Zeffaniya 2:1-15 LGCB2014 - Bible AI

¹Mukuŋŋaane, weewaawo, mukuŋŋaane, mmwe eggwanga eritalina nsonyi,

²ekiseera ekyategekebwa nga tekinnatuuka, olunaku ne luba ngʼebisusunku ebifuumulibwa, obusungu bwa Mukama nga tebunnabatuukako, ngʼolunaku olwʼobusungu bwa Mukama terunnabatuukako.

³Munoonye Mukama, mmwe mwenna abawombeefu abʼomu nsi, abakola byʼalagira; munoonye obutuukirivu nʼobuwombeefu; mpozzi mulikwekebwa ku lunaku olwʼobusungu bwe.

⁴ⓐ Gaza kirirekebwawo, ne Asukulooni kiriba matongo: abantu ba Asudodi baligobebwamu mu ttuntu, ne Ekuloni kirisimbulibwa.

⁵Zibasanze mmwe ababeera ku lubalama lwʼennyanja, eggwanga eryʼAbakeresi! Ekigambo kya Mukama kikwolekedde, ggwe Kanani, ensi eyʼAbafirisuuti. Ndikuzikiriza so tewaliba asigalawo.

⁶Olubalama lwʼennyanja abʼAkeresi gye babeera luliba malundiro gʼabasumba nʼebisulo byʼendiga.

⁷Olubalama lwʼennyanja luliba lwa kitundu kyʼennyumba ya Yuda ekyasigalawo era we banaalundiranga, ne mu nnyumba za Asukulooni mwe banaagalamiranga akawungeezi. Mukama Katonda waabwe alibalabirira, nʼakomyawo obugagga bwabwe.

⁸ⓑ Mpulidde okuvuma kwa Mowaabu nʼokusekerera kwʼAbamoni kwe bavumye abantu bange ne batiisatiisa ensi yaabwe.

⁹Kale nga bwe ndi omulamu, bwʼayogera Mukama Ayinzabyonna, Katonda wa Isirayiri, ddala Mowaabu aliba nga Sodomu, nʼabaana ba Amoni nga Ggomola, ekifo emyennyango kye gyemala, nʼebirombe byʼomunnyo, amatongo agolubeerera. Balinyagibwa abantu bange abaliba basigaddewo, nʼekitundu kyʼeggwanga lyange ekifisseewo kiritwala ensi yaabwe.

⁹

¹⁰Eno yʼeriba empeera yaabwe olwʼamalala gaabwe, kubanga bavumye ne banyooma abantu ba Mukama Ayinzabyonna.

¹¹Mukama aliba wa ntiisa gye bali bwʼalizikiriza bakatonda bonna abʼensi. Amawanga gonna agʼoku mbalama zonna galimusinza, buli muntu ngʼasinziira mu nsi ye.

¹²Nammwe Abaesiyopiya, mulittibwa nʼekitala kyange.

¹³Aligololera omukono gwe ku bukiikakkono nʼazikiriza Obwasuli; nʼafuula Nineeve amatongo era ekikalu ngʼeddungu.

¹⁴Ente nʼendiga zinaagalamiranga wakati mu kyo, nʼensolo zonna eza buli kika: ekiwuugulu era ne nnamunnungu banaasulanga ku mpagi zaakyo. Amaloboozi gaabyo ganaawulikikanga mu madirisa; kafakalimbo ajjudde mu miryango, nʼemikiikiro egyʼemivule giryelulwa.

¹⁵Kino kye kibuga ekya kyetwala, ekyayogeranga mu mutima gwakyo nti, Nze we ndi, tewali mulala wabula nze: nga kifuuse bifulukwa, ekifo ensolo ezʼomu nsiko we zigalamira! Buli muntu akiyitako aneesoozanga nʼakinyoomoola.