Yokaana 21:1-25 LGCB2014 - Bible AI

¹Ebyo bwe byaggwa, Yesu nʼalabikira nate abayigirizwa be, ku nnyanja eyʼe Tiberiya.[5] Yabalabikira bwʼati:

²Simooni Peetero, ne Tomasi ayitibwa Didumo, ne Nassanayiri owʼe Kaana ekyʼe Ggaliraaya, ne batabani ba Zebbedaayo, nʼabayigirizwa abalala babiri, bonna baali wamu.

³Simooni Peetero nʼabagamba nti, “ŋŋenda kuvuba.” Ne bamugamba nti, “Ka tugende ffenna.” Ne bagenda ne basaabala mu lyato. Naye ekiro ekyo kyonna ne batakwasaayo kintu.

⁴Bwe bwali bukya, Yesu nʼayimirira ku lubalama, naye abayigirizwa ne batamutegeera.

⁵Yesu nʼababuuza nti, “Abaana, mukwasizzaayo?” Ne baddamu nti, “Nedda,”

⁶Yesu nʼabagamba nti, “Kale musuule akatimba ku luuyi olwa ddyo olwʼeryato, mujja ku kukwasa.” Awo ne basuula, naye ne batasobola kukannyulula olwʼebyennyanja ebingi bye baakwasa!

⁷Awo omuyigirizwa oyo Yesu gwe yayagalanga ennyo nʼagamba Peetero nti, “Oyo Mukama waffe!” Simooni Peetero bwe yakiwulira ne yeesiba olugoye kubanga yali mu kakutu, ne yeesuula mu mazzi.

⁸Abayigirizwa abalala bo ne bajjira mu lyato nga basika akatimba akaalimu ebyennyanja. Tebaali wala nʼolukalu, baali nga mita kyenda.

⁹Awo bwe baatuuka ne basanga omuliro ogwʼamanda nga gwaka, nga kuliko ekyennyanja nʼomugaati.

¹⁰Yesu nʼabagamba nti, “Muleete ku byennyanja bye muva okukwasa kaakano.”

¹¹Awo Simooni Peetero nʼagenda nʼawalula akatimba nʼakatuusa ku lukalu, nga kajjudde ebyennyanja ebinene kikumi mu ataano mu bisatu. Newaakubadde nga byali bingi bwe bityo naye akatimba tekaakutuka.

¹²Yesu nʼabagamba nti, “Mujje mulye ekyenkya.” Naye ku bayigirizwa tewaali nʼomu yategana kumubuuza nti, “Ggwe ani?” Kubanga bonna baamanya nti Ye Mukama waffe.

¹³Yesu nʼatoola omugaati nʼabagabira era nʼebyennyanja nʼakola bwʼatyo.

¹⁴Guno gwe mulundi ogwokusatu Yesu gwe yalabikira abayigirizwa be, ngʼamaze okuzuukira.

¹⁵Bwe baamala okulya, Yesu nʼagamba Peetero nti, “Simooni omwana wa Yokaana, onjagala okusinga bano?” Peetero nʼaddamu nti, “Ddala, omanyi nga nkwagala nnyo.” Yesu nʼamugamba nti, “Kale liisanga abaana bʼendiga zange.”

¹⁶Yesu nʼamubuuza omulundi ogwokubiri nti, “Simooni omwana wa Yokaana, ddala onjagala?” Peetero nʼaddamu nti, “Ddala, Mukama wange, omanyi nga nkwagala.” Yesu nʼamugamba nti, “Kale lundanga endiga zange.”

¹⁷Yesu nʼabuuza Peetero omulundi ogwokusatu nti, “Simooni omwana wa Yokaana, onjagala?” Peetero nʼanakuwala kubanga Yesu yamubuuza omulundi ogwokusatu nti, “Onjagala?” Peetero nʼamuddamu nti, “Mukama wange ggwe omanyi buli kimu, omanyi nga nkwagala.”

¹⁷Yesu nʼamugamba nti, “Kale liisanga endiga zange.

¹⁸Bwe wali ngʼokyali muvubuka wasobolanga okukola buli kye wayagalanga era ngʼogenda buli gye weetaaganga naye bwʼolikaddiwa oligolola emikono gyo, omuntu omulala nʼakusiba nʼakutwala gyʼotoyagala.”

¹⁹Ekyo Yesu yakyogera ngʼalaga enfa Peetero gyʼalifaamu okuweesa Katonda ekitiibwa. Awo nʼamugamba nti, “Ngoberera.”

²⁰Peetero bwe yakyuka, nʼalaba omuyigirizwa oli Yesu gwe yayagalanga ennyo nga naye agoberera. Oyo ye muyigiriza eyagalamira okumpi nʼekifuba kya Yesu nga balya ekyekiro ekyʼenkomerero, amale abuuze Yesu nti, “Mukama waffe ani agenda okukulyamu olukwe?”

²¹Peetero bwe yamulaba kwe kubuuza Yesu nti, “Mukama wange, ate ono aliba atya?”

²²Yesu nʼamugamba nti, “Bwe njagala abeerawo okutuusa lwe ndikomawo, ofaayo ki? Ggwe goberera Nze.”

²³Awo ekigambo ekyo ne kibuna mu booluganda nti Omuyigirizwa oyo talifa. Naye Yesu teyagamba nti Omuyigirizwa oyo talifa, wabula yagamba bugambi nti, “Bwe njagala abeerawo okutuusa lwe ndikomawo, ofaayo ki?”

²⁴Oyo ye muyigirizwa akakasa bino era ye yabiwandiika. Era tumanyi nga byʼategeeza bya mazima.

²⁵Waliwo nʼebintu ebirala bingi Yesu bye yakola ebitaawandiikibwa. Era singa nabyo byawandiikibwa kinnakimu, ndowooza nga nʼensi zonna tezandigiddemu bitabo ebyandiwandiikiddwa.