Johana 15:1-26 LUONLT2020 - Bible AI

¹“An e mzabibu madier, kendo Wuora e japur mar mzabibuno.*

²Bedena duto ma ok nyag olemo ongʼado oko, to bede duto manyago olemo olwero mondo omed nyak moloyo.*

³Un usedoko maler nikech wach ma asewachonu.*

⁴Sikuru kuoma, kaka an bende asiko kuomu, nikech onge bad yath manyalo nyago olemo kende owuon ka ok osiko e mzabibu. Un bende ok unyal nyago olemo ka ok usiko kuoma.*

⁵“An e mzabibu, to un e bedene. Ka ngʼato osiko kuoma kendo an bende asiko kuome, to obiro nyago olemo mangʼeny, nimar onge gima unyalo timo ka upogoru koda.*

⁶Ka ngʼato ok osiko kuoma, to ochalo gi bad yath motongʼ oko maner. Bede yath machal kamano ichoko kendo idiro e mach mi wangʼ.*

⁷Ka usiko e iya kendo wechena osiko eiu, to unyalo kwayo gimoro amora ma chunyu gombo mi nomiu.*

⁸Ka unyago olemo mangʼeny, to Wuora yudo duongʼ, kendo mano nyiso ni un jopuonjrena.*

⁹“Mana kaka Wuoro osehera, e kaka an bende aseherou. Koro sikuru e herana.*

¹⁰Ka urito chikena, to ubiro siko e herana, mana kaka an bende aserito chike Wuora kendo asiko e herane.*

¹¹Asenyisou wachni mondo morna obed eiu kendo mondo mor maru obed moromo chuth.*

¹²Chik ma amiyou ema: Herreuru ngʼato gi ngʼato, mana kaka an bende aseherou.*

¹³Onge hera maduongʼ ma ngʼato nyalo herogo osiepene moloyo chiwonegi ngimane.*

¹⁴Un osiepena mana kutimo gik ma achikou.*

¹⁵Koro ok achak aluongu ni wasumbini nikech misumba ok ongʼeyo gima ruodhe timo; to aluongou ni osiepena nimar asenyisou gik moko duto mane apuonjora kuom Wuora.*

¹⁶Un ne ok uyiera, an ema nayierou kendo aketou mondo udhi unyag olemo, ma en olemo masiko. Eka Wuora biro miyou gimoro amora mukwayo e nyinga.*

¹⁷Chik ma amiyou ema: Herreuru ngʼato gi ngʼato.*

¹⁸“Ka piny chayou, to ngʼeuru ni an ema ne gichaya mokwongo.*

¹⁹Ka dine bed ni un mag pinyni, to piny dine oherou kaka joge owuon. Piny mon kodu nikech aseyierou, omiyo koro ok un mar pinyni.*

²⁰Paruru weche ma nawachonu ni, ‘Onge jatich maduongʼ moloyo ruodhe motiyone.’*+ 15:20 Joh 13:16*Omiyo ka an ema gisesanda, to un bende gibiro sandou. Ka gimako puonjna, to puonju bende gibiro mako.*

²¹Gibiro timonu kamano nikech nyinga, nimar gikia Jal mane oora.*

²²Ka dine ok abiro mi awuoyo kodgi, to dine ok buch richo oloyogi. To koro, onge wach ma ginyalo umogo richogi.*

²³Ngʼama ochaya, ochayo Wuora bende.*

²⁴Ka dine bed ni ne pok atimo honni ma ngʼato angʼata pok otimo e diergi, to buch richo dine ok oloyogi, to sani koro giseneno honnigi duto, eka pod gichaya kaachiel gi Wuora bende.*

²⁵Mago duto osetimore mana mondo ochop gima ondiki e chikgi ni, ‘Ne gichaya kayiem nono.’*+ 15:25 Zab 35:19; 69:4*

²⁶“Ka Jakony ma abiro oronu koa ka Wuora, ma en Roho mar adier maa kuom Wuora nobi, enotim neno kuoma.*