Езекиел 36:1-38 MKDB2006 - Bible AI

¹А ти сине човечки, искажи пророштво за планините израелски и кажи: „Планини израелски, чујте го словото Господово.

²ⓐВака вели Господ Бог: бидејќи непријателот вели за вас: ‚о, о, и веч­ните светилишта ни паднаа како плен‘;

³затоа изречи пророштво и кажи: така вели Господ Бог — токму поради тоа, што ве опустошуваат и ве грабаат од сите страни, за да станете сопственост на други народи, и да се изложите на срам и поруга,

⁴затоа, планини израелски, чујте го словото од Господ Бог — вака им вели Господ Бог на планините и на ридовите, на долиштата и долините и на запусте­ните урнатини и напуштените градови, кои станаа грабеж и подбив за другите околни народи;

⁵затоа така вели Господ Бог: во Својата пламена ревност изреков слово против други народи и против сиот Едом, кои си ја определија земјата Моја за сопственост и си ја присвоија како плен со срдечна радост и со презир во душата,

⁶затоа изречи пророштво за земјата израелска и кажи им на планините и ридовите, на долиштата и на долините — вака вели Господ Бог: еве, Јас го реков тоа во ревноста Своја и во јароста Сво­ја, зашто вие носите на себе потсмев од народите.

⁷Затоа, така вели Господ Бог: Јас ја кренав раката своја со клетва дека на­родите што се околу вас, тие самите ќе го понесат својот срам.

⁸ⓑА вие, планини израелски, проши­рете се и ќе принесувате плодови на Мојот народ Израел, зашто тие скоро ќе дојдат.

⁹Зашто, еве, кон вас се обраќам, и вие ќе бидете обработувани и засејувани.

¹⁰ⓒИ ќе населам во вас многу луѓе, сиот дом Израелов, и градовите ќе бидат населени и урнатините обновени.

¹¹ⓓЌе ги намножам кај вас и луѓето и добитокот, и тие ќе се плодат и раз­множуваат, и ќе ве населам како што беше во поранешните времиња, ќе ви правам добро повеќе отколку во пора­нешните времиња, та ќе познаете дека Јас сум Господ.

¹²Ќе доведам кај вас луѓе, народ Мој Израел, и тие ќе владеат со вас. Ти, земјо, ќе бидеш нивно наследство и кај нив ќе нема веќе бездетни луѓе.

¹³ⓔТака вели Господ Бог — бидејќи ве­лат за вас: ‚ти си земја што јадеш луѓе и што правиш народот да е без деца‘,

¹⁴затоа, веќе нема да ги јадеш луѓето и во иднина нема да создаваш бездетен народ, вели Господ Бог.

¹⁵И нема веќе да слушаш потсмев од народите и нема веќе да трпиш врз себе хули од племињата, и во иднина нема веќе да ги правиш луѓето да се без де­ца,“ вели Господ Бог.

¹⁶И дојде слово Господово до мене:

¹⁷ⓕ„Сине човечки, кога домот Израе­лов живееше во својата земја, тој ја осквернуваше со поведението свое и со делата свои; патот нивни им беше пред Моето лице како нечистотија на жена, кога се чисти.

¹⁸ⓖЈас, го излеав врз нив гневот Свој за крвта, што ја пролеваа во таа земја, и заради тоа што ја осквернуваа со своите идоли.

¹⁹Ги распрснав меѓу народите и тие се расеани по земјите, ги судев според нивните патишта и според нивните гре­вови.

²⁰ⓗИ отидоа тие во народите, каде што го сквернавеа Моето свето име, зашто за нив велат: ‚Тие се народ на Господ и излегоа од Неговата земја.‘

²¹Зажалив заради името Мое свето, што домот Израелов го оскверни кај народите, каде што отидоа.

²²ⓘЗатоа, кажи му на домот Израелов: вака вели Господ Бог: доме Израелов, ќе го направам тоа не заради вас, туку заради името Мое свето што го осквернивте кај народите, каде што отидовте.

²³ⓙЌе го осветам великото име Свое, осквернето кај народите, меѓу кои го осквернивте, па ќе познаат народите дека Јас сум Господ, вели Господ Бог, кога ќе ја покажам светоста Своја во вас пред нив.

²⁴Ќе ве земам откај народите, ќе ве соберам од сите страни и ќе ве доведам во вашата земја.

²⁵ⓚⓛЌе ве поросам со чиста вода и вие ќе се очистите од сите ваши осквернувања, и од сите ваши идоли ќе ве очистам.

²⁶ⓜЌе ви дадам ново срце, и нов дух ќе ви дадам; ќе го земам од вашето тело каменото срце и ќе ви дадам срце од месо.

²⁷ⓝЌе го внесам во вас Мојот дух и ќе направам да одите по заповедите Мои и да ги пазите и да ги исполнувате наредбите Мои.

²⁸И ќе живеете во земјата, што им ја дадов на предците ваши, и ќе бидете Мој народ и Јас ќе бидам ваш Бог.

²⁹ⓞЌе ве ослободам од сите ваши не­чистотии, ќе го повикам житото и ќе го умножам и нема да ве оставам да тр­пите глад.

³⁰ⓟЌе ги умножам плодовите по дрвјата и полските производи, па во иднина да не трпите срам од народите поради глад.

³¹Тогаш ќе се сетите за своите лоши патишта и за своите лоши дела, па ќе почувствувате одвратност од самите себе за гревовите свои и за лошите престапи.

³²Тоа ќе го направам, не заради вас, вели Господ Бог, туку да ви биде јасно — црвенејте и срамувајте се од вашите патишта, доме Израелов.“

³³Така вели Господ Бог: „Во оној ден, кога ќе ве очистам од сите ваши беззаконија, и ќе ве населам во градовите и ќе бидат обновени урнатините;

³⁴и опустошената земја што беше пустина во очите на секој минувач, ќе биде обработена,

³⁵тогаш ќе речат: ‚оваа запустена земја стана како Едемската градина и запустените и разорени градови се за­цврстија и населија.‘

³⁶Па ќе познаат народите што ќе останат околу вас дека Јас, Господ, од­ново изградувам разрушено, засадувам запустено. Јас Господ го реков тоа и го извршив.“

³⁷Така вели Господ Бог: „Еве, уште и во ова ќе ја покажам милоста Своја кон домот Израелов, ќе го намножам со луѓе како стадо.

³⁸Како што има многу жртвени овци во Ерусалим за време на празниците, така ќе бидат полни со луѓе запусте­ните градови и ќе познаат дека Јас сум Господ.“