Zekkaliya 4:1-14 LGCB2014 - Bible AI

¹Awo malayika eyali ayogera nange nʼakomawo, nʼanzuukusa ngʼomuntu bwʼazuukusibwa mu tulo.

²Nʼambuuza nti, “Kiki kyʼolaba?”

²Ne muddamu nti, “Ndaba ekikondo kyʼettaala nga kyonna kya zaabu, nga waggulu kiriko nʼakabakuli kaakwo, nʼettaala zaakwo omusanvu, nga buli ttaala eriko omumwa gwayo.

³Era waliwo emiti emizeeyituuni ebiri ku mabbali gaakyo, ogumu ku mukono ogwa ddyo ogwʼakabakuli, nʼomulala ku mukono ogwa kkono.”

⁴Ne mbuuza malayika eyali ayogera nange nti, “Bino biki mukama wange?”

⁵Malayika eyali ayogera nange nʼaddamu nʼaŋŋamba nti, “Tobimanyi?” Ne muddamu nti, “Nedda mukama wange.”

⁶Awo nʼaddamu nʼaŋŋamba nti, “Kino kye kigambo kya Mukama eri Zerubbaberi: ‘Si lwa maanyi so si lwa buyinza naye lwa Mwoyo wange,’ bwʼayogera Mukama owʼEggye.

⁷“Ggwe olusozi olunene weyita ki? Mu maaso ga Zerubbaberi olibeera lusenyi, era alireeta ejjinja erya waggulu mu mizira nʼokwogerera mu ddoboozi eryʼomwanguka ngʼagamba nti, ‘Liweebwe omukisa, liweebwe omukisa!’ ”

⁸Awo ekigambo kya Mukama ne kinzijira nga kyogera nti,

⁹“Emikono gya Zerubbaberi gitaddewo omusingi gwa yeekaalu eno era girigumaliriza, era olitegeera nti Mukama owʼEggye ye yantuma gye muli.

¹⁰“Ani anyooma olunaku olwʼebintu ebitono? Abantu balijaguza, bwe baliraba ejjinja erigera mu mukono gwa Zerubbaberi. Gano omusanvu ge maaso ga Katonda agayitaayita mu nsi yonna.”

¹¹ⓒ Ne ndyoka mubuuza nti, “Emizeeyituuni gino ebiri ku mukono ogwa ddyo ne ku gwa kkono ogwʼekikondo kyʼettabaaza, gitegeeza ki?”

¹²Ne nnyongera okumubuuza nti, “Gano amatabi abiri agʼemizeeyituuni agaliraanye emidumu gya zaabu ge gayitamu amafuta aga zaabu?”

¹³Nʼanziramu nti, “Tobimanyi?” Ne njogera nti, “Nedda, mukama wange.”

¹⁴Awo nʼaddamu nti, “Abo be babiri abaafukibwako amafuta abaweereza Mukama owʼensi yonna.”