Yokaana 7:1-53 LGCB2014 - Bible AI

¹Oluvannyuma lwʼebyo, Yesu nʼalaga e Ggaliraaya, kubanga teyayagala kubeera mu Buyudaaya, kubanga Abayudaaya baali bamunoonya okumutta.

²Naye embaga yʼAbayudaaya eyitibwa eyʼEnsiisira yali eneetera okutuuka.

³Baganda ba Yesu ne bamugamba nti, “Vva wano, olage mu Buyudaaya, abayigirizwa bo balabe ebyamagero byʼokola.

⁴Tosobola kwatiikirira nga weekwese. Kale obanga, okola ebintu ebyo, weerage eri ensi.”

⁵Baganda be nabo tebaamukkiriza.

⁶Yesu nʼabaddamu nti, “Ekiseera kyange ekyʼokugenda tekinnatuuka. Naye mmwe muyinza okugenda mu kiseera kyonna we mwagalira.

⁷Mmwe ensi teyinza kubakyawa, naye Nze enkyawa kubanga ngitegeeza ebikolwa byayo ebibi.

⁸Mmwe mwambuke ku mbaga. Nze sijja kwambuka ku mbaga eno, kubanga ekiseera kyange tekinnatuuka.”

⁹Bwe yamala okubagamba ebyo nʼasigala mu Ggaliraaya.

¹⁰Baganda be bwe bamala okwambuka ku mbaga naye nʼayambuka, mu kyama so si mu lwatu.

¹¹Awo Abayudaaya ne bamunoonya ku mbaga nga beebuuza nti, “Omusajja oli, ali ludda wa?”

¹²Ne wabaawo oluvuuvuumo lungi mu bantu. Abamu ne bagamba nti, “Mulungi.” Naye abalala nga bagamba nti, “Nedda, alimba abantu.”

¹³Kyokka olwʼokutya Abayudaaya, tewaaliwo amwogerako mu lwatu.

¹⁴Awo mu makkati gʼembaga Yesu nʼayambuka mu Yeekaalu nʼayigiriza.

¹⁵Abakulembeze bʼAbayudaaya ne beewuunya nga bagamba nti, “Omuntu ono ayinza atya okumanya okusoma so nga tasomangako?”

¹⁶Awo Yesu kwe kubaddamu nti, “Nze sibayigiriza byange ku bwange, wabula ebyʼoyo eyantuma.

¹⁷Buli ayagala okukola Katonda byʼayagala, ategeera obanga bye njigiriza byange ku bwange oba bya Katonda.

¹⁸Ayogera ku bubwe anoonya kitiibwa kye, naye oyo anoonya ekitiibwa kyʼoyo eyantuma wa mazima so nʼobutali butuukirivu tebuba mu ye. Musa teyabawa amateeka?

¹⁹Ku mmwe tekuliiko nʼomu akwata mateeka. Kale lwaki musala amagezi okunzita?”

²⁰Ekibiina kyʼabantu ne baddamu nti, “Oliko dayimooni! Ani asala amagezi okukutta?”

²¹Yesu nʼaddamu nti, “Nakola ekikolwa kimu ku Ssabbiiti buli muntu ne yeewuunya.

²²Musa kyeyava abalagira okukomolebwa, okukomolebwa tekwatandikira ku Musa wabula kwatandikira ku bajjajjammwe; ne ku Ssabbiiti mukomola omuntu.

²³Obanga mukomola ku Ssabbiiti etteeka lya Musa lireme okumenyebwa, kale lwaki Nze munsunguwalira olwʼokuwonya omuntu ku Ssabbiiti, nʼaba mulamu ddala?

²⁴Temusalanga musango okusinziira ku ndabika, naye musalenga omusango ogwʼensonga.”

²⁵Awo abantu abamu abʼomu Yerusaalemi ne beebuuzaganya nga bagamba nti, “Ono si ye muntu gwe banoonya okutta?

²⁶Kale wuuno ayigiriza lwatu, ate tebaliiko kye bamugambako. Osanga abakulembeze bategedde nti Omuntu ono Ye Kristo!

²⁷Naye tumanyi omuntu ono gyʼava; so nga Kristo bwʼalijja tewaliba nʼomu amanya gyʼava.”

²⁸Awo Yesu bwe yali ngʼakyayigiriza mu Yeekaalu nʼakangula ku ddoboozi nʼagamba nti, “Ddala mummanyi ne gye nva mumanyiiyo. Sajja ku bwange wabula ekituufu nti oyo eyantuma gwe mutamanyi.

²⁹Nze mmumanyi, kubanga nava gyʼali, era ye yantuma.”

³⁰Awo ne basala amagezi okumukwata, kyokka tewaali amukwatako, kubanga ekiseera kye kyali tekinnaba kutuuka.

³¹Naye bangi mu bibiina byʼabantu ne bamukkiriza, ne bagamba nti, “Kale Kristo bwʼalijja, alikola ebyʼamagero ebisinga ebyʼono byakoze?”

³²Awo Abafalisaayo ne bawulira abantu nga boogera ku Yesu mu bwama. Awo bakabona abakulu nʼAbafalisaayo ne batuma abaweereza baabwe okumukwata.

³³Awo Yesu nʼagamba nti, “Nzija kumala nammwe ebbanga ttono, ndyoke nzireyo eri oyo eyantuma.

³⁴Mulinnoonya, naye temugenda kundaba, nga gye ndi, mmwe temuyinza kutuukayo.”

³⁵Awo Abayudaaya ne beebuuzaganya nti, “Omuntu ono alaga wa gye tutalimulabira? Ayagala kugenda eri abo abaasaasaanira mu Buyonaani, ayigirize Abayonaani?

³⁶Ategeeza ki bwʼagamba nti, ‘Mulinnoonya, naye temulindaba?’ Era nti, ‘Gye ndaga temuyinza kutuukayo?’ ”

³⁷Awo ku lunaku olwʼembaga olusembayo, olusingira ddala obukulu, Yesu nʼayimirira nʼayogera nʼeddoboozi eryʼomwanguka nʼagamba nti, “Buli alina ennyonta, ajje gye ndi anywe!

³⁸NgʼEkyawandiikibwa bwe kigamba nti Buli akkiriza Nze emigga egyʼamazzi amalamu girikulukuta nga gifuluma mu mutima gwe!”

³⁹Yesu yali ayogera ku Mwoyo Mutukuvu, abamukkiriza gwe baali bagenda okufuna, kubanga Mwoyo oyo yali tannagabibwa, kubanga Yesu yali tannaba kugulumizibwa.

⁴⁰Abantu abamu mu kibiina bwe baawulira ngʼayogera bwʼatyo, ne bagamba nti, “Ddala omuntu ono ye Nnabbi.”

⁴¹Abalala ne bagamba nti, “Omuntu ono ye Kristo.” Naye abalala ne bagamba nti, “Nedda, Kristo tayinza kuba ngʼava mu Ggaliraaya.”

⁴²Kubanga Ekyawandiikibwa kigamba nti: Kristo wa kuva mu zzadde lya Dawudi, era nga wa kuzaalibwa mu Besirekemu, ekibuga kya Dawudi mwe yali.

⁴³Awo ekibiina ne kyesalamu olwa Yesu.

⁴⁴Abamu ne baagala okumukwata, kyokka ne wabulawo amukwatako.

⁴⁵Awo abaweereza bʼabakabona abakulu nʼAbafalisaayo ne baddayo eri bakabona abakulu nʼAbafalisaayo. Abakulembeze Ne bababuuza nti, “Lwaki temumuleese?”

⁴⁶Abaweereza ne baddamu nti, “Ebigambo byʼayogera bya kitalo, tetubiwulirangako.”

⁴⁷Abafalisaayo ne babagamba nti, “Era nammwe abakyamizza?

⁴⁸Waliwo nʼomu ku bakulembeze wadde ku Bafalisaayo eyali akkiririzza mu muntu oyo?

⁴⁹Naye ekibiina kyʼabantu bano abatamanyi mateeka, bakolimiddwa!”

⁵⁰Awo Nikodemo, omu ku bo eddako eyagenda eri Yesu, nʼabuuza nti,

⁵¹“Amateeka gaffe gakkiriza okusalira omuntu omusango nga tannaba kuwozesebwa okutegeera kyʼakoze?”

⁵²Ne bamuddamu nti, “Naawe wava Ggaliraaya? Nnoonyereza, ojja kulaba nti e Ggaliraaya teva nnabbi.”

⁵³Awo ne baabuka, buli omu nʼaddayo eka.