Yoswa 7:1-26 LGCB2014 - Bible AI

¹ⓘ Abayisirayiri ne basobya bwe baatwala ku bintu ebyali ebiwonge; Akani mutabani wa Kaluni muzzukulu wa Zabudi era muzzukulu wa Zeera owʼomu kika kya Yuda, ne yeetwalira ebimu ku bintu ebyo: bwʼatyo Mukama nʼasunguwalira nnyo eggwanga lya Isirayiri.

²Yoswa nʼasindika abasajja okuva e Yeriko bagende mu kitundu kye Ayi okuliraana Besaveni ebuvanjuba wa Beseri, nʼabakuutira nti, “Mugende mukette ensi eyo.” Nabo ne bagenda ne baketta Ayi.

³Ne bakomawo ne bategeeza Yoswa nti, “Tosindika bantu bangi kulumba Ayi wabula weerezaayo abantu nga enkumi bbiri oba ssatu be baba balumba. Toweerezaayo bantu bonna kubanga abʼomu Ayi si bangi.”

⁴Abayisirayiri ngʼenkumi ssatu ne boolekera Ayi, kyokka abasajja be Ayi ne babafubutula emisinde

⁵okubaggya ku wankaaki wʼekibuga okubatuusiza ddala emitala wa Sebalimu era Abayisirayiri ngʼamakumi asatu mu mukaaga ne battibwa. Entiisa ne buutikira Abayisirayiri; emitima ne gibayenjebuka.

⁶Yoswa nʼabakulembeze bʼAbayisirayiri ne bayuza ebyambalo byabwe ne beesiiga enfuufu mu mitwe gyabwe era ne beeyala ku ttaka mu maaso gʼEssanduuko ya Mukama okuzibya obudde.

⁷Yoswa nʼagamba nti, “Mukama Katonda nga kitalo kino! Wasomosezaaki Abayisirayiri omugga Yoludaani ate nʼobaleka bazikirizibwe Abamoli? Bwe twali tukyali emitala wa Yoludaani tetwaliko kabi nʼakatono!

⁸Ayi Mukama, Isirayiri adduse abalabe baabwe, nze nnaayogera ki kaakano!

⁹Abakanani nʼabali mu kitundu ekyo kyonna bwe banaakiwulira bajja kutwebungulula batusaanyeewo. Olwo erinnya lyo ekkulu bwe lityo liriba terikyavuga.”

¹⁰Mukama nʼagamba Yoswa nti, “Golokoka. Kiki ekikuvuunamizza ku ttaka?

¹¹Isirayiri eyonoonye kubanga bavudde ku ndagaano gye nabakuutira, ne batwala ku bintu ebiwonge, ne babitabika mu byabwe ate ne balimba.

¹²Ka mbabuulire, okuggyako nga muzikiriza omubi ali mu mmwe, Abayisirayiri tebayinza kwolekera balabe baabwe, babadduka buddusi, kubanga nsazeewo bazikirizibwe.

¹³“Golokoka otukuze abantu era obategeeze beetukuze nga beetegekera olwʼenkya bwʼatyo bwʼayogera Mukama, Katonda wa Isirayiri. Waliwo ebikwekeddwa mu mmwe; okuggyako nga mubikwekula temuyinza kuwangula balabe bammwe.

¹⁴“ ‘Enkya mujjire mu bika byammwe, buli kika Mukama kyʼanaalondamu kinaasembera luggya ku luggya, nʼoluggya Mukama lwʼanaalondamu lunajja nju ku nju, era enju Mukama gyʼanaalondamu enejja muntu ku muntu.

¹⁵Naye oyo anaasangibwa nʼebintu ebiwonge anaayokebwa mu muliro ye nʼebyo byonna byʼalina, kubanga amenye endagaano ya Mukama nʼavumaganya Isirayiri.’ ”

¹⁶Yoswa yakeera nnyo nʼakuŋŋaanya ebika byonna, yasookera ku kika kya Yuda era nʼasembeza enju ya Yuda:

¹⁷nʼalondamu abo abazaalibwa Zeera, ate mu nju ya Zeera nʼalondamu Zabudi nʼennyumba ye:

¹⁸ate mu bo nʼalondamu Akani omwana wa Kalumi, muzzukulu wa Zabudi, muzzukulu wa Zeera owʼomu kika kya Yuda.

¹⁹Yoswa nʼagamba Akani nti, “Mwana wange njagala oweese Mukama Katonda wa Isirayiri ekitiibwa era omugulumizise, ombuulire kyʼokoze, tonkisa.”

²⁰Akani nʼaddamu nti, “Mazima nayonoona eri Mukama Katonda wa Isirayiri era kino kye nakola.

²¹Bwe nalaba nga mu munyago mulimu ekyambalo ekirungi ekyava e Sinaali[3] nʼensimbi, nʼeffeeza ne zaabu ne mbyegomba, bwe ntyo ne mbitwala ne mbisimira mu ttaka mu weema yange.”

²²Yoswa nʼatuma ababaka mu weema ya Akani era ne babisangayo ngʼabisimidde mu ttaka.

²³Ne babifulumya ne babireeta eri Yoswa nʼAbayisirayiri bonna, ne babissa mu maaso ga Mukama.

²⁴Yoswa nʼAbayisirayiri bonna ne bakwata Akani muzzukulu wa Zeera ne bye yanyaga: effeeza, ne zaabu, nʼekyambalo. Ne bamutwala ne batabani be, ne bawala be, nʼente ze nʼendogoyi ze, nʼendiga ze, nʼeweema ye ne byonna bye yalina ne babiserengesa mu kiwonvu Akoli.

²⁵Yoswa nʼabuuza Akani nti, “Lwaki watuleetera ensasagge eno? Nga bwe wakola bwʼotyo olwa leero naawe onookiraba Mukama kyʼanaakukola.”

²⁵Abayisirayiri bonna ne bayiikira Akani, nʼabaana be nʼebintu bye ne babakuba amayinja ne babatta era ne babakumako omuliro.

²⁶Ne balyoka babatuumako amayinja, nʼokutuusa kaakano entuumu yʼamayinja eyo gagadde ekyaliwo. Mukama nʼalekera awo okukambuwalira Abayisirayiri, ekiwonvu mwe babattira kyekyava kiyitibwa Akoli nʼokutuusa kaakano.