Yoswa 10:1-43 LGCB2014 - Bible AI

¹Adonizedeki kabaka wa Yerusaalemi bwe yawulira nga Yoswa awambye Ayi era ngʼakizikiririzza ddala nga bwe yakola Yeriko ne kabaka waayo, era bwe yawulira nti abantu bʼomu Gibyoni bakoze endagaano yʼemirembe nʼAbayisirayiri era nga kaakano babeera nabo,

²Adonizedeki nʼatya nnyo kubanga Gibyoni kyali kibuga gagadde ngʼebibuga bya bakabaka bwe byali, nga kisingira ddala Ayi ate nga nʼabasajja baamu bakirimaanyi.

³Bwʼatyo Adonizedeki kabaka wa Yerusaalemi nʼatumira bakabaka bano: Kokamu owʼe Kebbulooni, ne Piramu owʼe Yalamusi, ne Yafiya owʼe Lakisi ne Debiri owʼe Eguloni nʼabagamba nti,

⁴“Mujje munziruukirire tuzikirize ekibuga Gibyoni kubanga abantu baamu bakoze endagaano yʼemirembe ne Yoswa nʼAbayisirayiri.”

⁵Bwe batyo bakabaka abataano Abamoli, nʼowʼe Yerusaalemi, nʼowʼe Kebbulooni, nʼowʼe Yalamusi, nʼowʼe Lakisi nʼowe Eguloni ne beekobaana ne bayungula amaggye gaabwe ne bagakuluumulula ne balumba Gibyoni.

⁶Abasajja bʼomu Gibyoni ne batumira Yoswa mu lusiisira e Girugaali ne bamugamba nti, “Totulekulira basajja bo, yanguwako otudduukirire kubanga bakabaka bonna Abamoli ababeera eyo mu gasozi beekobaanye okututabaala.”[6]

⁷Bwʼatyo Yoswa nʼava e Girugaali nʼabasajja be abalwanyi ba nnamige.

⁸Mukama nʼagamba Yoswa nti, “Tobatya kubanga bonna mbagabudde mu mukono gwo, teri nʼomu ku bo anaalama.”

⁹Yoswa nʼabasajja be ne bakeesa obudde nga batambula okuva e Girugaali ne balyoka bagwa ku bʼAmoli ekiyiifuyiifu.

¹⁰Mukama nʼabaleetera okutya mu maaso gʼAbayisirayiri ne babatta olutta lunene nnyo e Gibyoni ne babafubutula okubambusa e Besukolooni, ne bagenda nga babatta okuyitira ddala e Azeka okutuuka e Makkeda.

¹¹Bwe baali badduka Abayisirayiri nga bavuunuka Besukolooni, Mukama nʼabasuulako amayinja amanene agʼomuzira okutuukira ddala mu Azeka; abaafa omuzira ne baba bangi okusinga nʼabattibwa Abayisirayiri.

¹²Yoswa nʼagamba Mukama ku lunaku olwo Abayisirayiri lwe battirako Abamoli, nga nʼAbayisirayiri bonna bawulira nti, “Ggwe enjuba, yimirira butengerera waggulu wa Gibyoni, naawe omwezi kola bwʼotyo waggulu wʼekiwonvu Ayalooni.”

¹³ⓜ Enjuba nʼomwezi ne bikola nga bwe babiragidde okutuusa Abayisirayiri lwe baamala okuseseggula abalabe baabwe. Enjuba nʼeyimirira butengerera ku ggulu nʼeteva mu kifo okumala olunaku lulamba.

¹³Bino byonna byawandiikibwa mu kitabo kya Yasali.

¹⁴Tewali lunaku lwali lubadde nga luno, Mukama okuwulira omuntu obwenkaniddaawo; Mukama yalwanirira nnyo Isirayiri.

¹⁵Oluvannyuma lwʼebyo Yoswa nʼAbayisirayiri ne bakomawo ne basiisira e Girugaali.

¹⁶Bakabaka bali abataano ne badduka ne beekukuma mu mpuku e Makkeda.

¹⁷Ne bagamba Yoswa nti, “Bakabaka abataano bazuuliddwa, beekwese mu mpuku.”

¹⁸Yoswa nʼalagira nti, “Muyiringise agayinja aganene mugateeke ku mumwa gwʼempuku era mufuneeyo nʼabasajja bagikuume;

¹⁹naye mmwe abalwanyi temubeerawo wabula mugobe abalabe bammwe, temubaganya kuyingira mu bibuga byabwe, kubanga ebyo Mukama Katonda wammwe abibawadde.”

²⁰Awo Yoswa nʼAbayisirayiri bwe baamala okutta abalabe baabwe olutta ssinziggu olubamalirawo ddala, abo abaali basigaddewo baddukira mu bibuga ebiriko ebigo,

²¹olwo abantu bonna ne bakomawo mirembe eri Yoswa mu lusiisira e Girugaali. Teri muntu yaddayo kwogerera Bayisirayiri mafuukuule.

²²Oluvannyuma Yoswa nʼabagamba nti, “Mugguleewo omumwa gwʼempuku mundeetere bakabaka abo abataano.”

²³Ne bakola nga bwalagidde ne bamuleetera kabaka wʼe Yerusaalemi, nʼowʼe Kebbulooni, nʼowʼe Yalamusi, nʼowʼe Lakisi nʼowʼe Eguloni.

²⁴Bwe baabamuleetera, Yoswa nʼakoowoola Abayisirayiri bonna, nʼalagira abaduumizi bʼeggye abaali naye nti, “Musembere wano kumpi, mulinnye ku nsingo za bakabaka bano.” Nabo ne basembera kumpi ne bakola nga bwʼabalagidde.

²⁵Yoswa nʼabagamba nti, “Temutya wadde okuterebuka, mube nʼamaanyi era nʼobuvumu kubanga eno yʼengeri Mukama gyʼanaakola abalabe bammwe be mulwana nabo.”

²⁶Yoswa bwe yamala okwogera ebyo nʼaddira bakabaka bali nʼabatta, emirambo gyabwe nʼagiwanika buli gumu ku muti okutuusiza ddala akawungeezi.

²⁷Enjuba bwe yamala okugwa Yoswa nʼalagira emirambo ne giwanulwa ku miti ne gisuulibwa mu mpuku bakabaka bano mwe basooka okwekukuma, ne bayiringisa agayinja aganene ne bagasaanikira ku mumwa gwʼempuku nʼokutuusa kaakano amayinja ago gakyaliko.

²⁸Ku lunaku olwo Yoswa nʼalumba Makkeda nʼakizikiriza ne kabaka waayo nʼamuttisa obwogi bwʼekitala, abaayo bonna nʼabazikiriza, kye yakola kabaka wʼe Yeriko era kye yakola nʼowʼe Makkeda.

²⁹Yoswa nʼAbayisirayiri bonna ne bava e Makkeda, ne bagenda e Libuna ne bakizinda,

³⁰era nakyo Mukama nʼakibawanguza, nʼatta abaakirimu bonna nʼobwogi bwʼekitala, tewali nʼomu gwe yalekawo. Kye yakola kabaka we Yeriko era kye yakola nʼowʼe Libuna.

³¹Yoswa nʼAbayisirayiri ne bava e Libuna ne bazinda Lakisi, ne bakyetooloola ne bakikuba.

³²Ku lunaku olwokubiri Mukama nʼakibawanguza, ne bazikiriza nʼekitala buli muntu yenna eyakirimu era nga bwe baakola e Libuna.

³³Kolamu kabaka wʼe Gezeri nʼagezaako okudduukirira Lakisi oyo naye Yoswa nʼamutta era nʼatalekaawo yadde nʼomu ku bantu be.

³⁴Yoswa nʼAbayisirayiri bonna bwe baava e Lakisi ne bagenda e Eguloni, ne bakyetooloola kyonna ne bakikuba.

³⁵Ku lunaku olwo lwennyini ne bazikiriza nʼobwogi bwʼekitala buli eyakirimu nga bwe baakola Lakisi.

³⁶Yoswa nʼAbayisirayiri bonna ne bava mu Eguloni ne bazinda Kebbulooni,

³⁷ne bakikuba; ne bazikiriza nʼekitala abantu baayo bonna era ne kabaka waabwe nʼobubuga bwamu bwonna nga bwe baakola mu Eguloni.

³⁸Yoswa nʼAbayisirayiri bonna ate ne bawetamu ne baddayo e Debiri ne bakikuba.

³⁹Ne bakiwamba ne bazikiriza nʼekitala kabaka waakyo nʼabantu baakyo bonna nʼobubuga bwakyo bwonna, era nga bwe baakola e Kebbulooni ne Libuna bwe baakola ne Debiri.

⁴⁰Bwʼatyo Yoswa nʼawangula ensi eyo yonna eyʼagasozi, nʼebiwonvu, nʼensenyi ne bakabaka baayo bonna, tewali kiramu na kimu kye yaleka nga Mukama Katonda wa Isirayiri bwe yamulagira.

⁴¹Yoswa nʼawangulira ddala okuva e Kadesubanea okutuuka e Gaaza mu nsi yonna eyʼe Goseni[7] okutuukira ddala e Gibyoni.

⁴²Nʼawamba bakabaka bano bonna nʼensi zaabwe mu lulumba lumu lwokka kubanga Mukama Katonda wa Isirayiri yalwanirira Isirayiri.

⁴³Awo Yoswa nʼAbayisirayiri bonna ne bakomawo mu lusiisira e Girugaali.