Yokaana 6:1-71 LGCB2014 - Bible AI

¹Oluvannyuma lwʼebyo, Yesu nʼasomoka ennyanja eyʼe Ggaliraaya, era eyitibwa eyʼe Tiberiya.

²Ekibiina kyʼabantu kinene ne bamugoberera, kubanga baalaba ebyamagero bye yakola ngʼawonya abalwadde.

³Awo Yesu nʼalinnya ku lusozi nʼatuula wansi nʼabayigirizwa be.

⁴Embaga yʼAbayudaaya eyitibwa Okuyitako yali eri kumpi okutuuka.

⁵Yesu bwe yayimusa amaaso nʼalaba ekibiina kyʼabantu ekinene, nga bajja gyʼali, nʼagamba Firipo nti, “Tunaagula wa emmere okuliisa abantu abo bonna?”

⁶Yayogera atyo kugezesa Firipo, kubanga Yesu yali amanyi kyʼagenda okukola.

⁷Firipo nʼamuddamu nti, “Emmere egula eddinaali ebikumi ebibiri teesobole na kubabuna, buli omu okulyako akatono.”

⁸Awo omu ku bayigirizwa be, Andereya muganda wa Simooni Peetero, nʼamugamba nti,

⁹“Wano waliwo omulenzi alina emigaati etaano egya sayiri, nʼebyennyanja bibiri. Naye bino binaagasa ki abantu abangi bwe bati?”

¹⁰Yesu nʼabagamba nti, “Mutuuze abantu.” Waaliwo omuddo mungi mu kifo ekyo. Awo abantu ne batuula, ne baba abasajja ngʼenkumi ttaano.

¹¹Awo Yesu nʼatoola emigaati ne yeebaza Katonda, nʼagabula abantu abatudde. Nʼebyennyanja nʼakola bwʼatyo. Bonna ne balya ne bakkuta.

¹²Oluvannyuma Yesu nʼagamba abayigirizwa be nti, “Kale mukuŋŋaanye obutundutundu obusigaddewo tuleme kufiirwa.”

¹³Ne babukuŋŋaanya, ne bajjuza ebibbo kkumi na bibiri ebyʼobutundutundu obwava mu migaati etaano egya sayiri, obwasigalawo nga bamaze okulya.

¹⁴Abantu bwe baalaba ekyamagero Yesu kye yakola ne bagamba nti, “Ddala ono ye Nnabbi oli alindirirwa okujja mu nsi!”

¹⁵Yesu bwe yategeera nti Bategeka okumukwata bamufuule kabaka waabwe nʼaddayo yekka ku lusozi.

¹⁶Obudde bwe bwawungeera abayigirizwa ba Yesu ne baserengeta ku nnyanja

¹⁷ne basaabala mu lyato ne boolekera Kaperunawumu. Nʼobudde bwali buzibye nga ne Yesu tannaba kutuuka gye bali.

¹⁸Awo omuyaga ne gukunta mungi, ennyanja nʼesiikuuka.

¹⁹Bwe baavugako kilomita nga ttaano oba mukaaga, ne balaba Yesu ngʼatambulira ku mazzi, ngʼasemberera eryato, ne batya.

²⁰Yesu nʼabagamba nti, “Ye Nze, temutya!”

²¹Ne baagala okumuyingiza mu lyato, amangwago eryato ne ligoba ku ttale gye baali bagenda.

²²Ku lunaku olwaddirira, ekibiina kyʼabantu abaasigala emitala wʼeri, ne balabawo eryato limu lyokka, ne bamanya ngʼabayigirizwa be baawunguka bokka mu lyato.

²³Kyokka amaato ne gava e Tiberiya ne gagoba awo kumpi nʼekifo abantu we baaliira emigaati Yesu gye yabawa ngʼamaze okwebaza.

²⁴Awo abantu bwe baalaba nga Yesu taliiwo wadde abayigirizwa be, ne bakwata amaato ne bawunguka ne batuuka e Kaperunawumu nga banoonya Yesu.

²⁵Bwe baamulaba emitala wʼennyanja ne bamubuuza nti, “Labbi, watuuse ddi wano?”

²⁶Yesu nʼabaddamu nti, “Ddala ddala mbagamba nti Munnoonya si lwa kubanga mwalaba obubonero, naye lwa kubanga mwalya emigaati ne mukkuta.

²⁷Temukolerera mmere eggwaawo, wabula munoonye emmere ebeerera era etuusa mu bulamu obutaggwaawo, Omwana wʼOmuntu gyʼalibawa, kubanga Kitaawe wʼOmwana amussizaako akabonero.”

²⁸Awo ne bamubuuza nti, “Tukole ki okutuukiriza ekyo Katonda kyʼayagala?”

²⁹Yesu nʼabaddamu nti, “Katonda kyʼayagala mukole kwe kukkiriza oyo gwe yatuma.”

³⁰Ne bamugamba nti, “Kale kabonero ki ggwe kʼokola, tulabe tukukkirize? Onookola kabonero ki?

³¹ⓑ Bajjajjaffe baalya emmaanu mu ddungu nga bwe kyawandiikibwa nti, ‘Yabawa emmere okuva mu ggulu balye.’ ”

³²Awo Yesu nʼabagamba nti, “Ddala ddala mbagamba nti Musa si ye yabawa emmere eva mu ggulu, wabula Kitange ye yabawa emmere eyʼamazima eva mu ggulu.

³³Emmere ya Katonda ye eva mu ggulu, era ye awa ensi obulamu.”

³⁴Ne bamugamba nti, “Mukama waffe, tuwenga emmere eyo buli lunaku.”

³⁵Yesu nʼabaddamu nti, “Nze mmere eyʼobulamu. Ajja gye ndi enjala teriddayo kumuluma, era abo abanzikiriza tebaliddayo kulumwa nnyonta.

³⁶Naye nabagamba nti Mundabye naye era ne mutanzikiriza.

³⁷Buli muntu Kitange gwʼampa alijja gye ndi, era buli ajja gye ndi sirimugobera bweru.

³⁸Kubanga ekyanzigya mu ggulu kwe kukola ekyo Katonda eyantuma kyʼayagala, so si Nze bye njagala ku bwange.

³⁹Eyantuma kyʼayagala kye kino: Ku abo be yampa nneme kubulwako nʼomu wabula bonna mbazuukize ku lunaku olwʼenkomerero.

⁴⁰Kubanga Kitange kyʼayagala kye kino nti buli alaba Omwana we nʼamukkiriza afuna obulamu obutaggwaawo ku lunaku olwʼenkomerero.”

⁴¹Awo Abayudaaya ne batandika okwemulugunyiza Yesu, kubanga yabagamba nti, “Nze mmere eyava mu ggulu.”

⁴²Ne bagamba nti, “Ono si ye Yesu omwana wa Yusufu? Kitaawe ne nnyina tubamanyi. Kale ayinza atya okugamba nti, ‘Nava mu ggulu?’ ”

⁴³Yesu nʼabagamba nti, “Temwemulugunya.

⁴⁴Tewali ayinza kujja gye ndi wabula nga Kitange eyantuma amuyise, era Nze ndimuzuukiza ku lunaku olwʼenkomerero.

⁴⁵ⓒ Kubanga kyawandiikibwa mu bannabbi nti, ‘Bonna baliyigirizibwa Katonda.’ Era buli gwʼayigiriza nʼategeera amazima ajja gye ndi.

⁴⁶Si kuba nti Waliwo eyali alabye ku Kitange, wabula oyo eyava eri Katonda, ye yalaba Kitaawe.

⁴⁷“Ddala ddala mbagamba nti, Akkiriza aba nʼobulamu obutaggwaawo!

⁴⁸Nze mmere eyʼobulamu.

⁴⁹Bajjajjammwe baalya emaanu mu ddungu ne bafa.

⁵⁰Eno yʼemmere eyava mu ggulu, buli agiryako aleme okufa.

⁵¹Nze mmere ennamu eyava mu ggulu omuntu bwʼalya ku mmere eno aliba mulamu emirembe nʼemirembe. Emmere gye ndigaba okuleetera ensi obulamu, gwe mubiri gwange.”

⁵²Awo Abayudaaya ne batandika okuwakana bokka na bokka nga bagamba nti, “Ono ayinza atya okutuwa omubiri gwe okugulya?”

⁵³Yesu nʼabagamba nti, “Ddala ddala mbagamba nti Bwe mutalya mubiri gwa Mwana wa Muntu, ne munywa nʼomusaayi gwe, temuyinza kuba na bulamu mu mmwe.

⁵⁴Buli alya omubiri gwange nʼanywa nʼomusaayi gwange, ngʼafunye obulamu obutaggwaawo era ndimuzuukiza ku lunaku olwʼenkomerero.

⁵⁵Kubanga omubiri gwange kye kyokulya ddala nʼomusaayi gwange kye kyokunywa ddala.

⁵⁶Oyo alya ku mubiri gwange era nʼanywa omusaayi gwange abeera mu nze, era nange mbeera mu ye.

⁵⁷Nga Kitange eyantuma bwʼali omulamu, nange bwe ndi omulamu ku bwa Kitange, noolwekyo oyo alya ku nze naye aliba mulamu ku bwange.

⁵⁸Eno ye mmere eva mu ggulu. Teri ngʼeyo bajjajjammwe gye baalya ne bafa. Alya emmere eno anaabanga mulamu emirembe nʼemirembe.”

⁵⁹Ebyo Yesu yabyogera ngʼayigiriza mu kkuŋŋaaniro e Kaperunawumu.

⁶⁰Abayigirizwa ba Yesu bangi bwe baabiwulira ne bagamba nti, “Ekigambo ekyo kizibu okutegeera. Ani asobola okutunnyonnyola kyʼagamba?”

⁶¹Awo Yesu bwe yategeera nga nʼabayigirizwa be bakyemulugunyako, nʼabagamba nti, “Ekyo kibeesittaza?

⁶²Kale mulirowooza ki bwe muliraba Omwana wʼOmuntu ngʼaddayo gye yava?

⁶³Mwoyo Mutukuvu yʼawa obulamu. Omubiri teguliiko kye gugasa. Ebigambo bye njogedde gye muli gwe mwoyo era bwe bulamu.

⁶⁴Naye era abamu ku mmwe temukkiriza.” Kubanga okuva ku lubereberye Yesu yategeera abatamukkiriza era nʼoyo agenda okumulyamu olukwe.

⁶⁵Awo nʼagamba nti, “Kyennava ŋŋamba nti Tewali ayinza kujja gye ndi bwʼatakiweebwa Kitange.”

⁶⁶Okuva olwo bangi ku bayigirizwa be ne bamuvaako ne bataddayo kuyita naye.

⁶⁷Awo Yesu nʼakyukira abayigirizwa be ekkumi nʼababiri nʼababuuza nti, “Nammwe mwagala kugenda?”

⁶⁸Simooni Peetero nʼamuddamu nti, “Mukama waffe, tunaagenda eri ani? Ggwe wekka gwʼolina ebigambo byʼobulamu obutaggwaawo.

⁶⁹Ffe tubikkiriza era tumanyi nti Oli Mutukuvu wa Katonda.”

⁷⁰Awo Yesu kwe kubagamba nti, “Mmwe ekkumi nʼababiri si nze nabalonda? Naye omu ku mmwe Setaani!”

⁷¹Yesu yayogera ku Yuda, mutabani wa Simooni Isukalyoti, kubanga ye yali agenda okumulyamu olukwe.