Zekkaliya 12:1-14 LGCB2014 - Bible AI

¹Kino kyʼekigambo kya Katonda ekikwata ku Isirayiri. Bwʼati bwʼayogera Mukama eyabamba eggulu era nʼassaawo emisingi gyʼensi, era nʼakola nʼomwoyo gwʼomuntu ogumulimu.

²“Laba ŋŋenda okufuula Yerusaalemi ekikompe ekitagaza amawanga gonna ageetoolodde enjuuyi zonna. Yuda awamu ne Yerusaalemi birizingizibwa.

³Awo ku lunaku olwo ndifuula Yerusaalemi ejjinja erizitowa eri amawanga gonna, agʼensi agalikuŋŋaana okukizingiza. Abo bonna abaligezaako okuliggyawo, balyetusaako ebisago.

⁴Ku lunaku olwo, bwʼayogera Mukama, ndikuba buli mbalaasi na buli muvuzi waayo ndimusuula eddalu. Ndikuuma ennyumba ya Yuda kyokka amaaso gʼembalaasi za bannaggwanga ndigaziba.

⁵Awo abakulembeze ba Yuda baligamba mu mitima gyabwe nti, ‘Abantu bʼomu Yerusaalemi ba maanyi, kubanga Mukama Katonda owʼEggye ye Katonda waabwe.’

⁶“Ku lunaku olwo ndifuula abakulembeze ya Yuda ngʼogusigiri ogwaka ogwetooloddwa enku, ngʼolumuli olwʼomuliro mu makkati gʼebisusunku. Balimalawo amawanga gonna agʼoku njuyi zonna, olwʼoku kkono nʼolwʼoku ddyo; naye Yerusaalemi kirisigalawo, nʼabantu baakyo mu kifo kyakyo awatali kunyeenyezebwa.

⁷“Mukama alisooka kununula weema za Yuda, ekitiibwa kyʼennyumba ya Dawudi, nʼekitiibwa kyʼabatuuze bʼomu Yerusaalemi kireme kusukka ku kya Yuda.

⁸Ku lunaku olwo Mukama aliteeka obukuumi ku batuuze bʼomu Yerusaalemi; abo abasembayo obunafu ku lunaku olwo babeere nga Dawudi, era ennyumba ya Dawudi ebeere ngʼennyumba ya Katonda, nga malayika wa Mukama abakulembeddemu.

⁹Ku lunaku olwo ndizikiriza amawanga gonna agalumba Yerusaalemi.

¹⁰ⓚ “Era ndifuka ku nnyumba ya Dawudi era ku batuuze ba Yerusaalemi Omwoyo owʼekisa nʼokwegayirira. Balintunuulira nze gwe baafumita: era balimukungubagira ngʼomuntu bwʼakungubagira omwana we omu yekka, era balimulumirwa nnyo omwoyo ngʼomuntu bwʼalumirwa mutabani we omubereberye.

¹¹Ku lunaku olwo okukuba ebiwoobe kuliyitirira mu Yerusaalemi okwenkana ngʼokwa Kadadulimmoni mu kiwonvu Megiddoni.

¹²Ensi erikungubaga, buli kika kyokka; ekika ekyʼennyumba ya Dawudi ne bakazi baabwe kyokka, nʼekika kyʼennyumba ya Nasani ne bakazi baabwe bokka;

¹³Ekika ekyʼennyumba ya Leevi ne bakazi baabwe, nʼekika kya Simeeyi ne bakazi baabwe;

¹⁴nʼebika byonna ebirala ebisigaddeyo ne bakazi baabwe.