Дела 23:1-35 MKDB2006 - Bible AI

¹ⓦПавле го впери својот поглед кон Синедрионот и рече: „Луѓе браќа! До оној ден со најчиста совест пред Бога живеев!“

²ⓧА првосвештеникот Ананија на оние, што стоеја пред него, им заповеда да го удрат по устата.

³ⓨТогаш Павле му рече: „Бог тебе ќе те удри, ѕиду варосан! Ти седиш, за да ме осудиш според Законот, а заповедаш да ме бијат против Законот!“

⁴А оние што стоеја пред него, рекоа: „Божјиот првосвештеник ли го навредуваш?“

⁵ⓩПавле одговори: „Не знаев, браќа, дека тој е првосвештеник; бидејќи е на­пишано: ‚Началникот на твојот народ да не го злословуваш.‘“

⁶ⓐА кога дозна Павле дека еден дел од нив се садукеи, а другиот — фарисеи, из­вика во Синедрионот: „Луѓе браќа! Јас сум фарисеј, син на фарисеј; за надеж во воскресение на мртвите ми се суди!“

⁷Кога го кажа тоа, настана расправија меѓу фарисеите и садукеите, и мно­зина од народот се раздвоија.

⁸ⓑЗашто садукеите велат дека нема ни воскресение, ни ангел, ни дух; а фарисеите го признаваат и едното и другото.

⁹Настана голема врева; и станаа книжниците од фарисејската страна и почнаа да се препираат, велејќи: „Ниш­то лошо не наоѓаме во овој човек; ако, пак, нему му зборувал дух или ангел, тогаш да не Му се противиме на Бога.“

¹⁰И бидејќи настана голема меша­ни­ца, заповедникот, уплашен да не го растргнат Павле, им заповеда на војниците да слезат и да го грабнат од нив и да го одведат во тврдината.

¹¹ⓒНоќта му се јави Господ и му рече: „Не плаши се, Павле! И како што све­дочеше за Мене во Ерусалим, така ќе треба да сведочиш и во Рим.“

¹²ⓓА кога осамна, некои од Јудејците се договорија, се заколнаа со заклетва и си рекоа да не јадат, ниту да пијат додека не го убијат Павле.

¹³Имаше повеќе од четириесет мажи што дадоа таква заклетва.

¹⁴Па отидоа кај првосвештениците и старешините и рекоа: „Клетва си кла­довме ништо да не каснеме додека не го убиеме Павле.

¹⁵Затоа вие од Синедрионот сооп­ште­те му сега на заповедникот да го доведе утре долу пред нас, небаре ќе сакате по­точно да го разгледате неговото дело; а ние, пред да наближи, ќе бидеме готови да го убиеме.“

¹⁶Кога слушна за заседата синот на Павловата сестра, отиде, влезе во тврдината и му кажа на Павле.

¹⁷А Павле повика еден стотник и му рече: „Одведи го ова момче кај заповедникот, зашто има нешто да му каже.“

¹⁸И тој го зеде, го одведе кај заповедникот и рече: „Затвореникот Павле ме повика и замоли ова момче да го до­ве­дам кај тебе, зашто имало нешто да ти каже.“

¹⁹Заповедникот го фати за рака, застана со него на страна и го праша: „Што имаш да ми кажеш?“

²⁰А тоа рече: „Јудејците се договорија да те молат да го одведеш утре Павле долу пред Синедрионот, небаре ќе сака­ат поточно да го испитуваат нешто во врска со неговото дело.

²¹Но ти не им верувај, зашто ќе го че­каат четириесет, а и повеќе од че­ти­ри­есет нивни луѓе, што се заколнале да не јадат, ниту да пијат, сѐ додека не го убијат; и сега се веќе готови, чекаат само да им ветиш.“

²²Тогаш заповедникот го испрати момчето и му порача: „Никому не ка­жувај дека си ми го кажал ова!“

²³Потоа повика двајца стотници и ре­че: „Пригответе ми двесте војници, се­думдесет коњаници и двесте стрелци, за да тргнат за Кесарија во третиот час[21] ноќеска;

²⁴и пригответе добици, за да го качат Павле и да го одведат до намесникот Феликс!“

²⁵Напиша и писмо со оваа содржина:

²⁶„Клавдиј Лисиј испраќа поздрав до многупочитуваниот намесник Феликс.

²⁷Овој човек беа го фатиле Јудејците и сакаа да го убијат; јас се појавив со војска и го одзедов, бидејќи разбрав де­ка е римски граѓанин.

²⁸И сакајќи да ја дознаам причината, поради која го обвинуваат, го изведов пред нивниот Синедрион,

²⁹ⓔи дознав дека го обвинуваат по пра­шање од нивниот Закон, но дека нема никаква вина, поради која би заслужил смрт или окови.

³⁰ⓕИ бидејќи ми беше соопштено дека Јудејците намислиле лошо против тој човек, јас го пратив веднаш кај тебе, от­како им порачав и на обвинителите да кажат пред тебе што имаат против не­го. Биди здрав!“

³¹И така, војниците го зедоа Павле, и онака како што им беше заповедано, го одведоа ноќе во Антипатрида.

³²А на вториот ден се вратија во тврдината, откако ги оставија коњаниците да одат со него.

³³Оние што влегоа во Кесарија и му го предадоа писмото на намесникот, му го претставија и Павле.

³⁴ⓖНамесникот го прочита писмото и праша од кој крај е тој, и откако разбра дека е од Киликија, рече:

³⁵„Ќе те сослушам, кога ќе дојдат и твоите обвинители.“ И заповеда да го држат под стража во дворот Иродов.