Yokaana 16:1-33 LGCB2014 - Bible AI

¹“Ebyo mbibategeezezza muleme kwesittala.

²Banaabagobanga mu makuŋŋaaniro, era ekiseera kijja buli anaabattanga nʼalowooza nti Aweereza Katonda.

³Ebyo balibibakola kubanga Kitange tebaamumanya, era nange tebammanyi.

⁴Kale bino mbibabuulidde nga tebinnabaawo, ekiseera bwe kirituuka ne bibaawo mulyoke mujjukire nti nabagamba. Ebyo saabibategeerezaawo ku lubereberye kubanga nnali nkyali nammwe.

⁵“Kaakano ŋŋenda eri eyantuma. Naye tewali nʼomu ku mmwe ambuuza nti, ‘Ogenda wa?’

⁶Naye kubanga mbategeezezza ebyo emitima gyammwe gijjudde ennaku.

⁷Naye mbategeereza ddala nti ekisinga obulungi gye muli Nze kwe kugenda. Kubanga bwe sigenda Omubeezi tagenda kujja, kyokka bwe ŋŋenda, ndimutuma gye muli.

⁸Ye bwʼalijja, alirumiriza ensi olwʼekibi, nʼolwʼobutuukirivu nʼolwʼomusango,

⁹kubanga tebanzikkiriza,

¹⁰olwʼobutuukirivu kubanga ŋŋenda eri Kitange era temukyandaba,

¹¹nʼolwʼomusango, kubanga omufuzi wʼensi eno asaliddwa omusango.

¹²“Nkyalina bingi ebyʼokubategeeza naye kaakano temusobola kubitegeera.

¹³Naye Omwoyo owʼamazima, bwʼalijja alibaluŋŋamya mu mazima gonna, kubanga, taliyogera ku bubwe, wabula anaabategeezanga ebyo byʼawulira. Anaababuuliranga ebigenda okubaawo.

¹⁴Oyo agenda kungulumiza, kubanga agenda kubategeeza bye nnaamubuuliranga.

¹⁵Byonna Kitange byʼalina byange, kyenvudde ŋŋamba nti Mwoyo Mutukuvu anaabategeezanga bye nnaamubuuliranga.

¹⁶Mu bbanga ttono munaaba temukyandaba, ate wanaayitawo ebbanga ttono ne mundaba!”

¹⁷Abamu ku bayigirizwa be ne beebuzaganya nti, “Kiki ekyo kyʼagamba nti, ‘Mu bbanga ttono temuliddayo kundaba, ate mu bbanga ttono munandaba,’ era nti, ‘Kubanga ŋŋenda eri Kitange?’ ”

¹⁸Ne beeyongera okwebuuza nti, “Kiki ekyo kyʼagamba nti, ‘Ebbanga ttono?’ Tetutegeera kyʼagamba.”

¹⁹Yesu bwe yamanya nga baagala okumubuuza nʼabagamba nti, “Mwebuuzaganya ku kye ŋŋambye nti Mu bbanga ttono munaaba temukyandaba ate wanaayitawo ebbanga ttono ne mundaba?

²⁰Ddala ddala mbagamba nti Mmwe mulikaaba, mulikuba ebiwoobe, naye ensi yo erisanyuka. Mmwe mulinakuwala naye okunakuwala kwammwe kulifuuka essanyu eritagambika bwe mulindabako nate.

²¹Omukazi ngʼazaala aba mu bulumi buyitirivu, kubanga ekiseera kye kituuse. Naye omwana bwʼamala okuzaalibwa olwo omukazi aba takyajjukira bulumi buli olwʼessanyu eryʼokuzaala omuntu mu nsi.

²²Kale nammwe kaakano munakuwadde, naye ndiddamu okubalaba ne musanyuka, era essanyu lyammwe tewali nʼomu aliribaggyako.

²³Mu kiseera ekyo nga temukyansaba kintu na kimu, mmwe bennyini munaasabanga Kitange mu linnya lyange.

²⁴Kino mubadde temukikola, naye kaakano mukitandike. Musabe mu linnya lyange, mujja kuweebwa ekyo kye musaba, essanyu lyammwe liryoke lituukirire.

²⁵Ebyo mbibabuulidde mu ngero. Naye ekiseera kijja kutuuka nneme kwogera nammwe mu ngero, wabula mbabuulire lwatu ebifa ku Kitange.

²⁶Mu kiseera ekyo mulisaba mu linnya lyange, so si Nze okubasabira eri Kitange.

²⁷Kitange abaagala nnyo kubanga nammwe munjagala nnyo era mukkiriza nti Nava eri Katonda.

²⁸Nava eri Kitange ne nzija mu nsi era nzija kuva mu nsi nzireyo eri Kitange.”

²⁹Awo abayigirizwa be ne bamugamba nti, “Kaakano oyogera lwatu, so si mu ngero.

³⁰Kaakano tutegedde ngʼomanyi byonna, era nga tewali kyetaagisa kukubuuza. Kyetuva tukkiriza nga wava eri Katonda.”

³¹Yesu nʼabaddamu nti, “Kaakano mukkirizza?

³²Laba, ekiseera kijja, era kituuse mwenna lwe munaasaasaana buli omu nʼaddayo ku bibye, ne mundeka nzekka. Kyokka sijja kuba nzekka, kubanga Kitange ali wamu nange.

³³Mbategeezezza ebyo byonna mulyoke mube nʼemirembe mu nze. Mu nsi muno mujja kubonaabona, naye mugume, kubanga Nze mpangudde ensi.”