Yokaana 17:1-26 LGCB2014 - Bible AI

¹Yesu bwe yamala okwogera ebyo nʼayimusa amaaso ge nʼatunula eri eggulu, nʼayogera nti, “Kitange ekiseera kituuse. Gulumiza Omwana wo, nʼomwana alyoke akugulumize,

²nga bwe wamuwa obuyinza ku balina omubiri bonna, bonna be wamuwa alyoke abawe obulamu obutaggwaawo.

³Buno bwe bulamu obutaggwaawo, okutegeera ggwe Katonda omu owʼamazima, nʼoyo gwe watuma, Yesu Kristo.

⁴Nkugulumizizza ku nsi, omulimu gwe wantuma okukola, ngumalirizza.

⁵Kale kaakano, Kitange, ngulumiza wamu naawe mu kitiibwa ekyo kye nnali nakyo ngʼensi tennabeerawo.”

⁶“Njolesezza erinnya lyo eri abantu be wampa okuva mu nsi. Baali ba nsi naye nʼobampa. Baali babo nʼobampa era bakkirizza ekigambo kyo.

⁷Bategedde nga buli kye nnina kiva gyʼoli,

⁸kubanga buli kye wandagira nkibayigirizza ne bakitegeera era bategeeredde ddala nga nava gyʼoli, era ne bakkiriza nga ggwe wantuma.

⁹Mbasabira. Sisabira nsi, naye nsabira abo be wampa kubanga babo.

¹⁰Ngʼebintu byonna bwe biri ebyange ate era nga bibyo, era ne bibyo nga byange, bampeesa ekitiibwa.

¹¹Nze sikyali mu nsi, naye bo bali mu nsi, ate nga nzija gyʼoli. Kitange Omutukuvu, be wampa bakuume mu linnya lyo, balyoke babeere bumu nga ffe bwe tuli obumu.

¹²Bwe mbadde nabo, abo be wampa mbakuumye mu linnya lyo, ne watabaawo azikirira, okuggyako omwana owʼokubula, ekyawandiikibwa kiryoke kituukirire.”

¹³“Nange kaakano nzija gyʼoli, era mbabuulidde ebintu bino nabo babe nʼessanyu lyange nga lituukiridde mu bo.

¹⁴Mbawadde ekigambo kyo, ensi nʼebakyawa kubanga si ba nsi nga Nze bwe siri wa nsi.

¹⁵Sikusaba kubaggya mu nsi, naye nkusaba obakuume eri omubi.

¹⁶Si ba nsi nga nange bwe siri wa nsi.

¹⁷Obatukuze mu mazima; ekigambo kyo ge mazima.

¹⁸Nga bwe wantuma mu nsi, nange bwe ntyo mbatuma mu nsi.

¹⁹Era neetukuza ku lwabwe nabo balyoke batukuzibwe mu mazima.”

²⁰“Sisabira bano bokka naye nsabira nʼabo abanzikiriza olwʼekigambo kyabwe,

²¹bonna babeere bumu, nga ggwe Kitange bwʼoli mu Nze, nange nga ndi mu ggwe, nabo babeerenga mu ffe, ensi eryoke ekkirize nga ggwe wantuma.

²²Mbawadde ekitiibwa kye wampa, balyoke babeere bumu nga ffe bwe tuli obumu.

²³Nze nga ndi mu bo, era naawe ngʼoli mu Nze balyoke bafuukire ddala omuntu omu. Ensi eryoke etegeere nga ggwe wantuma era nti Obaagala nga bwʼonjagala.”

²⁴“Kitange, bano be wampa njagala mbeere nabo we ndi balyoke bategeere ekitiibwa kyange kye wampa kubanga wanjagala, ngʼensi tennatondebwa.

²⁵Ayi Kitange Omutukuvu, ensi teyakumanya, kyokka Nze nkumanyi era nʼabayigirizwa bano bamanyi nga ggwe wantuma.

²⁶Era mbayigirizza ne bamanya erinnya lyo, era nzija kwongera okubamanyisa okwagala kwo kwʼonjagala, kulyoke kubeerenga mu bo, era nange mbeere mu bo.”