Yoswa 8:1-35 LGCB2014 - Bible AI

¹Mukama nʼagamba Yoswa nti, “Totya era tokeŋŋentererwa, ddira abasajja bonna abalwanyi mulumbe ekibuga Ayi kubanga mbawadde obuwanguzi ku kyo. Kabaka, nʼabantu be, ne byonna ebiri mu kibuga Ayi mbibawadde.

²Ayi ne kabaka waakyo mu bayise nga bwe mwakola Yeriko, omunyago gwonna okuva mu Ayi ngubawadde. Mwekukume muteegere emabega wʼekibuga.”

³Yoswa nʼasituka nʼeggye lyonna okulumba Ayi, nʼalondamu abasajja abalwanyi abazira nnamige emitwalo esatu nʼabasindika kiro okulumba Ayi.

⁴Nʼabakuutira nti, “Mugende mwekukume kumpi nʼekibuga era muteegere abantu baamu emabega waakyo. Temugenda wala nakyo mwenna mube beetegefu.

⁵Nze nʼabalwanyi abalala tujja kwolekera ekibuga, bwe banaatufubutula ngʼolulala, tujja kuddukira ddala

⁶tubatwalirize ewala okuva ku kibuga, tubalowoozese nti, tubadduse. Ffe tujja kuddukira ddala tubabuleko.

⁷Olwo mulyoke mufubutuke gye mwekwese, muwambe ekibuga kubanga Mukama ajja kukibawa mukiwangule.

⁸Kasita mukiyingira nga mukikumako omuliro. Mukole nga Mukama bwʼalagidde. Ebyo bye mbakuutidde.”

⁹Yoswa nʼabasindika ne bagenda beekweka wakati wa Beseri ne Ayi ebugwanjuba wʼekibuga Ayi. Ekiro ekyo Yoswa yakimala nʼAbayisirayiri abalala.

¹⁰Yoswa yakeera nnyo mu makya ne yeekebejja abalwanyi be, oluvannyuma ye nʼabakulembeze bʼAbayisirayiri ne boolekera Ayi.

¹¹Abasajja bonna abalwanyi ne basemberera ekibuga era ne bakuŋŋaanira mu maaso gʼekibuga Ayi mu bukiikakkono bwakyo, ngʼekiwonvu kye kibaawula.

¹²Yoswa nʼaddira abalwanyi ngʼenkumi ttaano ne bateegera wakati wa Beseri ne Ayi ebuvanjuba wʼekibuga.

¹³Ekibinja kyʼabalwanyi ekisinga obunene ne kikuŋŋaanira mu bukiikakkono wʼekibuga ate ekibinja ekizibizi ne kikuŋŋaanira ebugwanjuba wʼekibuga. Naye ye Yoswa ekiro ekyo yasula mu kiwonvu.

¹⁴Mu makya kabaka wa Ayi nʼabantu be olwalengera Abayisirayiri ne bafubutuka okugenda okubalwanyisa awo okwolekera Alaba, naye tebaamanya nti waaliwo Abayisirayiri abalala abaali babeekwekeredde emabega wʼekibuga.

¹⁵Yoswa nʼekibinja kyʼAbayisirayiri be yali nabo ne beefuula ngʼabawanguddwa ne badduka nga boolekedde eddungu.

¹⁶Abantu bonna abaali mu kibuga ne bakoowoolwa okugoba Abayisirayiri, ne babagobera ddala era ne babawereekereza wala nnyo nʼekibuga.

¹⁷Tewali musajja nʼomu yasigala mu Ayi oba Beseri, ekibuga kyonna baaleka kiggule nga bagenze okugoba Abayisirayiri.

¹⁸Mukama nʼagamba Yoswa nti, “Galula omuwunda gwo ngʼogwolekeza Ayi, kubanga ojja kukiwangula.” Bwʼatyo Yoswa nʼagalula omuwunda gwe eri Ayi.

¹⁹Amangwago ngʼagaludde omuwunda abaali beekwese ne bafubutukayo ne besogga ekibuga era amangwago ne bakikoleeza omuliro.

²⁰Abasajja bʼomu Ayi bagenda okukebuka ngʼekibuga kyabwe kinyooka omukka nga tebakyasobola kudda mabega wadde okugenda mu maaso.

²¹Yoswa nʼabasajja be bwe baalaba nga bannaabwe beesozze ekibuga era ne bakyokya, kwe kukyukira abaali babagoba ne babatta ebitagambika.

²²Abayisirayiri abaayokya ekibuga nabo ne bavaayo ne bafuumbikiriza abasajja bʼomu Ayi ne babatta obutalekaawo nʼomu.

²³Naye ye kabaka wʼe Ayi baamuwamba ne bamuleetera Yoswa.

²⁴Abayisirayiri bwe baamala okutta abantu bʼomu Ayi abaali babagoberedde mu ddungu, ne balyoka bakomawo mu kibuga kya Ayi ne batta abantu bonna abaakirimu.

²⁵Abasajja nʼabakazi abattibwa ku olwo bonna baali omutwalo gumu mu enkumi bbiri.

²⁶Yoswa bwe yagalula omuwunda gwe okugwolekeza ekibuga Ayi teyagussa wansi okutuusa ngʼabaamu bonna bamaze okuzikirizibwa.

²⁷Ente nʼebintu ebirala bye baasanga mu kibuga, Abayisirayiri ne babitwala okuba omunyago gwabwe nga Mukama bwe yakuutira Yoswa.

²⁸Yoswa nʼayokya Ayi era ne kifuuka kifunvu ne leero.

²⁹Ate nʼatta kabaka wa Ayi nʼamuwanika ku muti okutuusa akawungeezi lwe baawanulayo omulambo gwe ne bagusuula awo ku wankaaki wʼekibuga ne bagutuumako entuumu yʼamayinja era ekyaliyo ne kaakano.

³⁰ⓙ Oluvannyuma Yoswa nʼazimbira Mukama Katonda wa Isirayiri, ekyoto ku lusozi Ebali.

³¹Nga Musa omuweereza wa Mukama bwe yakuutira Abayisirayiri era nga bwe kyawandiikibwa mu kitabo kyʼamateeka ga Musa, “Ekyoto ekyʼamayinja agataabajjibwa muntu ngʼakozesa ekyuma.” Bwe kyaggwa ne batandika okukiweerako Mukama ebiweebwayo ebyokebwa nʼebiweebwayo olwʼemirembe.

³²Era nʼawandiikira eyo ku mayinja mu maaso gʼAbayisirayiri bonna, amateeka Musa ge yasooka okuwandiikira abaana ba Isirayiri.

³³ⓚ Abayisirayiri bonna nʼabakulembeze baabwe, abalamuzi, nʼabakungu ne bannaggwanga bonna abʼomu Isirayiri ne bayimirira eruuyi nʼeruuyi wʼEssanduuko okwolekera bakabona Abaleevi abaasitulanga Essanduuko yʼEndagaano ya Mukama. Ne beegabanyaamu, ekitundu ekimu ne bayimirira mu maaso gʼolusozi Gerizimu, ate abalala ne bayimirira mu maaso gʼolusozi Ebali, nga Musa omuddu wa Mukama bwe yabalagira mu kusooka nti, “Kibagwanidde okusabira Abayisirayiri omukisa.”

³⁴Oluvannyuma Yoswa nʼabasomera ebigambo byonna ebyʼomu mateeka, emikisa nʼebikolimo nga byonna bwe byawandiikibwa mu Kitabo kyʼAmateeka.

³⁵Tewali kigambo na kimu Musa kye yalagira, Yoswa kyʼataasomera Bayisirayiri bonna, abaali bakuŋŋaanye abasajja nʼabakazi nʼabaana abato ssaako ne bannaggwanga be baabeeranga nabo.