Yoswa 5:1-15 LGCB2014 - Bible AI

¹Awo bakabaka ba abʼAmoli abaali emitala ebugwanjuba bwʼomugga Yoludaani, ne bakabaka bʼAbakanani abaliraanye ennyanja bwe baawulira nga Mukama yakaliza amazzi gʼomugga Yoludaani Abayisirayiri basobole okusomoka, ne batekemuka omwoyo olwʼAbayisirayiri.

²Mu kiseera ekyo Mukama nʼagamba Yoswa nti, “Weekolere obwambe obwʼamayinja amoogi, okomole abasajja bonna Abayisirayiri abatakomolwanga.”

³Bwʼatyo Yoswa nʼakola obwambe mu mayinja amoogi nʼakomolera abasajja Abayisirayiri ku lusozi oluyitibwa Gibeyakalaloosi.

⁴Ensonga Yoswa kyeyava abakomola yʼeno: abasajja Abayisirayiri abaava e Misiri nga mwe muli nʼabalwanyi bonna, baafiira mu ddungu.

⁵Abaava e Misiri bonna baali bamaze okukomolebwa, kyokka abaana baabwe abaazaalirwa mu ddungu tebaali bakomole.

⁶ⓔ Abayisirayiri baamala emyaka amakumi ana nga batambula mu ddungu okutuusa bonna, nga mwe muli nʼabalwanyi, lwe baafa ne baggwaawo, kubanga baagaana okugondera eddoboozi lya Mukama era kyeyava abalayirira nti talibaganya kutuuka mu nsi eyo gye yasuubiza bajjajjaabwe, ensi ekulukuta amata nʼomubisi gwʼenjuki.

⁷Kale mu bifo byabwe Mukama yazzaawo baana baabwe era abo Yoswa be yakomola kubanga tebaakomolerwa mu kkubo.

⁸Bonna nga bamaze okukomolwa tebaava mu weema zaabwe mu lusiisira, okutuusa nga bamaze okuwona.

⁹Mukama nʼagamba Yoswa nti, “Okuva olwa leero mbaggyeeko ekivume kyʼe Misiri.” Ekifo ekyo kyekyava kiyitibwa Girugaali nʼokutuusa kaakano.

¹⁰ⓕ Awo Abayisirayiri bwe baali bakyasiisidde e Girugaali embaga eyʼOkuyitako nʼetuuka era ne bagirya akawungeezi ku lunaku olwʼekkumi nʼennya olwʼomwezi, mu lusenyi lwʼe Yeriko.

¹¹Enkeera ne balya emmere eyʼomu nsi yʼe Kanani: emigaati egitali mizimbulukuse nʼempeke ensiike.

¹²Okuva ku lunaku olwo lwe baalya ku mmere yʼomu Kanani tebaddamu kufuna Maanu; olwo ne batandika kulyanga mmere ya mu nsi eyo.

¹³Awo Yoswa bwe yali anaatera okutuuka e Yeriko bwe yayimusa amaaso nʼalaba omusajja akutte ekitala ekisowole ngʼamwolekedde. Yoswa kyeyava amusemberera nʼamubuuza nti, “Oli ku ludda lwaffe oba ku lwa balabe baffe?” Ye nʼamuddamu nti,

¹⁴“Siriiko ludda. Nze mukulu wʼeggye lya Mukama era ntuuse.” Yoswa nʼagwa wansi, nʼavuunama nʼamusinza era nʼamubuuza nti, “Mukama wange, oŋŋamba ki omuddu wo?”

¹⁵Naye omukulu wʼeggye lya Mukama nʼamuddamu nti, “Yambulamu engatto zo kubanga ekifo kino mwʼoli kitukuvu.” Ne Yoswa naye nʼakola nga bwe yalagirwa.