1Ya Mukulu wʼAbayimbi. Ku ddoboozi: “Mu Malanga gʼEndagaano.” Zabbuli ya Asafu ⓞ Wulira, Ayi Omusumba wa Isirayiri; ggwe akulembera Yusufu ngʼalunda ekisibo kyo; ggwe atudde ku ntebe eyʼobwakabaka mu bakerubi, twakire.
2Amaanyi go galabike mu Efulayimu, ne mu Benyamini ne mu Manase,[17] ojje otulokole.
3ⓟ Tukomyewo gyʼoli, Ayi Katonda, otutunuulize amaaso agʼekisa, otulokole.
4Ayi Katonda, Mukama owʼEggye, olituusa ddi okusunguwalira okusaba kwʼabantu bo?
5ⓠ Wabaliisa emmere ejjudde amaziga; nʼobanywesa ebikopo byʼamaziga musera.
6Otufudde ekyʼokusekererwa mu baliraanwa baffe, nʼabalabe baffe ne batuduulira.
7Tukomyewo gyʼoli, Ayi Mukama owʼEggye, otutunuulize amaaso go agʼekisa, tulokolebwe.
8ⓡ Waleeta omuzabbibu ngʼoguggya mu Misiri; nʼogobamu amawanga agaali mu nsi muno nʼogusimba.
9Wagulongooseza ettaka, ne gumera, emirandira ne ginywera bulungi, ne gwagaagala mu nsi.
10ⓢ Ekisiikirize kyagwo ne kibikka ensozi, nʼamatabi gaagwo ne gaba ngʼemivule egyʼamaanyi.
11Amatabi gaagwo ne gatuuka ku Nnyanja eya Wakati nʼamatabi gʼennyanja gaayo ne gatuuka ku Mugga Fulaati.
12ⓣ Kale wamenyera ki ebisenge byagwo, abayitawo bonna ne beenogera ebibala byagwo?
13Embizzi ezʼomu kibira zigwonoona, na buli nsolo eyʼomu nsiko egulya.
14ⓤ Tukyukire, Ayi Katonda owʼEggye, otunuulire ensi ngʼosinziira mu ggulu; olabirire omuzabbibu guno,
15Gwe wagwesimbira nʼomukono gwo ogwa ddyo, era ggwe weerondera omwana wo.
16Bagutemye, ne bagwokya omuliro; abakoze ekyo banenye mu bukambwe, obazikirize.
17Naye muwe amaanyi omusajja oyo gwʼoyagala era omwana oyo gwe weerondera.
18Bwe tutyo tuleme okukuvaako, nʼokukukuba amabega. Otuzzeemu amaanyi, naffe tunaakoowoolanga erinnya lyo.
19Otukomyewo gyʼoli, Ayi Mukama Katonda owʼEggye, otutunuulize amaaso go agʼekisa, tulyoke tulokolebwe.