Zekkaliya 11:1-17 LGCB2014 - Bible AI

¹Ggulawo enzigi zo ggwe Lebanooni, omuliro gwokye emivule gyo.

²Kaaba ggwe omuberosi, kubanga emivule gigudde! Emiti emirungi ennyo gyonoonese. Mukube ebiwoobe mmwe emyera gya Basani, kubanga ekibira ekikwafu kigudde.

³Wuliriza ebiwoobe byʼabasumba, amalundiro gaabwe amalungi gazikirizibbwa. Wuliriza okuwuluguma kwʼempologoma. Omuddo omulungi oguli ku Yoludaani guzikirizibbwa.

⁴Bwʼati bwʼayogera Mukama Katonda wange nti, “Lunda endiga zigejje ezinaatwalibwa okuttibwa.

⁵Abo abazigula bazitta ne batabaako musango. Nʼabo abazitunda ne bagamba nti, ‘Mukama atenderezebwe ngaggawadde!’ Abasumba baazo bennyini tebazikwatirwa kisa.

⁶Kubanga sikyaddayo kukwatirwa bantu ba nsi eno kisa,” bwʼayogera Mukama. “Ndiwaayo buli muntu okugwa mu mikono gya muliraanwa we, ne mu mikono gya kabaka we. Nabo balijooga ensi era sirigiwonya kuva mu mikono gwabwe.”

⁷Awo ne nunda ekisibo ekyateekebwateekebwa okuttibwa, okusingira ddala ezaali zijoogebwa. Ne ntwala emiggo gyʼabasumba ebiri, ogumu ne ngutuuma erinnya Kisa, omulala ne ngutuuma Kwegatta era ne ndiisa endiga.

⁸Mu mwezi gumu ne neegobako abasumba basatu, emmeeme yange ngʼebakyaye era nabo nga bankyaye.

⁹Awo ne ndyoka ŋŋamba nti, “Siibeere musumba wammwe, ekinaafa leka kife, ekyokwonooneka kyonooneke, era leka ebyo ebisigaddewo biryaŋŋane, buli kimu kirye kinnaakyo.”

¹⁰Ne ndyoka nkwata omuggo gwange Kisa ne ngumenya, ne mmenya endagaano gye nnali nkoze nʼabantu bonna.

¹¹Endagaano nʼagikomya ku lunaku olwo era abasuubuzi bʼendiga abaali bandaba ne bamanya nti ekyo kyali kigambo kya Katonda.

¹²ⓙ Ne ndyoka mbagamba nti, “Bwe kiba nga kisaanidde mu maaso gammwe mumpe empeera yange; naye obanga temusiimye mulekeeyo.” Awo ne bambalira ensimbi eza ffeeza amakumi asatu.

¹³Awo Mukama nʼaŋŋamba nti, “Zisuulire omubumbi,” omuwendo guno ogwʼekitalo gwe bansasula! Kale ne ntwala ensimbi amakumi asatu eza ffeeza ne nzisuulira omubumbi mu nnyumba ya Mukama.

¹⁴Awo ne mmenya omuggo gwange ogwokubiri Kwegatta, okulaga nti obumu obwali wakati wa Yuda ne Isirayiri bwali bukomye.

¹⁵Mukama nʼalyoka aŋŋamba nti, “Twala nate ebintu ebyʼomusumba omusirusiru bye yandikozesezza.

¹⁶Kubanga laba, nze nyimusizza omusumba mu nsi atafaayo ku ndiga ezizikirira era atanoonya zisaasaanye, era atayunga zimenyese wadde okuliisa ennamu, naye alya ensolo ensava ngʼaziyuzaako ebinuulo.

¹⁷‘Zimusanze omusumba wange ataliiko kyʼagasa agayaalirira ekisibo! Ekitala kifumite omukono gwe ogwa ddyo, kiggyemu nʼeriiso lye erya ddyo! Omukono gwe gukalire ddala, nʼeriiso lye erya ddyo lizibire ddala!’ ”