Езекиел 28:1-26 MKDB2006 - Bible AI

¹И дојде слово Господово до мене:

²ⓐ„Сине човечки, кажи му на начал­никот на Тир — вака вели Господ Бог: затоа што го издигна срцето свое и велиш: ‚Јас сум бог, седам на божји престол, во срцето на морињата‘, иако си човек, а не бог, го изедначуваш твојот ум со умот на Бога,

³ете, како да си помудар од Даниел; и нема тајна, сокриена од тебе;

⁴со мудроста своја и со разумот свој ти се здоби со богатство и во своите ризници собра злато и сребро;

⁵со големата мудрост своја преку трговијата своја ти го зголеми богатството свое,

⁶затоа, вака вели Господ Бог: — Би­дејќи го изедначуваш твојот ум со умот на Бога,

⁷еве, Јас ќе доведам против тебе туѓинци, највешти меѓу народите, и тие ќе ги извадат своите мечеви против убавината на твојата мудрост и ќе го помрачат твојот блесок;

⁸тие ќе те турнат во гроб и ќе умреш во срцето на морињата, со насилна смрт.

⁹Ќе речеш ли тогаш пред твојот уби­ец: ‚јас сум бог‘, кога во раката на оној што ќе те убива, ти ќе бидеш човек, а не бог?

¹⁰Ти ќе умреш од раката на туѓинци со смрт како необрезан; зашто Јас го реков тоа“, така вели Господ.

¹¹И дојде слово Господово до мене:

¹²„Сине човечки, плачи за тирскиот цар и кажи му: — вака вели Господ Бог: ти си печат на совршенство, полнота на мудроста и венец на убавината.

¹³ⓑТи беше во Едем, во Божјата гра­дина; твоите облеки беа украсени со секакви скапоцени камења: рубин, топаз, дијамант, берил, оникс, јаспис, сафир, тиркиз, смарагд и злато, сите вешто исткаени и нанижани на тебе, приготвени во денот кога беше создаден.

¹⁴ⓒТи беше помазан херувим — заштитник, и Јас те поставив за тоа; ти беше на светата Божја гора, одеше среде огнени камења.

¹⁵Ти беше совршен во патиштата свои, од денот кога беше создаден, сѐ додека не се најде во тебе беззаконие.

¹⁶Од твојата обилна трговија се ис­полни со неправда и ти згреши; и Јас те соборив како нечист од Божјата гора, те истерав тебе, херувиме — заштитник, среде огнени камења.

¹⁷Од убавината твоја се возгордеа срцето твое, поради богатството твое си ја загуби мудроста своја; затоа Јас те соборив на земја, те предадов на потсмев пред царевите.

¹⁸Со многуте гревови свои во неправедната твоја трговија ти ги ос­кверни твоите светилишта; и Јас пуш­тив оган пред тебе, да те проголта; и Јас те претворив во пепел на земјата пред очите на сите, што те гледаат.

¹⁹Сите, што те знаеја меѓу народите, се згрозуваа над тебе, ти стана за ужас и исчезна засекогаш.“

²⁰ⓓИ дојде слово Господово до мене:

²¹„Сине човечки, сврти го лицето свое кон Сидон, и пророкувај против него:

²²ⓔЕте Јас сум против тебе, Сидоне, и ќе се прославам во тебе и ќе познаат дека сум Јас Господ, кога ќе извршам суд над него и ја покажам во него Моја­та светост.

²³И ќе пратам во него помор и крв на улиците негови и ќе паднат среде него убиени од меч, кој ќе ги нападне сите одреда и ќе познаат дека Јас сум Господ.

²⁴ⓕИ во иднина тој нема да биде бодлив трн за домот Израелов и причинител на болка трнлива, повеќе од сите соседи што му сакаат зло и ќе познаат дека Јас сум Господ Бог.“

²⁵ⓖТака вели Господ Бог: „Кога ќе го соберам домот Израелов меѓу народите, кај кои се распрснал и ќе ја објавам кај нив светоста Своја пред очите на пле­мињата и тие ќе заживеат во земјата своја, која му ја дадов на Мојот слуга Јаков,

²⁶тогаш ќе живеат во неа во мир и ќе си изградат куќи, ќе насадат лозја и ќе живеат во мир, зашто ќе извршам суд над сите наоколу што ги презираа. И тогаш ќе разберат дека Јас сум Господ, Бог нивни.“