Yoswa 1:1-18 LGCB2014 - Bible AI

¹Awo Musa omuweereza wa Mukama bwe yamala okufa, Mukama nʼagamba Yoswa mutabani wa Nuuni, eyali omubeezi wa Musa nti,

²“Musa omuweereza wange afudde, kale kaakano weeteeketeeke osomoke omugga guno Yoludaani ggwe awamu nʼabantu bano bonna mulyoke muyingire mu nsi eno gye mbawa mmwe abaana ba Isirayiri[1].

³ⓐ Nga bwe nasuubiza Musa, buli we munaalinnyanga ekigere, mbawaddewo.

⁴Mbawadde ekitundu ekyo kyonna okuviira ddala ku ddungu ne ku Lebanooni, okutuuka ku mugga omunene, Fulaati, nʼensi eyʼAbakiiti nʼokutuukira ddala ku Nnyanja Ennene ebugwanjuba.

⁵Tewali nʼomu alisobola kubaziyiza ennaku zonna ezʼobulamu bwo; nga bwe nabeeranga ne Musa era bwe ntyo bwe nnaabeeranga naawe, sirikuleka wadde okukwabuulira.

⁶“Ddamu amaanyi, guma omwoyo; kubanga ggwe oligabira abantu bano ensi gye nasuubiza edda bajjajjaabwe.

⁷Ddamu amaanyi era beera muzira, byonna byʼokola obyesigamye ku mateeka omuweereza wange Musa ge yakulagira; togaviirangako ddala, oleme okukyama ku mukono ogwa ddyo oba ogwa kkono olyoke obenga omuwanguzi buli gyʼonoogendanga.

⁸Ekitabo kino ekyʼamateeka tekikuvanga mu kamwa, okifumiitirizangako emisana nʼekiro olyoke oteekenga mu nkola ebyo bye kikulagira era bwʼotyo bwʼoneefunira obuwanguzi nʼokukulaakulana.

⁹Si nze nkulagidde? Noolwekyo ddamu amaanyi, guma omwoyo, totya era toterebuka kubanga Mukama Katonda wo anaabanga naawe buli gyʼonoogendanga.”

¹⁰Bwʼatyo ne Yoswa nʼalagira abakulembeze bʼAbayisirayiri nti,

¹¹“Muyite mu lusiisira lwonna nga mutegeeza abantu bonna nti, ‘Mwesibire entanda kubanga mu nnaku ssatu mulisomoka omugga guno Yoludaani mulyoke mugabane ensi Mukama Katonda wammwe gyʼabawa.’”

¹²ⓑ Yoswa nʼagamba abʼekika kya Lewubeeni, nʼabʼekika kya Gaadi nʼekitundu kyʼekika kya Manase nti,

¹³“Mujjukire omuweereza wa Mukama Musa kye yabalagira ngʼagamba nti, ‘Mukama Katonda wammwe abawa ekifo ekyʼokuwummuliramu era alibawa ensi eno.’

¹⁴Bakazi bammwe, nʼabaana bammwe abato balisigala wano awamu nʼamagana gammwe mu kitundu kino Musa kye yabawa edda ebuvanjuba wʼomugga Yoludaani. Naye abasajja bammwe enkwatangabo nga bambalidde ebyokulwanyisa, bateekwa okubakulemberamu nʼokubalwanirira,

¹⁵okutuusa baganda bammwe abo nabo Mukama lwʼalibawa ensi eyo nʼabatebenkeza. Nʼoluvannyuma mulikomawo mu kitundu kino Musa omuweereza wa Mukama kye yabawa emitala wa Yoludaani okwolekera ebuvanjuba.”

¹⁶Awo ne baanukula Yoswa nti, “Byonna byʼotukalaatidde tunaabikola era tunaagenda yonna gyʼonootusindika.

¹⁷Nga bwe twagonderanga Musa mu byonna naawe bwe tunaakugonderanga tutyo; Mukama Katonda wo abeerenga naawe nga bwe yabeeranga ne Musa.

¹⁸Buli anaajeemeranga ebigambo byo nʼatabiwuliriza anattibwanga. Ddamu amaanyi, guma omwoyo.”