Zekkaliya 2:1-13 LGCB2014 - Bible AI

¹Awo ne nnyimusa amaaso gange, ne ndaba, omusajja ngʼalina mu mukono gwe olukoba olupima.

²Ne mubuuza nti, “Ogenda wa?”

²Nanziramu nti, “Ŋŋenda kupima Yerusaalemi okulaba obuwanvu nʼobugazi bwakyo.”

³Awo malayika eyali ayogera nange nʼagenda, malayika omulala nʼamusisinkana.

⁴Nʼamugamba nti, “Dduka ogambe omuvubuka oyo nti, ‘Yerusaalemi kijja kuba ekibuga ekitaliiko bbugwe olwʼobungi bwʼabantu nʼebisibo ebinaabeeramu.

⁵Nze ndiba bbugwe owʼomuliro, okukyebungulula enjuuyi zonna era nze ndiba ekitiibwa kyakyo mu kyo,’ bwʼayogera Mukama.

⁶“Kale mudduke, mudduke ensi eyʼobukiikakkono mugiveemu,” bwʼayogera Mukama, “kubanga mbasaasanyizza ngʼempewo ennya ezʼeggulu bwe ziri,” bwʼayogera Mukama.

⁷“Mmwe Sayuuni mudduke, mudukke muwone mmwe ababeera mu buwaŋŋanguse mu Babulooni.”

⁸Kubanga bwʼati bwʼayogera Mukama owʼEggye nti, “Mukama nga bwʼampadde ekitiibwa nʼantuma eri amawanga agaabanyaganga, anaabakwatako anaaba akutte ku mmunye ya liiso lye.

⁹Kubanga laba ndyolesa omukono gwange gye bali, abaddu baabwe ne babanyaga. Olwo lwe mulimanya nga Mukama owʼEggye ye yantuma.

¹⁰“Yimba, osanyuke ggwe muwala wa Sayuuni, kubanga laba nzija era ndibeera wakati mu mmwe,” bwʼayogera Mukama.

¹¹“Era amawanga mangi galyegatta ku Mukama ku lunaku olwo, era balibeera bantu bange, era nange nnaabeeranga wakati mu ggwe, naawe onootegeera nga Mukama owʼEggye ye yantuma gyʼoli.

¹²Era Yuda aliba mugabo gwa Mukama mu nsi entukuvu, era aliddamu okwerondera Yerusaalemi.

¹³Musiriikirire, abantu mwenna mu maaso ga Mukama, kubanga asituse okuva mu kifo kye ekitukuvu.”