Zekkaliya 9:1-17 LGCB2014 - Bible AI

¹ⓕ Ekigambo kya Katonda kyolekedde ensi ya Kadulaki era kirituuka e Ddamasiko. Kubanga abantu bonna nʼebika byonna ebya Isirayiri batunuulidde Mukama,

²era ne Kamasi ekiriraanyeewo nakyo bwe kityo, ne Ttuulo ne Sidoni wadde nga birina amagezi mangi.

³Ttuulo kyezimbira ekigo ne kituuma ffeeza nʼeba ngʼenfuufu, ne zaabu nʼeba nnyingi ngʼettaka eryʼomu kkubo.

⁴Laba, Mukama alikyambulako ebintu byakyo, alizikiriza amaanyi gaakyo agʼoku nnyanja, era kiryokebwa omuliro.

⁵ⓖ Asukulooni bino kiribiraba ne kitya; ne Gaza bwe kityo kiribeera mu kulumwa okwʼamaanyi. Era nʼessuubi lya Ekuloni liriggwaawo; Gaza aliggyibwako kabaka we, ne Asukulooni tekiribaamu bantu.

⁶Abagwira balitwala Asudodi, era nʼamalala gʼAbafirisuuti ndigamalawo.

⁷Era ndiggya omusaayi mu kamwa ke nʼemmere eyʼomuzizo okuva wakati mu mannyo ge. Nʼabo bonna abalisigalawo mu kyo baliba bantu ba Katonda waffe, balifuuka bakulembeze mu Yuda, ne Ekuloni kiriba nga Abayebusi.

⁸Naye ndirwanirira ennyumba yange eri eggye eddumbaganyi, so tewaliba mulumbaganyi aliddayo kujooga bantu bange kubanga kaakano mbalabirira.

⁹ⓗ Sanyuka nnyo ggwe omuwala wa Sayuuni: leekaana nnyo, ggwe omuwala wa Yerusaalemi; laba, kabaka wo ajja gyʼoli; mutuukirivu era muwanguzi; muwombeefu era yeebagadde endogoyi, endogoyi ento, omwana gwʼendogoyi.

¹⁰ⓘ Efulayimu ndimuggyako amagaali, ne Yerusaalemi muggyeko embalaasi ennwanyi, nʼomutego gwʼobusaale gulimenyebwa era alireeta emirembe mu mawanga, nʼobufuzi bwe buliva ku nnyanja emu butuuke ku nnyanja endala era buve ku mugga Fulaati butuuke ku nkomerero zʼensi.

¹¹Naawe ggwe, olwʼomusaayi gwʼendagaano gye nakola naawe, ndisumulula abasibe bo okuva mu bunnya obutaliimu mazzi.

¹²Mudde mu nkambi yammwe mmwe abasibe abalina essuubi; nangirira leero nti ndibadizaawo emirundi ebiri.

¹³Yuda ndigiweta ngʼomutego ogwʼobusaale ngujjuze Efulayimu. Ndiyimusa batabani ba Sayuuni, balwane nʼabaana bo, ggwe Buyonaani, mbakozese ngʼekitala ekyʼomutabaazi.

¹³

¹⁴Era Mukama alirabika ngʼali waggulu waabwe, akasaale ke kamyanse ngʼokumyansa kwʼeggulu. Mukama Katonda alifuuwa ekkondeere, nʼakumbira mu muyaga ogwʼomu bukiikaddyo.

¹⁵Mukama owʼEggye alibakuuma. Balirinnyirira ne bawangula envuumuulo, balinywa ne baleekaana ngʼabatamiivu. Balijjula ngʼekibya ekikozesebwa okumansira ku nsonda zʼekyoto.

¹⁶Ku lunaku olwo Mukama Katonda alirokola abantu be ngʼomusumba bwʼalokola ekisibo kyʼendiga ze. Balitangalijja mu nsi ye, ngʼamayinja agʼomuwendo bwe gatemagana mu ngule.

¹⁷Nga baliba balungi era abatuukirivu! Emmere eyʼempeke erireetera abavubuka abalenzi obulamu obweyagaza, nʼabawala nabo beeyagale olwa wayini omuggya.