Yokaana 2:1-25 LGCB2014 - Bible AI

¹Awo bwe waayitawo ennaku bbiri ne wabaawo embaga eyʼobugole mu Kaana ekyʼe Ggaliraaya ne nnyina Yesu yaliyo.

²Yesu awamu nʼabayigirizwa be nabo baayitibwa.

³Wayini bwe yaggwaawo, nnyina Yesu nʼajja gyʼali nʼamugamba nti, “Tebakyalina wayini.”

⁴Yesu nʼamuddamu nti, “Maama ndeka, kubanga ekiseera kyange tekinnatuuka.”

⁵Nnyina Yesu nʼagamba abaweereza nti, “Kyonna kyʼabagamba kye muba mukola.”

⁶Waaliwo amasuwa amanene mukaaga agaategekebwa olwʼomukolo gwʼAbayudaaya ogwʼokwetukuza, buli limu nga lirimu lita kikumi oba kikumi mu ataano.

⁷Yesu nʼagamba abaweereza nti, “Amasuwa mugajjuze amazzi.” Ne bagajjuza okutuuka ku migo.

⁸Awo nʼabagamba nti, “Kale musene mutwalire omukulu wʼabagabuzi.”

⁸Ne basena ne bamutwalira.

⁹Omukulu wʼabagabuzi bwe yalega ku mazzi agafuuse wayini, nga tamanyi gyʼavudde, so nga bo abaweereza baali bamanyi, nʼayita omugole omusajja

¹⁰nʼamugamba nti, “Bulijjo omuntu asooka kugabula wayini omuka, nʼoluvannyuma ngʼabagenyi be banywedde nnyo, tebakyafaayo olwo nʼalyoka agabula ogutali muka nnyo. Naye ggwe wayini omuka gwʼosembezzaayo!”

¹¹Ekyamagero kino, Yesu kye yasookerako okukola mu lwatu mu Kaana ekyʼe Ggaliraaya, ngʼalaga ekitiibwa kye. Abayigirizwa be bwe baakiraba ne bamukkiriza.

¹²Embaga bwe yaggwa Yesu nʼadda e Kaperunawumu nʼabayigirizwa be nʼamalayo ennaku ntono ngʼali eyo ne nnyina ne baganda be.

¹³Embaga yʼAbayudaaya eyʼOkuyitako bwe yali eneetera okutuuka Yesu nʼayambuka e Yerusaalemi.

¹⁴Nʼasanga mu Yeekaalu abaali batunda ente nʼendiga nʼamayiba era nʼabali bawaanyisa ensimbi.

¹⁵Awo Yesu nʼaddira emiguwa nʼagifunyaafunya ne giba ngʼembooko nʼagobawo endiga nʼente, nʼasaasaanya nʼensimbi ezʼabaali bawaanyisa, nʼavuunika nʼemmeeza zaabwe.

¹⁶Nʼakyukira abaali batunda amayiba nʼabagamba nti, “Bino mubiggye wo. Temufuula Nnyumba ya Kitange katale[2].”

¹⁷ⓐ Awo abayigirizwa ne bajjukira Ekyawandiikibwa ekigamba nti, “Obuggya bwʼEnnyumba yo, Ayi Mukama, bulindya.”

¹⁸Awo Abayudaaya ne bamubuuza nti, “Kabonero ki kʼotulaga nti olina obuyinza okukola bino?”

¹⁹Yesu kwe kuddamu nti, “Mumenyeewo Yeekaalu eno ngizzeewo mu nnaku ssatu.”

²⁰Ne bamuddamu nti, “Kiki kyʼotegeeza? Yeekaalu eno yatwalira ddala emyaka amakumi ana mu mukaaga okuzimba oyinza otya okugizimbira ennaku essatu?”

²¹Kyokka Yeekaalu gye yali ayogerako gwe mubiri gwe.

²²Yesu bwe yamala okuzuukira abayigirizwa ne bajjukira nti kino kye yali ayogerako. Ne bakkiriza ebyawandiikibwa nʼebigambo Yesu bye yayogerako.

²³Awo Yesu bwe yali mu Yerusaalemi mu kiseera ekyʼEmbaga eyʼOkuyitako, bangi baalaba obubonero bwe yali akola ne bakkiriza erinnya lye.

²⁴Kyokka Yesu teyabeesiga, kubanga amanyi abantu bonna,

²⁵kubanga yamanya bwʼafaanana, nga teyeetaaga kubuulirwa muntu kyali.