Yuda 1:1-25 LGCB2014 - Bible AI

¹Nze, Yuda, omuddu wa Yesu Kristo, era muganda wa Yakobo, mpandiikira abaagalwa bonna abaayitibwa mu Katonda Kitaffe, era abakuumibwa Yesu Kristo.

²Ekisa kya Katonda, nʼemirembe, nʼokwagala byeyongerenga mu mmwe.

³Abaagalwa, nnali neesunga nnyo okubawandiikira ku bulokozi bwaffe bwentyo nawalirizibwa okubawandiikira nga mbazzaamu amaanyi nga mbegayirira mulwanirire okukkiriza abatukuvu kwe baaweebwa omulundi ogumu.

⁴Waliwo abantu abajja mu bubba, abaawandiikwako edda nga baasalirwa omusango, abatatya Katonda abajerega ekisa kya Katonda waffe, ne bakiyisaamu amaaso, ne beegaana Yesu Kristo Mukama waffe, omu yekka.

⁵Naye njagala okubajjukiza nti newaakubadde nga byonna mubimanyi, nga olunaku lumu Mukama yalokola eggwanga nʼaliggya mu nsi yʼe Misiri, oluvannyuma nʼazikiriza abatakkiriza,

⁶ne bamalayika abataakuuma kitiibwa kyabwe ne badda mu kukola bye baayagala ne balekulira nʼebifo byabwe, abo Katonda yabasiba mu njegere nʼabassa mu kkomera eryʼekizikiza ekikutte gye balindiririra okusalirwa omusango.

⁷Temusaanye kwerabira bibuga ebya Sodomu ne Ggomola nʼebibuga ebyali bibiriraanye. Byonna byali bijjudde kwegomba okubi nʼobwenzi, nga nʼabasajja bakolaganako ebyʼensonyi. Ebibuga ebyo byazikirizibwa nʼomuliro, era byabonerezebwa nʼomuliro ogutaggwaawo bibeere ekyokulabirako gye tuli.

⁸Mu ngeri yʼemu abo abaloota bagwagwawaza omubiri, ate oludda ne banyooma obuyinza, ne bavvoola ne bamalayika.

⁹Kale newaakubadde nga Mikayiri, ye malayika asinga obukulu, naye bwe yali akaayana ne Setaani ku mulambo gwa Musa, teyamuvuma wabula yagamba bugambi nti, “Mukama akunenye!”

¹⁰Naye kale abantu bano bavvoola kye batategeera, era okufaanana ngʼensolo obusolo bakola buli kye baagala, era ebyo bibaleetedde okuzikirira.

¹¹Zibasanze abo! Kubanga bagoberera ekkubo lya Kayini, era bakola buli kye basobola okufunamu ensimbi okufaanana nga Balamu, era ne bajeemera Katonda nga Koola bwe yakola, noolwekyo balizikirizibwa.

¹²Abantu bano bwe bajja ne babeegattamu nga muli ku mbaga zammwe ezʼokumanyagana, baba ngʼamabala amabi, nga tebatya, nga beefaako bokka, nga bali ngʼebire ebitaliimu mazzi ebitwalibwa empewo; oba ngʼemiti egiwaatudde, egitaliiko bibala, egyafa emirundi ebiri, egyakuulibwa nʼemirandira;

¹³oba ngʼamayengo agʼoku nnyanja agasiikuuse, ebikolwa byabwe ne bibaswaza; oba ngʼemmunyeenye eziva mu kkubo lyazo, eziterekeddwa ekizikiza ekikutte ennyo ekyʼolubeerera.

¹⁴Enoka eyaliwo nga wayiseewo emirembe musanvu okuva ku Adamu, abantu bano yaboogerako ebyʼobunnabbi nti, “Mulabe Mukama ajja nʼabatukuvu be abangi ennyo.

¹⁵Alireeta abantu bonna mu maaso ge basalirwe omusango mu bwenkanya olwʼebikolwa byabwe bonna abatatya Katonda, bye baakola mu bugenderevu, nʼolwʼebigambo byonna ebizibu abakozi bʼebibi bye bamwogeddeko ebyʼobutatya Katonda.”

¹⁶Beemulugunya, era bakola buli kye beegomba, era nga boogerera waggulu ebigambo ebyʼokweraga; era olaba bassizzaamu omuntu ekitiibwa ngʼomanya nti Balina kye bamwagalako.

¹⁷Naye mmwe, abaagalwa, mujjukire abatume ba Mukama waffe Yesu Kristo ebigambo bye baayogera edda

¹⁸bwe baabagamba nti, “Mu nnaku ezʼoluvannyuma walijjawo abantu abalibasekerera, nga beegomba nga bwe baagala, nga batambulira mu bitasiimibwa Katonda.”

¹⁹Abo be bo abaleeta enjawukana, abʼomubiri obubiri era abatalina Mwoyo Mutukuvu.

²⁰Naye mmwe, abaagalwa, musaana okuzimba obulamu bwammwe nga bweyongera okuba obwʼamaanyi, nga mubuzimbira ku musingi ogwʼokukkiriza kwammwe okutukuvu, era nga musaba mu Mwoyo Mutukuvu,

²¹nga mwekuumira mu kwagala kwa Katonda, nga mwesunga okusaasira kwa Mukama waffe Yesu Kristo olwʼobulamu obutaggwaawo.

²²Mubeerenga ba kisa eri abo ababuusabuusa mu kukkiriza,

²³nʼabalala mufubenga okubawonya nga mubakwakkula mu nnimi zʼomuliro, nʼabalala mubatuuse eri Mukama nga muyita mu kubalaga ekisa ngʼaboonoonyi, wabula mukyawe ekyambalo, ekijjudde amabala agakiteekeddwako omubiri gwabwe.

²⁴Katonda asobola okubawanirira muleme okuva mu kkubo lye, era nʼokubatuusa mu maaso ge agʼekitiibwa nga temuliiko kamogo era nga mujjudde essanyu;

²⁵Katonda oyo omu yekka atulokola okuyita mu Yesu Kristo Mukama waffe, agulumizibwe era atenderezebwenga olwʼamaanyi ge nʼobuyinza bwe, okuva ku mirembe gyonna egyayita, ne kaakano era ne mu mirembe egitaliggwaawo! Amiina.