Zabbuli 68:1-35 LGCB2014 - Bible AI

¹Ya Mukulu wa Bayimbi. Oluyimba lwa Dawudi Katonda agolokoke, abalabe be basaasaane, nʼabo abamukyawa bamudduke.

²Ngʼempewo bwʼefuumuula omukka, naawe bafuumuule bwʼotyo; envumbo nga bwʼesaanuuka mu muliro, nʼabakola ebibi bazikirire bwe batyo mu maaso ga Katonda!

³Naye abatuukirivu basanyuke bajagulize mu maaso ga Katonda, nga bajjudde essanyu.

³

⁴Muyimbire Katonda, muyimbe nga mutendereza erinnya lye; mumuyimusize amaloboozi gammwe oyo atambulira mu bire. Erinnya lye ye Mukama, mujagulize mu maaso ge.

⁵Ye Kitaawe wʼabataliiko bakitaabwe, ye mukuumi wa bannamwandu; ye Katonda abeera mu kifo kye ekitukuvu.

⁶Katonda afunira abatalina we babeera ekifo ekyʼokubeeramu, aggya abasibe mu kkomera nʼabagaggawaza; naye abajeemu babeera mu bifo bikalu ddala.

⁶

⁷Ayi Katonda, bwe wakulembera abantu bo, nʼobayisa mu ddungu,

⁸ensi yakankana, eggulu ne lifukumula enkuba mu maaso ga Katonda; nʼolusozi Sinaayi ne lukankana awali Katonda, Katonda wa Isirayiri!

⁹Watonnyesa enkuba nnyingi ku nsi, Ayi Katonda; ensi yʼobusika bwo nʼogizzaamu obugimu bwe bwali nga buggweerera;

¹⁰abantu bo ne babeera omwo; era olwʼekisa kyo ekingi, Ayi Katonda, abaavu ne bafuna bye beetaaga okuva ku bugagga bwo.

¹¹Mukama yalangirira; ne babunyisa ekigambo kye; baali bangi ne boogera nti:

¹²“Bakabaka badduse nʼamaggye gaabwe; abantu ne bagabana omunyago.

¹³Balabe bwe banyirira nʼobugagga bwa ffeeza ne zaabu! Babikkiddwa ngʼejjuba bwe libikkibwa ebiwaawaatiro byalyo.”

¹⁴Ayinzabyonna yasaasaanya bakabaka, ne baba ngʼomuzira bwe gugwa ku Zalumoni.

¹⁵Ggwe olusozi olwʼekitiibwa, olusozi lwa Basani; ggwe olusozi olwʼemitwe emingi, olusozi lwa Basani!

¹⁶Lwaki otunuza obuggya ggwe olusozi olwʼemitwe emingi? Lwaki okwatirwa obuggya olusozi Katonda lwe yalonda okufugirako? Ddala okwo Mukama kwʼanaabeeranga ennaku zonna.

¹⁷Mukama ava ku lusozi Sinaayi nga yeetooloddwa amagaali enkumi nʼenkumi nʼajja mu kifo kye ekitukuvu.

¹⁸Bwe walinnyalinnya olusozi, ngʼabanyage bakugoberera; abantu ne bakuwa ebirabo nga ne bakyewaggula mwebali; bwʼatyo Mukama Katonda nʼabeeranga wamu nabo.

¹⁹Atenderezebwe Mukama, Katonda omulokozi waffe, eyeetikka emigugu gyaffe egya buli lunaku.

²⁰Katonda waffe ye Katonda alokola; era tuddukira eri Mukama Katonda okuwona okufa.

²¹Ddala, Katonda alibetenta emitwe gyʼabalabe be, kubanga ne mu bukadde bwabwe balemera mu bibi byabwe.

²²Mukama agamba nti, “Ndibakomyawo nga mbaggya mu Basani, ndibazza nga mbaggya mu buziba bwʼennyanja,

²³Mulyoke munaabe ebigere byammwe mu musaayi gwʼabalabe bammwe, nʼembwa zammwe zeefunire ebyokulya.”

²³

²⁴Ekibiina kyo kyʼokulembedde bakirabye, Ayi Katonda, balabye abali ne Katonda wange, era Kabaka wange, ngʼotambula okugenda mu watukuvu;

²⁵abayimbi nga bakulembedde, abʼebivuga nga bavaako emabega ne wakati waabwe nga waliwo abawala abakuba ebitaasa.

²⁶Mutendereze Katonda mu kibiina ekinene; mumutendereze Mukama, mmwe abakuŋŋaanye abangi Abayisirayiri.

²⁷Waliwo ekika kya Benyamini asinga obuto kye kikulembedde, ne kuddako ekibinja ekinene ekyʼabalangira ba Yuda, nʼabalangira ba Zebbulooni nʼabalangira ba Nafutaali.

²⁸Laga obuyinza bwo, Ayi Katonda, otulage amaanyi go, Ayi Katonda onyweze ebyo byʼotukoledde.

²⁹Bakabaka balikuleetera ebirabo olwa Yeekaalu yo eri mu Yerusaalemi.

³⁰Nenya ensolo enkambwe eyʼomu bisaalu, eggana lya ziseddume eriri mu nnyana zʼamawanga. Gikkakkanye ereete omusolo ogwa ffeeza. Osaasaanye amawanga agasanyukira entalo.

³¹Ababaka baliva e Misiri, ne Kuusi aligondera Katonda.

³²Muyimbire Mukama mmwe obwakabaka obwʼensi zonna. Mutendereze Mukama.

³³Oyo eyeebagala eggulu erya waggulu eryʼedda, eddoboozi lye eryʼamaanyi liwuluguma okuva mu ggulu.

³⁴Mulangirire obuyinza bwa Katonda, ekitiibwa kye kibuutikidde Isirayiri; obuyinza bwe buli mu bire.

³⁵Oli wa ntiisa, Ayi Katonda, mu kifo kyo ekitukuvu. Katonda wa Isirayiri, yawa abantu obuyinza nʼamaanyi.

³⁵Katonda atenderezebwe.