Yoswa 12:1-24 LGCB2014 - Bible AI

¹ⓞ Bano be bakabaka bʼensi Abayisirayiri be baawangula era bannyini nsi Abayisirayiri gye baatwala eri ebuvanjuba bwa Yoludaani, okuva ku kiwonvu ekya Alunoni okutuuka ku lusozi Kerumooni, ne Alaba yonna ku luuyi olwʼebuvanjuba.

²Sikoni kabaka wʼAbamoli eyafuga mu Kesuboni, okuva ku Aloweri, ekiri ku mabbali gʼekiwonvu ekya Alunoni, nʼekibuga ekiri wakati mu kiwonvu, nʼekitundu ekya Gireyaadi, okutuuka ku mugga Yabboki, yʼensalo yʼabaana ba Amoni; kino ngʼogasseeko nʼekitundu Gireyaadi,

³ne Alaba okutuuka ku nnyanja Kinnerosi, ku luuyi olwʼebuvanjuba, ne ku Nnyanja ya Araba yʼEnnyanja eyʼOmunnyo ku luuyi olwʼebuvanjuba mu kkubo eryʼe Besuyesimosi, ne ku luuyi olwʼobukiikaddyo wansi wʼolusozi Pisuga,

⁴ne ku nsalo ya Ogi kabaka wʼe Basani, omu ku baasembayo ku ba Balefa eyafuganga mu Asutaloosi ne mu Ederei.

⁵Era ye yali afuga olusozi Kerumooni ne Saleka ne Basani yenna okutuuka ku nsalo eyʼAbagesuli, nʼAbamaakasi, nʼekitundu kya Gireyaali, ensalo ya Sikoni kabaka we Kesuboni.

⁶Musa omuweereza wa Mukama nʼabaana ba Isirayiri babawangula, era ensi yaabwe Musa omuweereza wa Mukama nʼagiwa Abalewubeeni, nʼAbagaadi nʼekitundu kyʼekika kya Manase.

⁷Bano be bakabaka bʼensi, Yoswa nʼabaana ba Isirayiri be baawangula ku luuyi lwʼebugwanjuba olwa Yoludaani okuva ku Baalugadi mu kiwonvu kya Lebanooni okutuuka ku lusozi Kalaki okwambuka okutuuka e Seyiri. Yoswa yagiwa ebika bya Isirayiri bigigabane nga bwe byali byayawulwamu.

⁸Mu nsi eyʼensozi, ne mu nsi eyʼensenyi ne mu Alaba ne ku bitundu ebya wansi ku nsozi, ne mu ddungu ne mu nsi eyʼobugwanjuba mu Negevu, ensi ezʼAbakiiti, nʼAbamoli, nʼAbakanani, nʼAbaperezi, nʼOmukiivi, nʼOmuyebusi.

⁹Kabaka wʼe Yeriko omu, ne kabaka wʼe Ayi ekiriraanye Beseri — omu,

¹⁰ne kabaka wʼe Yerusaalemi omu, ne kabaka wʼe Kebbulooni — omu,

¹¹ne kabaka wʼe Yalamusi omu, ne kabaka wʼe Lakisi — omu,

¹²nʼowʼe Egulooni omu, nʼowʼe Gezeri — omu,

¹³ne kabaka wʼe Debiri omu, nʼowʼe Gederi — omu,

¹⁴nʼowʼe Koluma omu, nʼowʼe Yaladi — omu,

¹⁵nʼowʼe Libuna omu, nʼowʼe Adulamu — omu,

¹⁶nʼowʼe Makkeda omu, nʼowʼe Beseri — omu,

¹⁷ne kabaka owʼe Tappua omu, nʼowe Keferi — omu,

¹⁸nʼowʼe Afeki omu nʼowʼe Lasaloni — omu,

¹⁹nʼowʼe Madoni omu, nʼowʼe Kazoli — omu,

²⁰ne kabaka wʼe Simuloni Meroni omu, ne kabaka wʼe Akusafu — omu,

²¹nʼowʼe Taanaki omu, nʼowʼe Megiddo — omu,

²²nʼowʼe Kedesi omu, ne kabaka wʼe Yokuneamu ku Kalumeeri — omu,

²³ne kabaka wʼe Doli ku lusozi Doli omu, ne kabaka wʼe Goyiyimu mu Girugaali[8] — omu,

²⁴nʼowʼe Tiruza — omu, bonna awamu bakabaka amakumi asatu mu omu.