Yokaana 3:1-36 LGCB2014 - Bible AI

¹Awo waaliwo omukulembeze wʼAbayudaaya erinnya lye Nikodemo, Omufalisaayo,

²nʼajja eri Yesu ekiro okwogera naye. Nʼamugamba nti, “Labbi, tumanyi nti oli muyigiriza eyava eri Katonda kubanga ebyʼamagero byʼokola tewali ayinza kubikola okuggyako nga Katonda ali wamu naye.”

³Yesu nʼamuddamu nti, “Ddala ddala nkugamba nti, Omuntu bwʼatazaalibwa mulundi gwakubiri tayinza kulaba bwakabaka bwa Katonda.”

⁴Nikodemo nʼamuddamu nti, “Omuntu ayinza atya okuzaalibwa bwʼaba nga muntu mukulu? Ayinza okuyingira mu lubuto lwa nnyina omulundi ogwokubiri, nʼazaalibwa?”

⁵Yesu kwe kumuddamu nti, “Ddala ddala nkugamba nti, Okuggyako ngʼomuntu azaaliddwa amazzi nʼOmwoyo tasobola kuyingira mu bwakabaka bwa Katonda.

⁶Ekizaalibwa omubiri kiba mubiri, nʼekizaalibwa Omwoyo kiba mwoyo.

⁷Noolwekyo teweewuunya kubanga nkugambye nti Kibagwanira okuzaalibwa omulundi ogwokubiri.

⁸Empewo ekuntira gyʼeyagala, nʼowulira okuwuuma kwayo, naye tomanya gyʼeva newaakubadde gyegenda; bwʼatyo bwʼabeera omuntu yenna azaalibwa Omwoyo.”

⁹Nikodemo nʼamubuuza nti, “Ebyo biyinza bitya okubaawo?”

¹⁰Yesu nʼamuddamu nti, “Ggwe omuyigiriza wa Isirayiri, nʼotomanya bintu bino?

¹¹Ddala ddala nkugamba nti Twogera kye tumanyi, ne tutegeeza kye twalaba, so temukkiriza bujulirwa bwaffe.

¹²Naye obanga temukkiriza bwe mbabuulira ebyʼensi, kale munaasobola mutya okukkiriza bwe nnaababuulira ebyʼomu ggulu?

¹³Kubanga tewali muntu eyali alinnye mu ggulu, okuggyako eyava mu ggulu, ye Mwana wʼOmuntu.

¹⁴Era nga Musa bwe yawanika omusota mu ddungu, bwe kityo nʼOmwana wʼOmuntu kimugwanira okuwanikibwa,

¹⁵buli amukkiriza alyoke afune obulamu obutaggwaawo.

¹⁶“Kubanga Katonda bwe yayagala ensi, bwʼatyo nʼawaayo Omwana we omu yekka, buli muntu yenna amukkiriza aleme kuzikirira, wabula afune obulamu obutaggwaawo.

¹⁷Kubanga Katonda teyatuma Mwana we mu nsi kugisalira musango, wabula ensi erokolebwe okuyita mu ye.

¹⁸Amukkiriza tasalibwa musango, naye atakkiriza gumaze okumusinga kubanga takkiririza mu linnya lyʼOmwana oyo omu yekka owa Katonda.

¹⁹Era guno gwe musango nti: Omusana guzze mu nsi, kyokka abantu ne baagala ekizikiza okusinga omusana, kubanga ebikolwa byabwe bibi.

²⁰Buli akola ebibi akyawa Omusana era tajja eri musana, ebikolwa bye bireme okumanyibwa.

²¹Naye buli ajja eri omusana akola ebyʼamazima, ebikolwa bye bimanyibwe nga byakolerwa mu Katonda.”

²²Oluvannyuma lwʼebyo Yesu nʼabayigirizwa be ne bajja mu nsi yʼe Buyudaaya, nʼabeera eyo nabo, era nʼabatiza.

²³Mu kiseera ekyo ne Yokaana yali abatiriza mu Enoni okumpi ne Salimu, kubanga awo waaliwo amazzi mangi, era ngʼabantu bangi bajja okubatizibwa,

²⁴olwo nga tannateekebwa mu kkomera.

²⁵Ne wabaawo empaka wakati wʼabayigirizwa ba Yokaana nʼOmuyudaaya ku nsonga eyʼokutukuzibwa.

²⁶Ne bajja eri Yokaana ne bamugamba nti, “Labbi, omuntu oli gwe wali naye emitala wʼomugga Yoludaani, gwe wayogerako, laba abatiza era abantu bonna bagenda gyʼali.”

²⁷Yokaana nʼabaddamu nti, “Omuntu tayinza kuba na kintu okuggyako nga kimuweereddwa okuva mu ggulu.

²⁸Mmwe mwennyini mukimanyi bulungi nga bwe nabagamba nti, ‘Si nze Kristo.’ Nze natumibwa okumukulembera.

²⁹Nannyini mugole ye awasizza, naye mukwano nnannyini mugole ayimirira ngʼamuwulidde, era asanyukira nnyo eddoboozi lyʼoyo awasizza. Noolwekyo essanyu lyange lituukiridde.

³⁰Kimugwanira ye okugulumizibwa naye nze okutoowazibwa.”

³¹“Oyo ava mu ggulu, yafuga byonna. Owʼomu nsi, aba wa mu nsi, era ayogera bya mu nsi.

³²Ye ategeeza ebyo bye yalaba ne bye yawulira, so tewali akkiriza byʼategeeza.

³³Naye oyo akkiriza byʼategeeza akakasa nti Katonda wa mazima.

³⁴Kubanga oyo eyatumwa Katonda ategeeza ebigambo bya Katonda, nʼOmwoyo gwʼagaba tagerebwa.

³⁵Kitaffe ayagala Omwana we era yamukwasa byonna mu mukono gwe.

³⁶Oyo akkiriza Omwana alina obulamu obutaggwaawo, naye oyo atakkiriza Mwana, taliraba bulamu era Katonda amusunguwalira.”