba teyeetaaga kunaaba okuggyako ebigere byokka, alyoke abe omulongoofu. Kaakano muli balongoofu, naye si mwenna.”

¹¹Kubanga Yesu yamanya anaamulyamu olukwe. Kyeyava agamba nti, “Si mwenna abalongoofu.”

¹²Yesu bwe yamala okubanaaza ebigere nʼayambala omunagiro gwe, nʼaddayo nʼatuula, nʼabagamba nti, “Kye mbakoze mukitegedde?

¹³Mmwe mumpita Muyigiriza era Mukama wammwe, mukola bulungi okumpita bwe mutyo kubanga ddala bwe ntyo bwe ndi.

¹⁴Kale Nze Mukama wammwe era Omuyigiriza, nga bwe mbanaazizza ebigere, nammwe musaana okunaazagananga ebigere.

¹⁵Mbalaze ekyokulabirako, mukolenga nga Nze bwe mbakoze.

¹⁶Ddala ddala mbagamba nti, Omuddu tasinga mukama we. Era nʼoyo atumibwa tasinga oli amutumye.

¹⁷Bwe mumanya ebintu bino muba nʼomukisa bwe mubikola.

¹⁸ⓙ Ebintu bino byonna sibyogera nammwe mwenna, buli omu ku mmwe be nalonda mmumanyi; ekyawandiikibwa kituukirire ekigamba nti, ‘Oyo bwe tulya emmere anneefuukidde!’

¹⁹Kino nkibategeeza okuva kaakano, nga tekinnabaawo, bwe kinaabaawo mulyoke munzikirize.

²⁰Ddala ddala mbagamba nti Buli asembeza gwe ntuma, ngʼasembezezza Nze, era asembeza Nze ngʼasembezezza oyo eyantuma.”

²¹Yesu bwe yamala okwogera ebyo nʼalumwa nnyo mu mwoyo, nʼagamba nti, “Ddala ddala mbagamba, omu ku mmwe anandyamu olukwe.”

²²Abayigirizwa ne batunulaganako, nga tebamanyidde ddala gwʼayogerako.

²³Omu ku bayigirizwa, Yesu gwe yayagalanga, yali agalamidde okumpi nʼekifuba kya Yesu,

²⁴Simooni Peetero nʼamutemyako ngʼamugamba nti, “Mutubuulize gwʼayogerako.”

²⁵Kale bwe yaddayo okugalamira ngʼaliraanye ekifuba kya Yesu, nʼamubuuza nti, “Mukama waffe, gwʼoyogerako ye ani?”

²⁶Yesu nʼaddamu nti, “Gwe nnaakoleza ekitole ne nkimuwa nga ye wuuyo.” Awo nʼakwata ekitole, nʼakikoza nʼakiwa Yuda Isukalyoti omwana wa Simooni.

²⁷Yuda bwe yamala okuweebwa ekitole ekyo, Setaani nʼamuyingiramu.

²⁷Awo Yesu nʼamugamba nti, “Kyʼokola kikole mangu!”

²⁸Ku baali balya tewaali nʼomu eyategeera kyeyava amugamba bwʼatyo.

²⁹Abamu baalowooza nti Nga Yuda bwe yali atereka ensimbi, Yesu amugambye agende agule bye beetaaga ku mbaga, oba nti Abeeko byʼagabira abaavu.

³⁰Yuda olwafuna ekitole, amangwago nʼafuluma ebweru; obudde bwali kiro.

³¹Yuda olwafuluma, Yesu nʼagamba nti, “Kaakano Omwana wʼOmuntu agulumizibbwa ne Katonda agulumizibbwa mu ye.

³²Era obanga Katonda agulumizibbwa mu ye, Katonda yeegulumiza ye yennyini, era amangwago ajja kumugulumiza.

³³“Baana bange, akaseera katono ke nkyali nammwe. Mulinnoonya era nga bwe nagamba Abayudaaya nti, ‘Gye ŋŋenda mmwe temuyinza kujjayo,’ era nammwe bwe mbagamba kaakano.

³⁴“Mbawa ekiragiro ekiggya: Mwagalanenga nga nze bwe mbaagala.

³⁵Bwe munaayagalananga abantu bonna kwe banaategeereranga nti muli bayigirizwa bange.”

³⁶Awo Simooni Peetero nʼamubuuza nti, “Mukama waffe olaga wa?” Yesu nʼamuddamu nti, “Tosobola kugenda nange kaakano, wabula olingoberera oluvannyuma.”

³⁷Peetero nʼamubuuza nti, “Mukama wange, lwaki siyinza kukugoberera kaakano? Nnaawaayo obulamu bwange ku lulwo.”

³⁸Yesu nʼamuddamu nti, “Onoowaayo obulamu bwo ku lwange? Ddala ddala nkugamba nti, Enkoko eneeba tennakookolima, ononneegaana emirundi esatu.”