Yokaana 15:1-27 LGCB2014 - Bible AI

¹“Nze muzabbibu ogwʼamazima, ate Kitange ye mulimi.

²Buli ttabi eriri ku Nze eritabala bibala aliggyako. Naye buli ttabi eribala ebibala, alirongoosa lyeyongerenga okubala.

³Mmwe kaakano muli balongoofu olwʼekigambo kye mbagambye;

⁴mubeere mu Nze era nange mbeere mu mmwe. Ngʼettabi bwe litayinza kubala bibala ku bwalyo nga teriri ku muzabbibu, bwe mutyo nammwe temuyinza kubala bibala bwe mutabeera mu Nze.

⁵“Nze muzabbibu, mmwe matabi. Buli abeera mu Nze nange ne mbeera mu ye oyo abala ebibala bingi. Kubanga awatali Nze temuliiko kye muyinza kukola.

⁶Omuntu bwʼatabeera mu nze asuulibwa ebweru ngʼettabi erikaze. Amatabi ngʼago bagakuŋŋaanya ne bagasuula ku muliro ne gaggya.

⁷Naye bwe munywerera mu Nze ne munyweza ebigambo byange, buli kye munaasabanga kinaabakolerwanga.

⁸Bwe mubala ebibala ebingi, muba bayigirizwa bange, ne Kitange, agulumizibwa.

⁹“Mbaagadde nga Kitange bwʼanjagala. Noolwekyo munywererenga mu kwagala kwange.

¹⁰Bwe munaagonderanga ebiragiro byange olwo munaabanga munyweredde mu kwagala kwange, nga nange bwe ŋŋondera ebiragiro bya Kitange ne mbeera mu kwagala kwe.

¹¹“Mbategeezezza ebyo mulyoke mujjule essanyu lyange. Era essanyu lyammwe liryoke lituukirire.

¹²Kye mbalagira kye kino nti Mwagalanenga nga Nze bwe mbaagala.

¹³Tewali kwagala kusinga okwʼomuntu awaayo obulamu bwe olwa mikwano gye.

¹⁴Muba mikwano gyange bwe mukola bye mbalagira.

¹⁵Olwo nga sikyabayita baddu, kubanga omuddu tamanya bifa ku mukama we. Kaakano mmwe muli mikwano gyange, kubanga mbategeezezza byonna Kitange bye yaŋŋamba.

¹⁶“Si mmwe mwannonda! Wabula Nze nabalonda, mulyoke mubale ebibala ate ebibala ebyʼolubeerera. Olwo buli kye munaasabanga Kitange mu linnya lyange anaakibawanga.

¹⁷Kye mbalagira kye kino nti Mwagalanenga.

¹⁸Ensi bwʼebakyawanga mumanye nti Yasooka kukyawa Nze.

¹⁹Singa mubadde ba nsi, yandibaagadde, naye temuli ba nsi, kubanga nabalonda muve mu nsi, kyeva ebakyawa.

²⁰ⓚ Mujjukire kye nabagamba nti, ‘Omuddu tasinga mukama we.’ Kale obanga Nze banjigganya era nammwe bagenda kubayigganyanga. Era obanga baagondera ebigambo byange nʼebyammwe balibigondera.

²¹Ebyo byonna balibibakola ku lwʼerinnya lyange, kubanga eyantuma tebamumanyi.

²²Singa sajja ne njogera nabo tebandibadde na musango. Naye kaakano tebalina kya kwewolereza olwʼekibi kyabwe.

²³Buli ankyawa aba akyawa ne Kitange.

²⁴Singa saakola mirimu egitaakolebwa muntu yenna mu bo tebandibaddeko musango. Naye kaakano balabye emirimu egyo, nʼokutukyawa ne batukyawa, Nze ne Kitange.

²⁵ⓛ Ekyawandiikibwa ne kiryoka kituukirira ekigamba nti, ‘Bankyayira bwereere.’

²⁶“Kyokka mmwe ndibatumira Omubeezi okuva eri Kitange, Omwoyo owʼamazima ava eri Kitange era alibategeeza buli ekinfaako.

²⁷Era nammwe mulinjulira, kubanga mubadde nange okuva ku lubereberye.”