Yona 3:1-10 LGCB2014 - Bible AI

¹Awo ekigambo kya Mukama ne kijjira Yona omulundi ogwokubiri, nʼamugamba nti,

²“Genda mu kibuga ekinene Nineeve obalabule nʼobubaka buno bwe nkuwa.”

³Awo Yona nʼagondera Mukama nʼagenda e Nineeve. Nineeve kyali kibuga kya kitiibwa nnyo era nga kitwala ennaku ssatu okukibuna kyonna.

⁴Ku lunaku olwasooka Yona yatambula olunaku lwonna ngʼagenda alangirira nti, “Bwe waliyitawo ennaku amakumi ana, Nineeve kirizikirira.”

⁵Abantu bʼomu Nineeve ne bakkiriza Katonda, ne balangirira okusiiba ne beesiba ebibukutu, bonna okuva ku asinga ekitiibwa okutuuka ku asembayo okuba owa wansi.

⁶Amawulire gano bwe gaatuuka ku kabaka wʼe Nineeve, nʼayimuka ku ntebe ye eyʼobwakabaka, ne yeeyambulamu ekyambalo kye, ne yeesiba ekibukutu, nʼatuula mu nfuufu.

⁷Kabaka teyakoma awo, wabula nʼayisa nʼetteeka nʼalibunya Nineeve yonna nga ligamba nti, “Tewaba muntu yenna, wadde ensolo oba eggana nʼekisibo, okukomba ku mmere wadde amazzi;

⁷Olwʼekiragiro kya kabaka nʼabakungu be:

⁸naye buli muntu nʼekisibo bibikkibwe nʼebibukutu, era bikaabirire nnyo Katonda, era birekeraawo okwonoona nʼokukola ebyʼobukambwe.

⁹Ani amanyi? Oboolyawo Katonda anaakyusa ku kibonerezo kye, kye yatusalira nʼakkakkanya obusungu bwe nʼatatuzikiriza.”

¹⁰Awo Katonda bwe yalaba kye bakoze, ne baleka nʼebibi byabwe, nʼabasonyiwa nʼatabatuusaako kibonerezo, kye yali agambye okubatuusaako.