1Ya Mukulu wa Bayimbi; Zabbuli ya Dawudi Omusirusiru ayogera mu mutima gwe nti, “Tewali Katonda.” Boonoonefu, nʼempisa zaabwe mbi nnyo; tewali nʼomu akola kirungi.
2Katonda atunuulira abaana bʼabantu ngʼasinziira mu ggulu, alabe obanga mulimu mu bo abamutegeera era abamunoonya.
3Bonna bamukubye amabega ne boonooneka; tewali akola kirungi, tewali nʼomu.
4Aboonoonyi tebaliyiga? Basaanyaawo abantu bange, ngʼabalya emmere; tebafaayo kusaba Katonda.
5Balitya okutya okutagambika; kubanga Katonda alisaasaanya amagumba gʼabalabe be. Baliswazibwa kubanga Katonda yabanyooma.
6Singa obulokozi bwa Isirayiri bufuluma mu Sayuuni, Katonda nʼakomyawo emirembe eri abantu be, Yakobo asanyuka ne Isirayiri nʼajaguza.