Yoswa 17:1-18 LGCB2014 - Bible AI

¹Omugabo ne guweebwa ekika kya Manase kubanga ye yali omubereberye owa Yusufu. Makiri omubereberye wa Manase era kitaawe wa Gireyaadi yaweebwa Gireyaadi ne Basani, era yali mulwanyi muzira.

²Era emigabo ne giweeba abaana ba Manase abalala nga bwe baali bazaalibwa mu buli maka. Omugabo gwʼabaana ba Abiezeri, nʼogwʼabaana ba Kerika nʼabaana ba Asuliyeri nʼogwʼabaana ba Sekemu, nʼogwʼabaana ba Keferi, nʼogwʼabaana ba Semida be baana bonna aboobulenzi aba Manase omwana wa Yusufu ngʼamaka mwe baazaalibwa bwe gaali.

³Naye Zerofekadi mutabani wa Keferi mutabani wa Gireyaadi mutabani wa Manase teyazaala baana balenzi wabula bawala bokka era baali bayitibwa Maala ne Noowa, ne Kogula, ne Mirika ne Tiruza.

⁴Bano baagenda eri Eriyazaali kabona ne Yoswa omwana wa Nuuni nʼabakulu ne babagamba nti, “Mukama yalagira Musa okutuwa omugabo nga baganda baffe.” Yoswa kyeyava abawa ettaka nga Mukama bwe yalagira. Yabawa omugabo mu baganda bakitaabwe.

⁵Bwʼatyo Manase nʼafuna ebitundu kkumi ngʼoggyeko ensi ya Gireyaadi ne Basani ebiri emitala wa Yoludaani,

⁶kubanga abaana ba Manase abawala baafuna omugabo ngʼabaana be abalenzi. Ensi ya Gireyaadi yaweebwa abaana ba Manase abaali basigaddewo ne bagitwala.

⁷Nʼensalo ya Manase yava ku Aseri nʼetuuka ku Mikumesasi ebuvanjuba bwa Sekemu, nʼeyita ku bukiikaddyo nʼekka nʼetwaliramu abantu abaali mu Entappua.

⁸Ensi ya Tappua Manase nʼagitwala wabula Tappua ekibuga ekyali ku nsalo ya Manase abaana ba Efulayimu be baakigabana.

⁹Ensalo nʼekka nʼetuuka ku kagga Kana ku luuyi mu bukiikakkono obwʼomugga. Bino bye bibuga bya Efulayimu ebiri mu bibuga bya Manase, naye ensalo ya Manase yali mu bukiikakkono obwa kagga nʼekoma ku nnyanja.

¹⁰Efulayimu nʼatwala oluuyi olwʼomu bukiikaddyo ne Manase nʼatwala oluuyi olwʼomu bukiikakkono nʼensalo ye nʼekoma ku nnyanja mu bukiikakkono nʼetuuka ku Aseri ate ebuvanjuba nʼetuuka ku Isakaali.

¹¹Mu nsi ya Isakaali nʼeya Aseri, Manase nʼatwala Besuseani nʼebibuga byakyo ne Ibuleamu nʼebibuga byakyo nʼabaali mu Endoli nʼebibuga byakyo nʼabaali mu Doli nʼabaali mu Taanaki nʼebibuga byakyo, nʼabaali mu Megiddo nʼebibuga byakyo zʼensozi essatu.

¹²ⓦ Naye abaana ba Manase tebasobola kugobamu Bakanani kubanga baali bamaliridde okusigala mu nsi eyo.

¹³Naye abaana ba Isirayiri bwe beeyongera amaanyi ne bafuula Abakanani abaddu baabwe abʼokubakozesanga emirimu, ne batabeegoberako ddala.

¹⁴Abaana ba Yusufu[12] ne boogera ne Yoswa nti, “Lwaki ffe otuwadde omugabo gumu nʼekitundu kimu ate nga tuli kika kinene? Mukama atuwadde nnyo omukisa.”

¹⁵Yoswa nʼabagamba nti, “Obanga muli kika kinene mugende mu nsi yʼAbaperezi nʼeyʼAbalefa mwesaayire ekibira, ensi eyʼensozi eya Efulayimu nga bwe tebamala.”

¹⁶Abaana ba Yusufu ne bagamba nti, “Ensi eyʼensozi tetumala; ate nga Abakanani bonna abali mu nsi eyʼekiwonvu nʼabali mu Besuseani nʼebibuga byakyo era nʼabali mu kiwonvu ekyʼe Yezuleeri balina amagaali agʼebyuma.”

¹⁷Yoswa nʼayogera eri ennyumba ya Yusufu, nʼeya Efulayimu nʼeya Manase nti, “Muli kika kinene era mulina amaanyi mangi temuliba na mugabo gumu gwokka,

¹⁸naye ensi eyʼensozi eribeera yammwe, newaakubadde nga ya kibira mulikisaawa okutuuka gye kikoma, kubanga muligobamu Abakanani newaakubadde nga balina amagaali agʼebyuma era nga baamaanyi.”