Zabbuli 55:1-23 LGCB2014 - Bible AI

¹Ya Mukulu wa Bayimbi. Nʼebivuga ebyʼenkoba. Zabbuli ya Dawudi Owulirize okusaba kwange, Ayi Katonda, togaya kwegayirira kwange.

²Ompulire era onziremu, kubanga ndi mu buzibu, nga nsinda olwʼokweraliikirira okunene.

³Mpulira amaloboozi gʼabalabe bange; ababi bankanulidde amaaso ne banvuma nga bajjudde obusungu.

³

⁴Omutima gwange gulumwa nnyo munda yange; entiisa yʼokufa entuukiridde.

⁵Okutya nʼokukankana binnumbye; entiisa empitiridde.

⁶Ne njogera nti, Singa nnina ebiwaawaatiro ngʼejjiba, nandibuuse ne ŋŋenda mpummulako.

⁷“Nandiraze wala nnyo, ne mbeera eyo mu ddungu;

⁸Nandiyanguye ne ntuuka mu kifo kyange ekyʼokuwummuliramu, eteri kibuyaga na mpewo ekunta nʼamaanyi.”

⁹Mukama tabulatabula ennimi zʼababi, ozikirize enkwe zaabwe; kubanga ndaba obukambwe nʼokulwanagana mu kibuga.

¹⁰Beetooloola bbugwe waakyo emisana nʼekiro, ne munda mu kyo mujjudde ettima nʼebikolwa ebibi.

¹¹Obutemu nʼobussi obwa buli ngeri biri mu kibuga omwo. Buli lwʼoyita mu nguudo zaakyo osanga bulimba bwereere na kutiisibwatiisibwa.

¹²Singa omulabe wange yʼabadde anvuma, nandikigumiikirizza; singa oyo atakkiriziganya nange yʼannumbaganye nʼanduulira, nandimwekwese.

¹³Naye ggwe munnange, bwe tuyita, era mukwano gwange ddala!

¹⁴Gwe twabanga naye mu ssanyu ngʼabooluganda, nga tutambulira mu kibiina ekinene mu nnyumba ya Katonda.

¹⁵Okufa kubatuukirire, bakke emagombe nga bakyali balamu; kubanga bajjudde okukola ebibi.

¹⁶Naye nze nkoowoola Mukama Katonda, nʼandokola.

¹⁷Ekiro, ne mu makya ne mu ttuntu, ndaajana nga bwe nsinda; nʼawulira eddoboozi lyange.

¹⁸Amponyezza mu lutalo nga siriiko kintuseeko newaakubadde ngʼabannwanyisizza babadde bangi.

¹⁹Katonda oyo atudde ku ntebe ye ebbanga lyonna, aliwulira nʼababonereza abo abatakyusa makubo gaabwe era abatatya Katonda.

²⁰Agololera emikono gye ku mikwano gye; nʼamenya endagaano ye.

²¹Byʼayogera bigonvu okusinga omuzigo, so nga mu mutima gwe alowooza lutalo; ebigambo bye biweweera okusinga amafuta, so nga munda mu mutima gwe asowodde bitala byennyini.

²²Ebizibu byo byonna bireete eri Mukama, ajja kukuwanirira; kubanga talireka mutuukirivu kugwa.

²³Naye ggwe, Ayi Katonda, olisuula abakola ebibi mu kinnya ekyʼokuzikirira; era abatemu nʼabalimba bonna tebagenda kuwangaala kimu kyakubiri ekyʼobulamu bwabwe.

²³Naye nze, neesiga ggwe.