Даниел 11:1-45 MKDB2006 - Bible AI

¹„И така, од првата година на Мидјанинот Дариј јас му станав помошник и поткрепа.

²ⓝСега ќе ти ја кажам вистината: еве, уште тројца цареви ќе се издигнат во Персија; потоа четвртиот ќе ги надмине сите со големо богатство, и кога ќе го намножи богатството свое, ќе ги крене сите против царството на Јаван.

³ⓞПотоа ќе се појави силен цар, кој ќе владее со голема власт и ќе дејствува според својата волја[6].

⁴ⓟНо, кога ќе се издигне тој, царството негово ќе се сруши и ќе се раздели на четири делови и нема да помине на неговите потомци, и не со таква власт, со која тој господареше; затоа што царството негово ќе се растури и ќе падне на други, а не на нив.

⁵И јужниот цар ќе се засили, и еден од кнезовите негови ќе стане посилен од него и ќе владее, и власта негова ќе биде голема.

⁶Но по неколку години тие ќе се спријателат и ќерката на јужниот цар ќе дојде кај северниот цар за да склучи договор; но таа нема да ја задржи силата во рацете свои, и нема да го одржи нејзиниот род, туку тие ќе бидат убиени, како таа, така и оние, што ќе ја придружуваат; и родениот од неа, како и оние што ѝ помагале во тоа време.

⁷Но ќе се издигне фиданка од коре­нот нејзин, ќе дојде против војската, ќе влезе во тврдините на северниот цар, ќе ги победи и ќе ги покори.

⁸ⓠДури и боговите нивни, идолите нив­ни заедно со скапите садови, сребрени и златни, ќе ги однесе како плен во Еги­пет и неколку години ќе владее посилно од северниот цар.

⁹И тој, ќе влезе во царството на јуж­ниот цар, но ќе се повлече во земјата своја.

¹⁰ⓡПотоа, ќе се вооружат синовите негови и ќе соберат многубројна војска; а еден од нив брзо ќе замине, ќе поп­лави и ќе замине, и ќе се бори со него до тврдината негова.

¹¹ⓢИ јужниот цар ќе се налути, па ќе излезе да војува со него, со северниот цар, и ќе изведе голема војска и ќе ја зароби војската на северниот цар.

¹²Тогаш војската ќе се охрабри, и срцето на царот ќе се возгордее; тој ќе собори многу илјади, но нема да се одржи,

¹³бидејќи северниот цар ќе се врати и ќе изведе повеќе војска од поранешната и по неколку години ќе дојде со голема, добро опремена војска.

¹⁴Во тоа време мнозина ќе станат против јужниот цар, и бунтовниците меѓу синовите на твојот народ ќе се кренат, за да се исполни видението, но ќе паднат.

¹⁵ⓣИ ќе дојде северниот цар, ќе на­прави опкоп и ќе го завладее укрепениот град, и нема да се додржат миш­ките на југ, ниту неговата избрана вој­ска: ќе нема сила да се спротивстави.

¹⁶ⓤИ ќе дејствува според неговата вол­ја и никој не ќе може да устои пред не­го; и живеалиштето свое ќе го постави во Красната земја, и таа ќе настрада од раката негова.

¹⁷ⓥИ ќе науми да навлезе во царството негово со сите сили, и ќе му ја даде ќерката своја за жена, за да го погуби, но таа намера нема да се исполни.

¹⁸Потоа ќе се сврти кон островите и ќе завладее многу од нив; но еден водач ќе го прекрати нанесениот срам од него и за срамот срам ќе му возврати.

¹⁹ⓦПотоа ќе се врати кон тврдините на својата земја, но ќе се сопне, ќе падне и тоа ќе му биде крајот.

²⁰ⓧНа негово место ќе се издигне друг што ќе наметне данок за да мине по царството во екот на славата. Но и тој по неколку дни ќе загине, и тоа не јавно, ниту во бој.

²¹ⓨА на негово место ќе се издигне еден никаквец, кој и нема право да биде цар, но со лукавство и со лаги ќе го освои царството.

²²ⓩОние што ќе му се противат ќе бидат потопени и победени од него, дури и Кнезот на сојузот.

²³ⓐИ покрај склучениот сојуз со него, тој ќе дејствува со измама и ќе го совлада и ќе се одржи на врвот со малку народ.

²⁴ⓑТој ќе влезе во мирни и плодни краишта и ќе го прави она што не го правеле татковците негови и татковци­те на татковците негови; пленот, загра­бениот имот и богатството ќе го троши како свое. Ќе помислува и тврдини да напаѓа, но само за некое време.

²⁵Потоа ќе се охрабри духот негов и со многубројна војска ќе се крене против јужниот цар; јужниот цар ќе излезе во војна со голема и уште посилна вој­ска, но нема да се додржи, зашто против него ќе има заговор.

²⁶Дури и оние што јадат леб со него ќе му станат убијци, и војската ќе му се уништи, па така многумина ќе паднат убиени.

²⁷ⓒВо срцето на двата цара ќе има сплетки, и ќе седнат на една трпеза и ќе зборуваат лага, но нема ништо да се случи, зашто крајот е одложен до определеното време

²⁸и така ќе се врати тој во својата земја со големо богатство и со непријателска замисла против светиот завет, ќе го направи своето и ќе се врати во земјата своја.

²⁹Во определеното време тој пак ќе појде против југ, но последниот поход нема да биде како поранешниот,

³⁰ⓓбидејќи истовремено против него ќе појдат китимските кораби, тој ќе се исплаши и ќе се врати, ќе беснее против светиот завет и пак ќе се договори со противниците на светиот завет.

³¹ⓔИ ќе постави определен одред вој­ска што ќе го осквернува светилиштето — тврдината, ќе ја укине секојдневната жртва и ќе го постави Гнасниот Пус­тош­ник.

³²Со лукавство ќе ги привлече кон себе оние што се огрешиле против заветот; но луѓето кои Го почитуваат својот Бог, ќе опстојат и ќе се спротивстават.

³³ⓕИ разумните од народот ќе вразумуваат мнозина, но извесно време ќе страдаат од меч и оган, од ропство и грабеж.

³⁴ⓖИ во времето на страдањето свое само малкумина ќе им помагаат, а повеќето ќе се присоединат кон нив дволично —

³⁵ⓗи од разумните некои ќе пострадаат за да се испитаат, очистат, и обелат за последното време, зашто уште има време до рокот.

³⁶ⓘИ ќе постапува тој цар според својата волја, ќе се крене и ќе се возвеличи повисоко од секое божество, ќе почне да хули на Бога над боговите и ќе успева, сѐ додека не се исполни гневот; зашто, она што е предопределено, тоа и ќе се изврши.

³⁷За боговите на татковците свои нема ни да помисли, ни за богот што го сакаат жените, дури ни никакво боже­ство нема да уважува, бидејќи ќе се возгордее погоре од сите.

³⁸Место нив, ќе го слави богот на тврдините, богот што татковците негови не го знаеле, ќе го чести со злато и сребро и драгоцени камења, место Бога Кој е најсилен.

³⁹Ќе ги брани своите тврдини со народ кој му служи на туѓ бог. На оние, што ќе го признаваат, ќе им ги зголемува почестите и ќе им дава власт над мнозина и земја ќе раздава како награда.

⁴⁰ⓙКон крајот на времето јужниот цар ќе се судри со него и северниот цар ќе се впушти како бура врз него со коли, коњаници и многубројни кораби, ќе на­падне на областите, ќе ги поплави и ќе мине преку нив.

⁴¹ⓚИ ќе влезе во Красната земја, а многу области ќе пострадаат, од раката негова ќе се спасат само Едом, Моав и остатокот од синовите Амонови.

⁴²Ќе ја протегне раката своја врз раз­ни земји; нема да се спаси ни земјата египетска.

⁴³ⓛЌе освои златни и сребрени ризници и разни скапоцени работи од Египет; Либијците и Етиопјаните ќе тргнат по него.

⁴⁴Но гласовите од исток и од север ќе го смутат, па тој ќе излезе со најголема јарост за да истребува и погубува мно­зина,

⁴⁵ⓜи ќе ги распне царските шатори меѓу морето и гората на преславното светилиште; но ќе му дојде крајот, и никој нема да му помогне.“