Јов 3:1-26 MKDB2006 - Bible AI

1Потоа ја отвори Јов устата своја и го проколна денот на своето раѓање.

2Почна Јов и рече:

3ⓢ„Нека е проклет денот, во кој се родив, и ноќта во која рекоа: — се зачна дете!

4Тој ден нека биде темнина; да не го побара Бог одозгора и да не изгрее над него светлина!

5ⓣДа го затемни темнина и смртна сенка, црн облак да го покрие, или страшно помрачување на сонцето!

6Таа ноќ, — темнина да ја опфати, да не се смета меѓу дните на годината, да не влезе во бројот на месеците!

7О, таа ноќ! Без луѓе да беше; веселба во неа да немаше!

8Нека ја проколнат оние, кои го колнат денот, оние кои знаат да го разбудат чудовиштето водено!

9Нека потемнат ѕвездите на мугрите нејзини; да ја чека светлината и таа да не дојде и да не ги види трепките на зората;

10зашто не ги затвори дверите на мајчината ми утроба и не ја сокри тагата од очите мои!

11ⓤЗошто не сум умрел кога сум се раѓал, и не сум издивнал — кога сум излегол од утробата?

12Зошто ме прифатија на колена? Што ми требаше да цицам гради?

13И сега ќе лежев и ќе почивав; ќе спиев и ќе ми беше спокојно

14ⓥзаедно со цареви и земни советници, кои градеа урнатини за себе,

15или со кнезови, кои имаа злато и кои ги полнеа домовите свои со сребро;

16ⓦили, како недоносче закопано, немаше да ме има, како новороден­чиња кои не виделе светлина.

17ⓧВо гробот насилниците не прават насилство, а изнемоштените наоѓаат починка.

18Таму затворениците заедно се на­сладуваат од спокојство и не ги слушаат викотниците на надзирателот.

19Мал и голем таму се рамни; робот е слободен од господарот свој.

20Зошто на страдалникот му е дадена светлина, и живот — на душевно огор­чените,

21ⓨкои ја очекуваат смртта, а неа ја нема, кои ја бараат повеќе отколку закопано богатство,

22ⓩби се радувале до восхит, би биле среќни, зашто нашле гроб?

23ⓐЕве јас сум човек кој не знае каде оди, човекот чиј пат е сокриен и кого Бог со мрак го опкружил?

24ⓑВоздишките мои се моја исхрана, офкањата мои течат како вода,

25ⓒзашто страшното, од кое се ужа­сував, тоа ме снајде; од што се плашев, тоа ме сполета.

26Нема за мене мир, нема спокојство, нема утеха; настапи зло.“

© Библиско Здружение на Р. Македонија 2006 © Bible Society of the Republic of Macedonia 2006