Yokaana 19:1-42 LGCB2014 - Bible AI

¹Awo Piraato nʼatwala Yesu nʼamukuba embooko.

²Abaserikale ne bakola engule eyʼamaggwa ne bagissa ku mutwe gwa Yesu, ne bamwambaza olugoye olwa kakobe,

³ne bajja wʼali ne bamugamba nti, “Mirembe, Kabaka wʼAbayudaaya!” Ne bamukuba empi.

⁴Piraato nʼafuluma ebweru nate, nʼagamba Abayudaaya nti, “Laba, mbaleetera Yesu ebweru, kyokka mutegeere nga nze ndaba taliiko musango.”

⁵Awo Yesu nʼafuluma ngʼatikkiddwa engule eyakolebwa mu maggwa, era ngʼayambaziddwa olugoye olwʼeffulungu, Piraato nʼagamba Abayudaaya nti, “Mulabe omuntu oyo!”

⁶Awo bakabona abakulu nʼabaweereza bwe baamulaba, ne baleekaana nti, “Mukomerere, mukomerere!” Piraato nʼabagamba nti, “Mmwe mumutwale mumukomerere. Nze simulabako musango.”

⁷Abayudaaya ne bamuddamu nti, “Ffe tulina etteeka, era okusinziira ku tteeka eryo asaanidde kuttibwa, kubanga yeeyita Omwana wa Katonda.”

⁸Piraato bwe yawulira ekyo ne yeeyongera okutya.

⁹Nʼazzaayo Yesu mu lubiri, nʼamubuuza nti, “Oli wa wa?” Yesu nʼatamuddamu kigambo.

¹⁰Piraato nʼamugamba nti, “Tonziramu? Tomanyi nga nnina obuyinza okukuta oba okukukomerera?”

¹¹Yesu nʼamuddamu nti, “Tewandibadde na buyinza ku Nze nʼakatono, singa tebukuweebwa kuva waggulu. Noolwekyo abo abampaddeyo gyʼoli be balina ekibi ekisinga.”

¹²Okuva mu kiseera ekyo Piraato nʼasala amagezi okuta Yesu. Naye Abayudaaya ne baleekaana nga bagamba nti, “Bwʼota omuntu oyo nga tokyali mukwano gwa Kayisaali. Buli eyeefuula kabaka aba awakanya Kayisaali.”

¹³Bwe baayogera batyo Piraato nʼazza Yesu ebweru gye bali, nʼatuula ku ntebe esalirwako emisango, mu kifo ekiyitibwa Amayinja Amaaliire, mu Lwebbulaniya Gabbasa.

¹⁴Lwali lunaku lwa kutegeka Mbaga ejjuukirirwako Okuyitako. Essaawa zaali nga mukaaga ezʼomu ttuntu. Piraato nʼagamba Abayudaaya nti, “Kabaka wammwe wuuno!”

¹⁵Abayudaaya ne baleekaana nga bagamba nti, “Muggyeewo, muggyeewo, mukomerere!” Piraato nʼababuuza nti, “Kabaka wammwe gwe mba nkomerera?” Bakabona ne baddamu nti, “Tetulina kabaka mulala, wabula Kayisaali.”

¹⁶Piraato nʼabawa Yesu okumukomerera.

¹⁶Awo ne batwala Yesu;

¹⁷nʼafuluma nga yeetisse omusaalaba gwe, nʼatuuka mu kifo ekiyitibwa ekyʼEkiwanga, mu Lwebbulaniya kiyitibwa Gologoosa.

¹⁸Ne bamukomerera ku musaalaba mu kifo ekyo. Era ne bakomerera nʼabalala babiri, omu eruuyi nʼomulala eruuyi, Yesu nʼabeera wakati waabwe.

¹⁹Piraato nʼakola ekiwandiiko nʼakiteeka ku musaalaba, nga kisoma nti: “YESU Omunnazaaleesi, KABAKA WʼABAYUDAAYA.”

²⁰Ekifo kye baakomereramu Yesu kyali kumpi nʼekibuga, era Abayudaaya bangi abaasoma ekiwandiiko ekyo kubanga kyali mu Lwebbulaniya, ne mu Lulatini ne Luyonaani.

²¹Awo bakabona abakulu abʼAbayudaaya ne bagamba Piraato nti, “Towandiika nti, ‘Kabaka wʼAbayudaaya,’ naye nti, ‘Oyo eyeeyita Kabaka wʼAbayudaaya.’ ”

²²Piraato nʼaddamu nti, “Ekyo kye mpandiise kye mpandiise.”

²³Abaserikale bwe baamala okukomerera Yesu, ne baddira engoye ze ne baziteeka emiteeko ena. Buli muserikale nʼafuna omuteeko gumu. Ne baddira ekkanzu ye, eyali erukiddwa obulukibwa yonna,

²⁴ⓝ abaserikale ne bagambagana nti, “Tuleme kugiyuzaamu naye tugikubire kalulu, tulabe anaagitwala.” Kino kyabaawo okutuukiriza ekyawandiikibwa ekigamba nti: Ekyo kyennyini abaserikale kye baakolera ddala.

²⁴“Baagabana ebyambalo byange, nʼekkanzu yange ne bagikubira akalulu.”

²⁵Okumpi nʼomusaalaba gwa Yesu waali wayimiriddewo nnyina, ne muganda wa nnyina, ne Maliyamu muka Kuloopa, ne Maliyamu Magudaleene.

²⁶Yesu bwe yalaba nnyina, era nʼomuyigirizwa Yesu gwe yayagalanga ennyo ngʼayimiridde awo, nʼagamba nnyina nti, “Maama, laba omwana wo.”

²⁷Ate nʼagamba omuyigirizwa nti, “Laba maama wo.” Okuva olwo omuyigirizwa oyo nʼatwala nnyina Yesu eka ewuwe.

²⁸Yesu bwe yamanya nga byonna biwedde, ekyawandiikibwa kiryoke kituukirire, nʼayogera nti, “Ennyonta ennuma.”

²⁹Waali wateekeddwawo ekibya ekijjudde wayini omukaatuufu, ne bannyikamu ekyangwe, ne bakiteeka ku kati ka ezobu ne bakiteeka ku mumwa gwa Yesu.

³⁰Bwe yakombako nʼagamba nti, “Kiwedde.” Nʼakutamya omutwe gwe nʼawaayo obulamu bwe.

³¹Olunaku nga bwe lwali olwʼokweteekerateekera Ssabbiiti eyo enkulu ennyo, abakulembeze bʼAbayudaaya ne batayagala mirambo kusigala ku misaalaba. Kyebaava basaba Piraato abaakomererwa bamenyebwe amagulu era bawanulweyo.

³²Awo abaserikale ne bajja ne bamenya amagulu gʼabasajja abaakomererwa ne Yesu.

³³Naye bwe batuuka ku Yesu ne balaba nga yafudde dda, ne batamumenya magulu.

³⁴Naye omu ku baserikale nʼamufumita effumu mu mbiriizi, amangwago ne muvaamu omusaayi nʼamazzi.

³⁵Oyo eyakirabira ddala nga kibaawo ye yakyogera, era kye yayogera kya mazima, era oyo amanyi ngʼayogera mazima mulyoke mukkirize.

³⁶ⓞ Bino byabaawo ekyawandiikibwa kiryoke kituukirire ekigamba nti: “Talimenyebwa gumba na limu.”

³⁷ⓟ Era ekyawandiikibwa ekirala kigamba nti, “Balimulaba oyo gwe baafumita.”

³⁸Ebyo bwe byaggwa, Yusufu owʼe Alimasaya, eyali omuyigirizwa wa Yesu mu kyama olwʼokutya Abayudaaya, nʼasaba Piraato olukusa okuwanulayo omulambo gwa Yesu, Piraato nʼamukkiriza. Yusufu nʼaguwanulayo nʼagutwala.

³⁹Nikodemo, eddako eyagenda eri Yesu ekiro, naye nʼajja ngʼaleese kilo ngʼamakumi ataano ezʼebyakoloosa ebitabule nʼenvumbo.

⁴⁰Ne batwala omulambo gwa Yesu, ne baguzinga mu ngoye eza linena wamu nʼebyakaloosa ngʼempisa yʼAbayudaaya eyʼokuziika bwe yali.

⁴¹Mu kifo Yesu we yakomererwa waaliwo ennimiro omwali entaana empya eyʼempuku, eyali teziikibwangamu muntu.

⁴²Nga bwe lwali olunaku lwʼAbayudaaya olwʼokweteekerateekera Ssabbiiti ate ngʼentaana eno eri kumpi, Yesu ne bamussa omwo.