Yoswa 2:1-24 LGCB2014 - Bible AI

¹ⓒ Awo Yoswa mutabani wa Nuuni nʼatuma abasajja babiri okuva e Sittimu bagende mu kyama bakette, nʼabagamba nti, “Mugende mwekkaanye ensi eyo na ddala ekibuga Yeriko[2].” Bwe batyo ne bagenda. Bwe baatuukayo ne bayingira mu nnyumba yʼomukazi malaaya ayitibwa Lakabu ne basula omwo.

²Naye kabaka wa Yeriko nʼakitegeera nti waliwo abasajja Abayisirayiri abazze ekiro okuketta ensi ye.

³Bwʼatyo kabaka oyo nʼatumya ewa Lakabu nti, “Mu nju yo mulimu abasajja abazze okuketta ensi yange, bampeereze mangu.”

⁴Lakabu abasajja bano yali yamaze dda okubakweka, naye nʼalyoka agamba nti, “Kituufu abasajja abo baabaddeko wano naye saategedde gye baabadde bava.

⁵Oluggi lwʼekibuga bwe lwabadde lunaatera okuggalwawo akawungeezi, ne bafuluma, saategedde gye baalaze; naye mubawondere osanga munaabagwikiriza.”

⁶So nno yali yabakwese dda ku nju waggulu era nga ababisseeko bulungi ebikolokomba byʼobugoogwa.

⁷Basajja ba kabaka ne bafuluma ekibuga ne wankaaki waakyo naggalwawo. Ne banoonya abakessi okutuukira ddala ku mugga Yoludaani.

⁸Abakessi bwe baali tebanneebaka, Lakabu nʼayambuka gye baali ku nju waggulu

⁹nʼabagamba nti, “Nkimanyi nga Mukama abawadde ensi eno era nga ffenna tubatidde nnyo, tuweddemu nʼomwoyo.

¹⁰ⓓ Twawulira Mukama bwe yakaliza ennyanja emyufu nga muva e Misiri era twawulira bwe mwazikiriza Sikoni ne Ogi bakabaka bʼAbamoli emitala wʼomugga Yoludaani.

¹¹Amangwago nga twakakiwulira emitima gyatutyemuka, era teri nʼomu ku ffe yasigalamu ndasi, kubanga Mukama Katonda wammwe ye Katonda wʼomu ggulu ne mu nsi.”

¹²Nʼabagamba nti, “Nga nange bwe mbakoledde ebyekisa, mbasaba nammwe munkolere bwe mutyo nga mulayira mu linnya lya Mukama era mumpe nʼobukakafu

¹³nga mulitutaliza; nze, ne kitange, ne mmange, ne baganda bange, ne bannyinaze awamu nʼabo bonna be babeera nabo.”

¹⁴Abasajja abo ne baddamu nti, “Bwʼotolituloopa, naffe tulibawonya Mukama ngʼatuwadde ensi eno; era Mukama atuzikirize bwe tutalikola bwe tutyo.”

¹⁵Olwʼokubanga ennyumba ya Lakabu yazimbwa ku bbugwe wʼekibuga, bwʼatyo nʼabasizza ku muguwa ngʼabayisa mu ddirisa.

¹⁶Yabagamba nti, “Mugende mwekwekere ennaku ssatu eyo mu nsozi okutuusa ngʼababawenja bamaze okudda, oluvannyuma muyinza okwetambulira amakubo gammwe.”

¹⁷Ne bamugamba nti, “Tujja kukuuma butiribiri ekirayiro kyaffe

¹⁸era bwe tulitabaala ensi yammwe, osibanga omuguwa guno omumyufu mu ddirisa mwe watuyisa era okuŋŋaanyizanga mu nnyumba yo, kitaawo, ne nnyoko, bannyoko nʼabʼomu nnyumba ya kitaawo bonna.

¹⁹Gwe kalitanda nʼafuluma mu nju yo nʼatambulatambula mu nguudo, ekirimutuukako kyonna yʼalimanya. Kyokka alituukibwako akabi konna mu nju yo, ogwo guliba musango gwaffe.

²⁰Naye kʼolituloopa, olwo oliba omenye endagaano yaffe naawe.”

²¹Lakabu yʼabaddamu nʼabagamba nti, “Byonna bibeere nga bwe tukkaanyizza.” Bwe yamala okubasiibula nʼasiba akawero akamyufu mu ddirisa.

²²Abakessi bwe baamala okwekwekera ennaku ssatu mu nsozi nga nʼababanoonya bababuliddwa,

²³ne beddirayo eri Yoswa mutabani wa Nuuni ne bamuyitiramu mu byonna nga bwe byagenda.

²⁴Ne bamugamba nti, “Ddala ensi eyo Mukama agituwadde, abantu baamu bonna tubakubye encukwe.”