Zekkaliya 6:1-15 LGCB2014 - Bible AI

¹Ne nyongera okuyimusa amaaso gange, era laba, amagaali gʼembalaasi ana nga gava wakati wʼensozi bbiri, nʼensozi ezo zaali nsozi za bikomo.

²Eggaali esooka ngʼesikibwa embalaasi za lukunyu, eyookubiri nga nzirugavu.

³Eggaali eyokusatu ngʼesikibwa mbalaasi njeru, eyokuna yo ngʼesikibwa za kikuusikuusi atabikiddwamu nʼobwoya obweru. Embalaasi ezo zonna zaali zʼamaanyi.

⁴Ne ndyoka mbuuza malayika eyali ayogera nange nti, “Bino bitegeeza ki mukama wange?”

⁵Malayika nʼanziramu nti, “Ezo zʼempewo ennya ezʼomu ggulu; ziva kweyanjula mu maaso ga Mukama owʼensi yonna.

⁶Ekigaali ekyʼembalaasi enzirugavu kigenda mu nsi eyʼomu bukiikakkono, ate ekyo ekyʼenjeru mu bugwanjuba, ekyo ekyali kisikibwa embalaasi ezʼobwoya obweru, kiraga mu nsi eyʼomu bukiikaddyo.”

⁷Awo embalaasi ezo ezʼamaanyi nga zivudde mu maaso ga Mukama, ne zifuba okutambulatambula mu nsi yonna; nʼazigamba nti, “Mugende, mutambuletambule mu nsi yonna.” Awo ne zitambulatambula mu nsi yonna.

⁸Awo nʼampita nʼaŋŋamba nti, “Laba, ezo eziraga mu nsi eyʼobukiikakkono ziwummuzza Omwoyo wange mu nsi eyʼomu bukiikakkono.”

⁹Ekigambo kya Mukama ne kijja gye ndi nga kigamba nti,

¹⁰“Genda eri bano: Kaludayi, ne Tobiya, ne Yedaya, abaakomawo okuva mu buwaŋŋanguse mu Babulooni, olunaku olwo lwennyini olage mu nnyumba ya Yosiya, mutabani wa Zeffaniya, mwe bali.

¹¹Ddira effeeza ne zaabu okole engule ogitikkire ku mutwe gwa Yoswa, kabona asinga obukulu, omwana wa Yekozadaaki.

¹²ⓓ Mugambe nti, bwʼati bwʼayogera Mukama owʼEggye nti, ‘Laba omuntu erinnya lye ye Ttabi; alirokera mu kifo kye, azimbe yeekaalu ya Mukama.

¹³Oyo yʼalizimba yeekaalu ya Mukama, era alijjula ekitiibwa. Alituula ku ntebe ye eyʼobwakabaka, nʼafuga. Era yʼaliba Kabona ku ntebe ye eyʼobwakabaka; walibaawo okutegeeragana okwʼemirembe wakati wa Ttabi ne Yoswa.’

¹⁴Era nʼengule ya kubeera mu yeekaalu ya Mukama ngʼekijjukizo eri Keremu, ne Tobiya ne Keeni omwana wa Zeffaniya.

¹⁵Era nʼabo abali ewala balijja okuyamba okuzimba yeekaalu ya Mukama, era mulimanya nga Mukama owʼEggye yantuma gye muli. Bino tebirirema kubaawo singa munaagondera eddoboozi lya Mukama Katonda wammwe nʼobumalirivu.”