Yokaana 18:1-40 LGCB2014 - Bible AI

¹Awo Yesu bwe yamala okwogera ebyo nʼafuluma nʼabayigirizwa be, ne balaga emitala wʼakagga Kidulooni. Mu kifo ekyo mwalimu ennimiro yʼemizeeyituuni, Yesu nʼabayigirizwa be ne bayingira omwo.

²Yuda, eyamulyamu olukwe, ekifo ekyo yali akimanyi, kubanga Yesu yagendangayo emirundi mingi ngʼali nʼabayigirizwa be.

³Awo Yuda nʼajja mu kifo ekyo ngʼali nʼekibinja kyʼabaserikale, nʼabaweereza ba Bakabona abakulu nʼabʼAbafalisaayo. Bajja nga balina ettaala nʼemimuli nʼebyokulwanyisa.

⁴Yesu bwe yamanya byonna ebyali bigenda okumubaako, nʼavaayo nʼababuuza nti, “Munoonya ani?”

⁵Ne baddamu nti, “Tunoonya Yesu Omunnazaaleesi.” Yesu nʼabaddamu nti, “Ye Nze,” Yuda, eyamulyamu olukwe, yali ayimiridde nabo.

⁶Yesu bwe yabagamba nti, “Ye Nze” ne badda emabega ne bagwa wansi.

⁷Yesu nʼababuuza omulundi ogwokubiri nti, “Munoonya ani?” Ne baddamu nti, “Yesu Omunnazaaleesi.”

⁸Yesu nʼabaddamu nti, “Mbabuulidde nti, Ye Nze. Kale obanga munoonya Nze, bano mubaleke bagende.”

⁹ⓜ Yakola kino, ekyawandiikibwa kiryoke kituukirire ekigamba nti, “Abo be wampa saabuzaako nʼomu.”

¹⁰Awo Simooni Peetero, eyalina ekitala, nʼakisowolayo, nʼatema omuddu wa Kabona Asinga Obukulu nʼamusalako okutu okwa ddyo. Erinnya lyʼomuddu oyo nga ye Maluko.

¹¹Yesu nʼalagira Peetero nti, “Zza ekitala mu kiraato kyakyo. Ekikompe Kitange kyʼampadde, siikinywe?”

¹²Awo ekibinja kyʼabaserikale nʼomuduumizi waabwe nʼabaweereza bʼAbayudaaya, ne bakwata Yesu ne bamusiba.

¹³Ne bamutwala ewa Ana, eyali mukoddomi wa Kayaafa, Kabona Asinga Obukulu mu mwaka ogwo.[4]

¹⁴Kayaafa oyo, yʼoli eyawa Abayudaaya amagezi nti, “Kirungi omuntu omu afiirire bonna.”

¹⁵Simooni Peetero nʼomuyigirizwa omulala eyali amanyiddwa Kabona Asinga Obukulu, ne bagoberera Yesu. Omuyigirizwa oyo eyali amanyiddwa nʼagoberera Yesu mu luggya lwa Kabona Asinga Obukulu,

¹⁶nga Peetero ye ayimiridde wabweru ku mulyango; omuyigirizwa oyo omulala bwe yayogera nʼomuggazi wʼoluggi nʼayingiza Peetero.

¹⁷Omuwala omuggazi nʼabuuza Peetero nti, “Naawe oli omu ku bayigirizwa bʼomuntu oyo?” Peetero nʼaddamu nti, “Nedda.”

¹⁸Obudde bwali bwa mpewo, abaddu nʼabaweereza baali bakumye omuliro nga boota, ne Peetero naye ngʼayimiridde nabo ngʼayota omuliro.

¹⁹Awo Ana eyaliko Kabona Asinga Obukulu nʼabuuza Yesu ebifa ku bayigirizwa be ne ku kuyigiriza kwe.

²⁰Yesu nʼamuddamu nti, “Nayogeranga lwatu eri ensi, bulijjo nʼayigirizanga mu makuŋŋaaniro ne mu Yeekaalu, Abayudaaya bonna mwe bakuŋŋaanira, soogeranga kintu na kimu mu kyama.

²¹Lwaki obuuza Nze? Buuza abo abaawuliranga bye njogera. Bamanyi bye nnaayogera.”

²²Yesu bwe yayogera ekyo omu ku baweereza eyali ayimiridde awo nʼamukuba oluyi nʼamugamba nti, “Oddamu otyo Kabona Asinga Obukulu?”

²³Yesu nʼamuddamu nti, “Obanga njogedde bubi kinnumirize ekibi, naye obanga kirungi, kale onkubira ki?”

²⁴Awo Ana nʼaweereza Yesu nga musibe eri Kayaafa Kabona Asinga Obukulu.

²⁵Mu kiseera ekyo Simooni Peetero yali ayimiridde ngʼayota omuliro. Ne bamubuuza nti, “Naawe oli omu ku bayigirizwa ba Yesu?” Nʼabaddamu nti, “Nedda.”

²⁶Awo omu ku baddu ba Kabona Asinga Obukulu, muganda wʼoyo Peetero gwe yasalako okutu, nʼamubuuza nti, “Saakulabye naye mu nnimiro?”

²⁷Peetero nʼaddamu okwegaana. Amangwago enkoko nʼekookolima.

²⁸Awo Abayudaaya ne baggya Yesu ewa Kayaafa ne bamutwala mu lubiri lwa gavana Omuruumi. Obudde bwali bwakakya, ne batayingira mu lubiri baleme okusobya omukolo ogwʼokwetukuza, si ku lwa nga basubwa okulya Embaga yʼOkuyitako.

²⁹Awo Piraato nʼafuluma ebweru gye baali nʼababuuza nti, “Musango ki gwe muvunaana omuntu ono?”

³⁰Ne bamuddamu nti, “Singa yali tazizza musango tetwandimuleese gyʼoli.”

³¹Piraato kyeyava abagamba nti, “Kale mmwe mumutwale mumusalire omusango okusinziira mu mateeka gammwe.” Ne bamuddamu nti, “Ffe tetukkiriza kutta muntu yenna.”

³²Kino ne kituukiriza ebyo Yesu bye yayogera ku nfa gye yali agenda okufaamu.

³³Awo Piraato nʼaddayo mu lubiri nʼayita Yesu. Nʼamubuuza nti, “Ggwe Kabaka wʼAbayudaaya?”

³⁴Yesu nʼaddamu nti, “Ekyo okyogedde ku bubwo oba balala be bakubuulidde ebinfaako?”

³⁵Piraato nʼamubuuza nti, “Nze ndi Muyudaaya? Abantu bo ne Kabona Asinga Obukulu be bakundeetedde. Okoze ki?”

³⁶Yesu nʼaddamu nti, “Obwakabaka bwange si bwa mu nsi muno. Singa bubadde bwa mu nsi eno abaweereza bange bandirwanye ne siweebwayo mu Bayudaaya. Naye obwakabaka bwange si bwa mu nsi muno.”

³⁷Piraato nʼamubuuza nti, “Kwe kugamba oli kabaka?” Yesu nʼamuddamu nti, “Okyogedde nti ndi kabaka. Ekyo kye nnazaalirwa era kye kyandeeta mu nsi, ntegeeze amazima. Era abo bonna abaagala amazima bawulira eddoboozi lyange.”

³⁸Piraato nʼamubuuza nti, “Amazima kye ki?” Piraato bwe yamala okwogera bwʼatyo nʼafuluma ebweru eri Abayudaaya nʼabagamba nti, “Omuntu ono talina musango.

³⁹Naye ku buli mbaga ejjuukirirwako Okuyitako mulina empisa, onkusaba mbateere omusibe omu. Kale mwagala mbateere Kabaka wʼAbayudaaya?”

⁴⁰Bonna kyebaava baleekaanira waggulu nga bagamba nti, “Nedda, si oyo, wabula tuteere Balaba.” Balaba oyo yali munyazi.