Yokaana 4:1-54 LGCB2014 - Bible AI

¹Awo Yesu bwe yamanya nti Abafalisaayo bategedde nti Abantu bangi bafuuse bayigirizwa be, era ngʼabatiza bangi okusinga Yokaana,

²newaakubadde nga Yesu yennyini teyabatiza wabula abayigirizwa be, be baabatizanga,

³nʼava e Buyudaaya nʼaddayo e Ggaliraaya.

⁴Kyali kimugwanira okuyita mu Samaliya.

⁵Awo nʼatuuka mu kibuga kyʼe Samaliya ekiyitibwa Sukali, nga kiri kumpi nʼekibanja Yakobo kye yawa mutabani we Yusufu.

⁶Awo we waali oluzzi lwa Yakobo. Yesu yali akooye olwʼolugendo lwe yatambula, nʼatuula awo ku luzzi. Obudde bwali ngʼessaawa mukaaga ezʼomu ttuntu.

⁷Awo omukazi Omusamaliya bwe yajja okukima amazzi, Yesu nʼamugamba nti, “Mpa ku mazzi nnyweko.”

⁸Mu kiseera ekyo abayigirizwa be baali bagenze mu kibuga okugulayo ku mmere.

⁹Awo omukazi Omusamaliya nʼamugamba nti, “Ggwe Omuyudaaya oyinza otya okusaba nze Omusamaliya amazzi okunywa?” Kubanga Abayudaaya nga tebakolagana na Basamaliya.

¹⁰Yesu nʼamuddamu nti, “Singa obadde omanyi ekirabo kya Katonda, nʼoyo akugamba nti Mpa nnywe ku mazzi bwʼali ggwe wandimusabye, naye yandikuwadde amazzi amalamu.”

¹¹Omukazi nʼamugamba nti, “Ssebo, tolina kalobo, nʼoluzzi luwanvu nnyo.

¹²Ate nʼekirala, ggwe oli mukulu okusinga jjajjaffe Yakobo eyatuwa oluzzi luno ate nga yanywangamu ye nʼabaana be nʼensolo ze?”

¹³Yesu nʼamuddamu nti, “Buli muntu yenna anywa ku mazzi gano ennyonta eriddamu okumuluma.

¹⁴Naye buli anywa ku mazzi nze ge ndimuwa, talirumwa nnyonta emirembe gyonna era galifuuka mu ye ensulo etekalira, ne gakulukuta okutuuka ku bulamu obutaggwaawo.”

¹⁵Omukazi nʼamugamba nti, “Ssebo, mpa ku mazzi ago, ennyonta eremenga kunnuma era nneme kujjanga wano kukima mazzi.”

¹⁶Yesu nʼamugamba nti, “Genda oyite balo, okomewo.”

¹⁷Omukazi nʼamuddamu nti, “Sirina baze!”

¹⁷Yesu nʼamugamba nti, “Oyogedde kituufu nti Tolina balo.

¹⁸Kubanga walina babalo bataano, naye oyo gwʼolina kaakano si balo. Ekyo oyogedde mazima.”

¹⁹Omukazi nʼagamba Yesu nti, “Ssebo, ndaba ngʼoli nnabbi.

²⁰Ku lusozi luno bajjajjaffe kwe baasinzizanga. Naye mmwe mugamba nti, Yerusaalemi kye kifo ekigwana okusinzizangamu.”

²¹Yesu nʼamugamba nti, “Mukazi wattu nzikiriza, kubanga ekiseera kijja kye mutalisinzizangamu Kitaffe ku lusozi luno wadde mu Yerusaalemi.

²²Mmwe musinza kye mutamanyi; ffe tusinza kye tumanyi kubanga obulokozi buva mu Buyudaaya.

²³Naye ekiseera kijja, era kituuse, abo abasinziza mu mazima bwe banaasinzizanga Kitaffe mu mwoyo ne mu mazima. Kubanga Kitaffe anoonya abo abamusinza era nʼabo abamusinza kibagwanira okumusinzanga mu mwoyo ne mu mazima.

²⁴Kubanga Katonda Mwoyo nʼabo abamusinza kibagwanira okumusinza mu mwoyo ne mu mazima.”

²⁵Omukazi nʼamugamba nti, “Weewaawo, mmanyi nti Masiya, gwe bayita Kristo, ajja. Ye bwʼalijja, alitutegeeza ebintu byonna.”

²⁶Yesu nʼamugamba nti, “Nze nzuuno ayogera naawe.”

²⁷Awo mu kiseera ekyo abayigirizwa ba Yesu ne bakomawo. Ne beewuunya okulaba ngʼayogera nʼomukazi. Kyokka ne watabaawo amubuuza nsonga emwogezezza naye wadde bye babadde boogerako.

²⁸Awo omukazi nʼaleka awo ensuwa ye nʼagenda mu kibuga nʼategeeza abantu nti,

²⁹“Mujje mulabe omuntu antegeezezza buli kye nnali nkoze. Ayinza okuba nga ye Kristo?”

³⁰Ne bava mu kibuga ne bajja eri Yesu.

³¹Mu kiseera ekyo abayigirizwa baali beegayirira Yesu alye ku mmere, nga bagamba nti, “Labbi lya ku mmere.”

³²Nʼabaddamu nti, “Nze nnina ekyokulya mmwe kye mutamanyi.”

³³Awo abayigirizwa ne beebuuzaganya nti, “Waliwo omuntu amuleetedde ekyokulya?”

³⁴Yesu nʼabaddamu nti, “Ekyokulya kyange kwe kukola eyantuma byʼayagala, era nʼokutuukiriza omulimu gwe.

³⁵Mmwe temugamba nti, ‘Ekyasigaddeyo emyezi ena amakungula gatuuke?’ Kale muyimuse amaaso gammwe, mutunuulire ennimiro! Amakungula gatuuse.

³⁶Akungula asasulwa empeera ye era nʼakuŋŋaanyiza ebibala mu bulamu obutaggwaawo, olwo asiga nʼakungula balyoke basanyukire wamu.

³⁷Bwe kityo ekigambo nti, ‘Omu asiga omulala nʼakungula,’ kyekiva kiba ekyʼamazima.

³⁸Mbatumye mmwe okukungula kye mutaasiga. Abalala be baasiga naye mmwe mugobolodde.”

³⁹Abasamaliya bangi abʼomu kibuga abaamukkiririzaamu olwʼebyo omukazi bye yabategeeza, ngʼabagamba nti, “Antegeezezza buli kye nnali nkoze!”

⁴⁰Awo Abasamaliya bwe bajja eri Yesu ne bamwegayirira yeeyongere okubeera nabo, nʼabeera nabo ennaku bbiri.

⁴¹Bangi ne bakkiriza olwʼebyo bye yabategeeza.

⁴²Awo ne bagamba omukazi nti, “Tumukkiriza si lwa bigambo byo byokka, naye naffe twewuliridde ebigambo bye. Ddala tutegedde nga ye Mulokozi wʼensi.”

⁴³Ennaku ezo ebbiri bwe zaggwaako, Yesu nʼava e Samaliya nʼalaga e Ggaliraaya.

⁴⁴Ye yennyini yagamba nti, “Nnabbi taweebwa kitiibwa mu nsi gyʼasibuka.”

⁴⁵Awo Abagaliraaya ne bamwaniriza nʼessanyu lingi nnyo, kubanga baali bamaze okulaba ebyʼamagero bye yakolera mu Yerusaalemi bwe baali ku Mbaga eyʼOkuyitako.

⁴⁶Yesu nʼakomawo mu Kaana ekyʼe Ggaliraaya, gye yafuulira amazzi wayini. Waaliyo omukungu wa gavumenti owʼe Kaperunawumu eyalina mutabani we nga mulwadde.

⁴⁷Omukungu bwe yawulira nga Yesu avudde e Buyudaaya azze e Ggaliraaya, nʼagenda gyʼali nʼamusaba agende amuwonyeze mutabani we eyali okumpi nʼokufa.

⁴⁸Yesu nʼamugamba nti, “Temusobola kunzikiriza nga temulabye ku bubonero na byamagero?”

⁴⁹Omukungu nʼamugamba nti, “Mukama wange, nkusaba oserengete ojje ngʼomwana wange tannafa!”

⁵⁰Awo Yesu nʼamugamba nti, “Ggenda mutabani wo awonye!” Omusajja nʼakkiriza Yesu kyʼamugambye nʼagenda.

⁵¹Naye bwe yali ngʼakyali mu kkubo abaddu be ne bamusisinkana ne bamutegeeza nti Mutabani we awonye.

⁵²Nʼababuuza ekiseera omulenzi we yassuukidde. Ne bamuddamu nti, “Jjo olwʼeggulo essaawa nga musanvu omusujja ne gumuwonako!”

⁵³Awo Kitaawe wʼomulenzi nʼajjukira nga kyʼekiseera ekyo Yesu we yamugambira nti, “Mutabani wo awonye.” Awo omukungu oyo nʼabʼenju ye bonna ne bakkiriza.

⁵⁴Kino kye kyamagero ekyokubiri Yesu kye yakola ngʼakomyewo e Ggaliraaya ngʼavudde e Buyudaaya.