Yona 1:1-17 LGCB2014 - Bible AI

¹Awo Mukama nʼayogera ne Yona omwana wa Amittayi ngʼagamba

²nti, “Situka ogende e Nineeve mu kibuga ekyo ekinene obatuuseeko obubaka buno obubanenya, kubanga ebibi byabwe birinnye eno waggulu ne bintukako.”

³Naye Yona nʼadduka okuva mu maaso ga Mukama, nʼaserengeta okulaga e Talusiisi. Nʼaserengeta e Yopa gye yasanga ekyombo, nʼakirinnya okugenda e Talusiisi. Ngʼamaze okusasulira etikiti ye, nʼasaabala mu kyombo ekiraga e Talusiisi ngʼadduka okuva mu maaso ga Mukama.

⁴Awo Mukama nʼaleeta omuyaga ogwʼamaanyi ne gukunta ku nnyanja, nʼekyombo Yona mwe yali ne kyagala okusaanawo.

⁵Entiisa eyʼamaanyi nʼekwata abalunnyanja bonna, buli omu nʼakaabirira katonda we amuyambe, nga bwe basuula nʼemigugu egyʼebyamaguzi mu nnyanja bakendeeze ku buzito obwali mu kyombo.

⁵Mu kiseera ekyo, Yona yali mu tulo wansi mu ntobo yʼekyombo.

⁶Naye omugoba omukulu owʼekyombo nʼaserengeta gye yali nʼamugamba nti, “Oyinza otya okuba nga weebase? Situka okaabirire katonda wo, oboolyawo anaatukwatirwa ekisa nʼatulokola.”

⁷Awo abalunnyanja ne boogeraganya nti, “Mujje tukube obululu, tuvumbule omuntu yennyini avuddeko omutawaana guno.” Ne bakuba obululu, akalulu ne kagwa ku Yona.

⁸Abalunnyanja ne babuuza Yona nti, “Tubuulire, lwaki otuleetedde akabi akafaanana bwe kati, kiki kyʼokoze? Okola mulimu ki? Ova wa era oli wa nsi ki, nʼabantu bo be bʼani?”

⁹Yona nʼagamba nti, “Ndi Mwebbulaniya; era nsinza Mukama, Katonda wʼeggulu eyakola eggulu nʼensi.”

¹⁰Awo ne batya nnyo ne babuuza nti, “Kiki kino kyʼotukoze?” Kubanga baali bategedde nti yali adduka mu maaso ga Katonda nga bwe yali amaze okubategeeza.

¹¹Awo ne bamugamba nti, “Tukukole tutya ennyanja erongooke?” Kubanga ennyanja yali yeeyongera bweyongezi okufuukuuka.

¹²Nʼabagamba nti, “Munsitule munsuule mu nnyanja ennyanja eneeteeka, kubanga esiikuuse ku lwange.”

¹³Naye abalunnyanja ne bagezaako nnyo okugoba ku ttale, kyokka ne batayinza, kubanga omuyaga gwagenda gweyongera bweyongezi.

¹⁴Kyebaava bakaabirira Mukama ngʼabagamba nti, “Tukwegayiridde Ayi Mukama, totuleka kufa olwʼobulamu bwʼomusajja ono, era totuteekako musango olwʼomusaayi gwe nʼokufa kwe, kubanga oleese omuyaga olwʼesonga.”

¹⁵Awo ne basitula Yona ne bamusuula mu nnyanja eyali eyira. Amangwago omuyaga ne gusirika.

¹⁶Abasajja ne batya nnyo Mukama, ne bawaayo ekiweebwayo gyʼali ne beeyama obweyamo.

¹⁷Mukama yateekateeka ekyennyanja ekinene ennyo ne kimira Yona; Yona nʼamala mu kyennyanja ekyo ennaku ssatu emisana nʼekiro.