Yona 4:1-11 LGCB2014 - Bible AI

¹Naye Yona nʼanyiiga nnyo.

²Nʼalyoka yeemulugunyiza Katonda nʼamugamba nti, “Kino ddala kye nalowooza, Mukama, bwe nnali mu nsi yʼewaffe, lwe wasooka okuŋŋamba okujja eno. Kye kyanzirusa nʼokunzirusa okugenda e Talusiisi; kubanga namanya nti ggwe oli Katonda ajjudde obulungi, alwawo okusunguwala, alina ekisa ekingi, era namanya nti ojja kwanguwa okukyusa entegeka zo ezʼokuzikiriza abantu bano.

³Kale nno nkwegayiridde Mukama nzita; okufa kisinga okuba omulamu.”

⁴Awo Mukama nʼagamba nti, “Olina ekituufu kwʼosinziira okunyiiga?”

⁵Awo Yona nʼafuluma ebweru wʼekibuga nʼabeera ku luuyi lwakyo olwʼebuvanjuba, era ne yeekolerawo akasiisira mu makoola, nʼalinda alabe ekinatuuka ku kibuga.

⁶Ebikoola byʼakasiisira bwe byʼawotoka olwʼomusana, Mukama nʼategeka ekiryo ne kimera mangu amakoola gaakyo ne gabikka ku mutwe gwa Yona ne gakendeeza ku musana. Yona nʼasanyuka nnyo olwʼekiryo.

⁷Naye ate enkeera Katonda nʼaleeta ekiwuka, ne kirya ekiryo ne kikala ne kifa.

⁸Ngʼenjuba yeewanise, Katonda nʼalyoka alagira embuyaga eyʼEbuvanjuba eyʼolubugumu okufuuwa Yona, omusana ne gumwokya nnyo mu mutwe okutuusa lwe yazirika. Nʼayagala afe. Nʼayogera nti, “Okufa kusinga okuba omulamu.”

⁹Mukama nʼalyoka amubuuza nti, “Olina ekituufu kwʼosinziira okunyiiga olwʼekiryo ekikaze ne kifa?” Yona nʼaddamu nti, “Yee, kituufu nze okunyiiga ennyo nʼokwegomba okufa.”

¹⁰Mukama nʼamugamba nti, “Osaalirwa olwʼekibikka kyo ekyonoonese songa si ggwe wakimeza, ate nga kyo kyali kya kiseera buseera.

¹¹Kale lwaki nange sandisaasidde Nineeve, ekibuga ekyo ekinene nʼabantu baamu emitwalo ekkumi nʼebiri nʼokusingawo, nʼente zaakyo ennyingi bwe zityo, abantu abatasobola kwawula kirungi na kibi?”