Yokaana 9:1-41 LGCB2014 - Bible AI

¹Awo Yesu bwe yali ngʼatambula, nʼalaba omusajja eyazaalibwa nga muzibe wʼamaaso.

²Abayigirizwa be ne bamubuuza nti, “Labbi, ani eyayonoona, ono oba bazadde be alyoke azaalibwe nga muzibe wʼamaaso?”

³Yesu nʼaddamu nti, “Ku bonna omusajja ono newaakubadde bazadde be tekuliiko yayonoona, wabula kino kyabaawo emirimu gya Katonda girabikire ku ye.

⁴Kale kitugwanidde okukola emirimu gyʼoyo eyantuma, obudde nga bukyali misana. Ekiro kijja omuntu mwʼatasobolera kukola.

⁵Kyokka Nze bwe mbeera mu nsi mba musana gwa nsi.”

⁶Yesu bwe yamala okwogera bwʼatyo, nʼawanda amalusu ku ttaka nʼatabula, nʼalisiiga ku maaso gʼomusajja oyo.

⁷Nʼamugamba nti, “Genda onaabe mu kidiba kya Sirowamu,” amakulu nti, “Eyatumibwa”. Awo omusajja nʼagenda, nʼanaaba, nʼadda ngʼalaba.

⁸Baliraanwa bʼoyo eyawonyezebwa era nʼabalala abaali bamumanyi nga muzibe wʼamaaso, asabiriza, ne beebuuzaganya nti, “Ono si ye musajja oli eyatuulanga wali ngʼasabiriza?”

⁹Abamu ne bagamba nti, “Ye ye,” abalala ne bagamba nti, “Nedda, anaamufaanana bufaananyi.” Kyokka ye nʼabagamba nti, “Ye nze ddala.”

¹⁰Bo kwe ku mubuuza nti, “Kale amaaso go gaazibuse gatya?”

¹¹Nʼabategeeza nti, “Omuntu ayitibwa Yesu, yatabula ettaka nʼalinsiiga ku maaso, nʼandagira nti, ‘Genda e Sirowamu onaabe.’ Ne ŋŋenda ne naaba, ne nsobola okulaba.”

¹²Ne bamubuuza nti, “Ali ludda wa?” Nʼaddamu nti, “Simanyi.”

¹³Awo ne batwala omusajja eyali omuzibe wʼamaaso eri Abafalisaayo.

¹⁴Olunaku olwo Yesu lwe yatabulirako ettaka nʼazibula omusajja oyo amaaso, lwali lwa Ssabbiiti.

¹⁵Abafalisaayo nabo ne babuuza omuntu oyo engeri gye yazibuka amaaso. Awo nʼababuulira ngʼagamba nti, “Yesu yatabula ettaka nʼalinsiiga ku maaso, ne naaba, kaakano ndaba.”

¹⁶Abamu ku bo ne bagamba nti, “Omusajja oyo Yesu teyava wa Katonda kubanga takwata Ssabbiiti.” Kyokka abalala ne bagamba nti, “Omuntu omwonoonyi ayinza atya okukola ebyʼamagero ebifaanana bwe bityo?” Ne wabaawo okwawukana kunene mu bo.

¹⁷Awo Abafalisaayo ne bakyukira omusajja eyali omuzibe wʼamaaso ne bamubuuza nti, “Omuntu oyo eyakuzibula amaaso olowooza wa ngeri ki?” Omusajja nʼaddamu nti, “Ndowooza nnabbi.”

¹⁸Ne batakkiriza nti Omusajja oyo yali muzibe, okutuusa lwe baayita abazadde be,

¹⁹ne bababuuza nti, “Ono mutabani wammwe? Era yazaalibwa nga muzibe wa maaso? Kale obanga bwe kiri kaakano asobola atya okulaba?”

²⁰Bakadde be ne baddamu nti, “Tumanyi ngʼoyo ye mutabani waffe era nga yazaalibwa muzibe wa maaso.

²¹Naye engeri gye yazibukamu amaaso tetugimanyi, era nʼeyamuzibula amaaso tetumumanyi. Wuuyo musajja mukulu mumwebuulize ajja kweyogerera.”

²²Ekyaboogeza batyo lwa kutya Bayudaaya. Kubanga Abayudaaya baali bamaze okuteesa nti Buli ayatula nti Yesu ye Kristo agobebwe mu kuŋŋaaniro.

²³Ekyo kye kyaboogeza nti, “Wuuyo musajja mukulu mumwebuulize.”

²⁴ⓓ Awo ate ne bongera okuyita omusajja eyali omuzibe wʼamaaso ne bamugamba nti, “Gulumiza Katonda, kubanga tumanyi omusajja oyo mwonoonyi.”

²⁵Omusajja nʼaddamu nti, “Oba mwonoonyi oba si mwonoonyi simanyi, wabula kye mmanyi kiri kimu nti Nnali muzibe wʼamaaso, naye kaakano ndaba.”

²⁶Kyebaava bamubuuza nti, “Kiki kye yakola? Amaaso yagazibula atya?”

²⁷Omusajja nʼaddamu nti, “Nabategeezezza dda ne mutawuliriza. Lwaki ate mwagala mbaddiremu? Nammwe mwagala kufuuka bayigirizwa be?”

²⁸Ne bamuvuma ne bamugamba nti, “Ggwe oli muyigirizwa we. Naye ffe tuli bayigirizwa ba Musa.

²⁹Ffe tumanyi nga Katonda yayogera ne Musa, naye oyo tetumanyi gyʼava.”

³⁰Ye nʼaddamu nti, “Kino kitalo, mmwe obutamanya gye yava ate nga nze yanzibula amaaso.

³¹Tumanyi nti Katonda tawulira balina bibi, naye awulira abo abamutya era abakola byʼayagala.

³²Ensi kasookedde ebaawo tewalabikangawo yali azibudde maaso ga muntu eyazaalibwa nga muzibe wa maaso.

³³Kale omuntu ono eyanzibula amaaso singa teyava wa Katonda ekyo teyandikisobodde.”

³⁴Awo ne bamuboggolera nga bagamba nti, “Ggwe eyazaalirwa mu bibi, ggwʼoyigiriza ffe?” Ne bamusindika ebweru.

³⁵Yesu nʼategeera nga bamusindise ebweru. Bwe yamusanga nʼamugamba nti, “Ggwe okkiriza Omwana wʼOmuntu?”

³⁶Omusajja nʼamubuuza nti, “Ssebo, yʼaluwa mmukkirize?”

³⁷Yesu nʼamugamba nti, “Omulabye, yewuuyo ayogera naawe.”

³⁸Omusajja nʼagamba nti, “Mukama wange, nzikiriza!” Nʼamusinza.

³⁹Awo Yesu nʼagamba nti, “Najja mu nsi okusala omusango, abatalaba balabe, ate naabo abalaba babe bazibe ba maaso.”

⁴⁰Abamu ku Bafalisaayo abaali bayimiridde awo bwe baawulira ebigambo ebyo ne bamubuuza nti, “Kyʼogamba nti naffe tuli bazibe ba maaso?”

⁴¹Yesu nʼabaddamu nti, “Singa mubadde bazibe ba maaso, temwandibadde na kibi. Naye kubanga mugamba nti Tulaba, ekibi kyammwe kyekiva kibasigalako.”