Јов 40:1-32 MKDB2006 - Bible AI

¹Продолжи Господ и му рече на Јов:

²ⓠ„Кој се бори со Седржителот, ќе сака ли да поучува? Кој Го напаѓа Бога, нека Му одговори.“

³Му одговори Јов на Господ и рече:

⁴ⓡ„Еве, јас сум ништожен, што да Ти одговорам? Раката своја ја ставам на устата моја.

⁵Еднаш говорев, сега нема да одговарам; говорев дури двапати, но повеќе не.“

⁶ⓢМу одговори Господ на Јов од луњата и му рече:

⁷ⓣ„Препаши ја како маж половината своја: Јас ќе те прашувам, а ти објаснувај Ми.

⁸ⓤМојот суд ли сакаш да го со­бориш? Да Ме обвиниш Мене, а себеси да се оправдаш?

⁹ⓥТаква ли е твојата рака, како на Бога? И можеш ли како Него да згр­миш со гласот свој?

¹⁰Тогаш украси се со величие и сла­ва, облечи се во болскот и велико­лепие;

¹¹ⓦизлеј ја јароста на гневот свој, погледај сѐ што е гордо и смири го;

¹²ⓧпогледај ги сите горделиви и понизи ги, сотри ги безбожниците на местата нивни;

¹³ⓨзакопај ги сите во земја и покриј ги лицата нивни со темнина.

¹⁴Тогаш и Јас ќе признаам дека твојата десница може да те спаси.

¹⁵ⓩЕте нилскиот коњ што сум го создал, како и тебе; тој јаде трева како вол;

¹⁶силата негова е во бедрата негови, а јачината негова — во мускулите на сто­макот негов;

¹⁷ја размавтува опашката своја како кедар, а жилите на бедрата негови се испреплетени;

¹⁸нозете негови изгледаат како бронзени труби; коските негови — како железни прачки;

¹⁹тоа е врвот на Божјите патишта: само Оној Кој го создал, може да го приближи мечот Свој до него;

²⁰горите му принесуваат храна; таму сите полски ѕверови играат;

²¹тој си легнува под сенчести дрвја, меѓу трски и во мочуриште;

²²сенчестите дрвја го покриваат со сенката своја; врби крај потоците го опкружуваат;

²³ете, тој ја задржува реката за да пие и не брза; си останува спокоен, дури и кога би посакал Јордан да потече кон устата негова.

²⁴Ќе го фати ли некој пред очите негови и ќе му го продупчи ли носот негов со кука?

²⁵ⓐМожеш ли со јадица да извлечеш крокодил и со врвца да го врзеш за јазикот?

²⁶Ќе вовреш ли алка во ноздрите негови? Ќе ја прободеш ли со шило челуста негова?

²⁷Ќе ти се моли ли многу и ќе ти го­вори ли кротко?

²⁸Ќе направи ли договор со тебе, ќе го земеш ли засекогаш како слуга свој?

²⁹Ќе се забавуваш ли со него како со птичка, и ќе го врзеш ли заради девојчињата свои?

³⁰Ќе го продаваат ли другарите како лов, ќе го делат ли меѓу хананските трговци?

³¹Можеш ли да му ја продупчиш кожата негова со копје и главата негова со рибарска вила?

³²Стави ја на него раката своја и запомни ја борбата, зашто ќе ти биде последна!“