Zekkaliya 3:1-10 LGCB2014 - Bible AI

¹ⓑ Awo nʼanjolesa Yoswa, kabona asinga obukulu, ngʼayimiridde mu maaso ga malayika wa Mukama, ne Setaani ngʼayimiridde ku mukono gwe ogwa ddyo okumulumiriza.

²Mukama nʼagamba Setaani nti, “Mukama akunenye ggwe Setaani, weewaawo Mukama eyeerondedde Yerusaalemi akunenye! Omusajja ono si kisiki ekyaka ekigibbwa mu muliro?”

³Awo Yoswa yali ayimiridde mu maaso ga malayika ngʼayambadde ebyambalo ebijjudde ekko.

⁴Malayika nʼagamba abaali bayimiridde mu maaso ge nti, “Mumwambulemu ebyambalo bye ebijjudde ekko.”

⁴Nʼagamba Yoswa nti, “Laba nkuggyeeko ekibi kyo, era nnaakwambaza ebyambalo ebyʼomuwendo.”

⁵Ne njogera nti, “Mumusibe ekiremba ekitukula ku mutwe gwe.” Awo ne bamusiba ekiremba ekitukula ku mutwe, ne bamwambaza nʼengoye, nga malayika wa Mukama ayimiridde awo.

⁶Malayika wa Mukama nʼakuutira nnyo Yoswa ngʼayogera nti,

⁷“Bwʼati bwʼayogera Mukama owʼEggye nti, ‘Bwʼonootambuliranga mu makubo gange, era noonywezanga bye nkukuutira, kale, onoofuganga ennyumba yange era onoolamulanga mu mbuga zange, era ndikuwa ekifo obeere mu abo abayimiridde wano.

⁸“‘Kale wulira, Yoswa kabona asinga obukulu, ggwe ne banno abatuula mu maaso go, abantu kwʼotegeerera ebyʼomu maaso, laba ndireeta omuweereza wange, ye Ttabi.

⁹Kubanga laba, ku jjinja lye ntadde mu maaso ga Yoswa, ku jjinja erimu eririna amaaso omusanvu, laba nditeekako ebiwandiiko,’ bwʼayogera Mukama owʼEggye. ‘Mu lunaku lumu ndiggyawo ekibi kyʼensi eno.

¹⁰“‘Ku lunaku luli, buli omu ku mmwe, aliyita muliraanwa we okutuulako wansi wʼomuzabbibu gwe ne wansi wʼomutiini gwe,’ bwʼayogera Mukama owʼEggye.”