Zeffaniya 1:1-18 LGCB2014 - Bible AI

¹Ekigambo kya Mukama ekyajjira Zeffaniya mutabani wa Kuusi, muzzukulu wa Gedaliya, muzzukulu wa Amaliya, muzzukulu wa Keezeekiya, mu mirembe gya Yosiya mutabani wa Amoni, Kabaka wa Yuda.

²“Ndizikiririza ddala byonna okuva ku nsi,” bwʼayogera Mukama.

³“Ndizikiriza abantu wamu nʼensolo; ndizikiriza ebinyonyi ebyʼomu bbanga nʼebyennyanja; ababi balisigaza ntuumu ya kafakalimbo; bwe ndimalawo abantu okuva ku nsi,”

³bwʼayogera Mukama.

⁴Ndigololera ku Yuda omukono gwange, era ne ku abo bonna abali mu Yerusaalemi; era ekitundu kya Baali ekifisseewo nʼennyumba ya Bakemali, bakabona abasinza ebifaananyi, ndibazikiriza okuva mu kifo kino,

⁵abo abavuunamira eggye eryʼomu ggulu ku nnyumba waggulu, ne balisinza nʼabo abalayira mu linnya lya Mukama, ate nga balayira ne mu linnya lya Malukamu,

⁶abo abadda emabega obutagoberera Mukama, wadde abo abatamunoonya newaakubadde okumwebuuzaako.

⁷Siriikirira awali Mukama Katonda, kubanga olunaku lwa Mukama luli kumpi. Mukama ategese ssaddaaka, era atukuzizza abagenyi be.

⁸Ku lunaku olwa ssaddaaka ya Mukama, ndibonereza abakungu nʼabaana ba Kabaka, nʼabo bonna abambadde ebyambalo ebitasaana.

⁹Awo ku lunaku olwo ndibonereza abo bonna abeewala okulinnya ku muziziko, nʼabo abajjuza ennyumba ya Mukama waabwe ebikolwa ebyʼobukambwe nʼobulimba.

⁹

¹⁰Ku lunaku olwo, bwʼayogera Mukama, eddoboozi eryʼokukaaba liriwulikika ku Mulyango ogwʼEbyennyanja, okukaaba okuva ku luuyi olwokubiri, nʼokubwatuka okunene okuva ku nsozi.

¹¹Mwekaabireko, mmwe abali mu matwale gʼakatale; abasuubuzi bammwe bonna zibasanze, nʼabo abeebinika ffeeza balizikirizibwa.

¹²Awo olulituuka mu biro ebyo ndimulisa Yerusaalemi nʼettabaaza nga nnoonya, mbonereze abo bonna abalagajjavu abali ngʼomwenge ogutanasengejjebwa, abalowooza nti Mukama talibaako ne kyʼakolawo.

¹³Obugagga bwabwe bulinyagibwa, nʼennyumba zaabwe zimenyebwemenyebwe. Ne bwe balizimba ennyumba tebalizituulamu, era balisimba ennimiro ezʼemizabbibu nazo tebalinywa wayini wamu.

¹⁴Olunaku lwa Mukama olukulu luli kumpi; ddala lunaatera okutuuka. Wuliriza! Omulwanyi alikaabira eyo ngʼaliko obuyinike bungi, nʼokukaaba ku lunaku lwa Mukama kujja kuba kungi nnyo.

¹⁵Olunaku olwo lunaku lwa busungu, lunaku lwa buyinike nʼokulaba ennaku, lunaku lwa mutawaana nʼokuzikirira, olunaku olwʼekikome nʼekizikiza, olunaku lwʼebire nʼekizikiza ekikutte ennyo;

¹⁶olunaku olwʼokufuuwa ekkondeere nʼokulangirira olutalo ku bibuga ebiriko ebigo nʼeri eminaala emigulumivu.

¹⁷Ndireeta, obuyinike ku bantu, batambule ngʼabazibe bʼamaaso, kubanga bakoze ebibi mu maaso ga Mukama, omusaayi gwabwe guliyiyibwa ngʼenfuufu, nʼebyenda byabwe bivundire kungulu.

¹⁸Effeeza yaabwe ne zaabu yaabwe tebiriyinza kubataasa ku lunaku olwʼobusungu bwa Mukama. Ensi yonna erizikirizibwa omuliro gwʼobuggya bwe, era alimalirawo ddala abo bonna abali mu nsi.