Zekkaliya 8:1-23 LGCB2014 - Bible AI

¹Ekigambo kya Mukama owʼEggye ne kinzijira nate nti,

²Bwʼati bwʼayogera Mukama owʼEggye nti, “Nkwatirwa Sayuuni obuggya, obuggya obungi obwʼekitalo.”

³Bwʼati bwʼayogera Mukama nti, “Ndikomawo mu Sayuuni, ndibeera wakati mu Yerusaalemi era Yerusaalemi kiriyitibwa ekibuga ekyesigwa, olusozi olwa Mukama owʼEggye, Olusozi Olutukuvu.”

⁴Bwʼati bwʼayogera Mukama owʼEggye nti, “Abakadde abasajja nʼabakazi bajja kuddamu okutuula mu nguudo za Yerusaalemi, nga buli omu akutte omuggo, olwʼobukadde.

⁵Nʼenguudo ezʼekibuga zirijjula abalenzi nʼabawala nga bazannya.”

⁶Bwʼati bwʼayogera Mukama owʼEggye nti, “Kirirabika ngʼekyʼekitalo mu maaso gʼabantu abo abaasigalawo mu nnaku ezo, naye nange gye ndi bwe kiriba?” bwʼayogera Mukama owʼEggye.

⁷Bwʼati bwʼayogera Mukama owʼEggye nti, “Laba ndirokola abantu bange abali mu nsi eyʼEbuvanjuba nʼabali mu nsi eyʼEbugwanjuba:

⁸Ndibakomyawo, babeere mu Yerusaalemi, nange nnaabeeranga Katonda waabwe mu bwesigwa ne mu butuukirivu.”

⁹Bwʼati bwʼayogera Mukama owʼEggye nti, “Emikono gyammwe gibe nʼamaanyi, mmwe, mu nnaku zino ababadde bawulira ebigambo bino ebiva mu kamwa ka bannabbi abaaliwo mu nnaku okuva omusingi gwʼennyumba ya Mukama owʼEggye lwe gwasimbibwa, yeekaalu ye eryoke ezimbibwe.

¹⁰Ekiseera ekyo nga tekinnatuuka, tewaali asobola kutoola nsimbi okupangisa omuntu wadde okupangisa ensolo. Era tewaali muntu ayinza kukola mirimu gye mu mirembe olwʼomulabe we, kubanga buli muntu nnali mufudde mulabe wa muliraanwa we.

¹¹Naye kaakano abantu bano abaasigalawo sijja kubakola nga mu nnaku ezaayita,” bwʼayogera Mukama owʼEggye.

¹²“Kubanga ensigo erikula bulungi, nʼomuzabbibu gubale ekibala kyagwo, nʼettaka lireetenga ekimera kyalyo, nʼeggulu lireetenga omusulo gwalyo. Nange abantu bange abaasigalawo ndibawa ebintu ebyo byonna nga gwe mugabo gwabwe.

¹³Nga bwe mwali ekikolimo mu baamawanga, ggwe ennyumba ya Yuda, naawe ennyumba ya Isirayiri, bwe ntyo bwe ndibalokola, era mulibeera omukisa eri abalala. Temutya, munywere emikono gyammwe gibe nʼamaanyi.”

¹⁴Kubanga bwʼati bwʼayogera Mukama owʼEggye nti, “Nga bwe nasalawo okubabonereza, bajjajjammwe bwe bansunguwaza,” bwʼayogera Mukama owʼEggye, “era ne sibasaasira,

¹⁵bwe ntyo nate bwe nsazeewo kaakano mu nnaku zino okukola obulungi Yerusaalemi nʼennyumba ya Yuda. Temutya.

¹⁶ⓔ Bino bye bintu bye munaakolanga: buli muntu ayogerenga bya mazima ne muntu munne, musalenga emisango mu bwenkanya mu mpya zammwe;

¹⁷tosaliranga muliraanwa wo lukwe. So tolayiranga bya bulimba, kubanga ebyo byonna mbikyawa,” bwʼayogera Mukama.

¹⁸Ekigambo kya Mukama owʼEggye ne kinzijira nate nti,

¹⁹Bwʼati bwʼayogera Mukama owʼEggye nti, “Okusiiba omwezi ogwokuna, nʼogwokutaano, nʼogwʼomusanvu, nʼogwʼekkumi kunaabeeranga mbaga eyʼessanyu era nʼokwesiima mu nnyumba ya Yuda. Noolwekyo mwagalenga amazima nʼemirembe.”

²⁰Bwʼati bwʼayogera Mukama owʼEggye nti, “Amawanga mangi nʼabantu bangi abalijja okuva mu bibuga bingi era nʼokuva mu nsi nnyingi;

²¹era abʼekibuga ekimu baliraga mu kibuga ekirala babagambe nti, ‘Tugende mangu twegayiririre Mukama, tunoonye amaaso ga Mukama owʼEggye. Nze kennyini ŋŋenda.’

²²Abantu bangi nʼamawanga mangi agʼamaanyi galijja okunoonya Mukama owʼEggye mu Yerusaalemi nʼokwegayirira Mukama.”

²³Bwʼati bwʼayogera Mukama owʼEggye nti, “Mu nnaku ezo abasajja kkumi okuva mu buli lulimi olwogerwa mu mawanga balyekwata ku kyambalo kyʼOmuyudaaya bagambe nti, ‘Muleke tugende nammwe kubanga twawulira nga Katonda ali nammwe.’ ”