1ⓗЕте, царот ќе царува по правда, а кнезовите ќе управуваат по закон;
2ⓘсекој од нив ќе биде како заштита од ветар и засолниште за лошо време, како водни извори во степи, како сенка од висока карпа во пустина.
3ⓙИ очите на оние што гледаат нема да им бидат затворани; ушите на оние што слушаат, ќе внимаваат.
4ⓚИ срцето на лесномислените ќе умее да расудува; оние што говорат на нос, ќе говорат јасно.
5ⓛБезумникот нема повеќе да го нарекуваат благороден, а за подмолниот нема да велат дека е честит.
6ⓜЗашто безумникот говори глупости и срцето негово мисли на беззаконие, за да дејствува лицемерно и да искажува хула против Господ, да ја лишува од леб душата на гладниот и да го одзема пиењето од жедниот.
7ⓝКај подмолниот и средствата се погибелни: тој прави стапици, за да го погуби сиромавиот со лажливи зборови, макар што сиромавиот и да е прав.
8ⓞА чесниот мисли на чесното и цврсто стои во сѐ што е чесно.
9ⓟЖени безгрижни, застанете, чујте го гласот Мој; ќерки немирни, приклонете го увото кон зборовите Мои.
10ⓠУште една година и неколку дена, и ќе се ужаснете вие, безгрижни! Гроздобер нема да има и време за жетва нема да настане.
11ⓡСтреснете се вие, безгрижни! Ужаснете се вие, невнимателни! Соблечете се, оголете се и крстот препашете го со таговна облека.
12ⓢТагувајте по прекрасните полиња, за родната лоза.
13ⓣВо земјата на народот Мој ќе растат трње и боцки; така ќе биде и во сите домови во градот што ликува;
14ⓤзашто дворците ќе запустат, шумниот град ќе биде напуштен; Офел и кулата ќе станат пештери — прибежиште на диви магариња и на стада што пасат.
15ⓥДодека не се излие врз нас Духот одозгора, и пустината не стане градина, и градината не почнат да ја сметаат за шума,
16тогаш ќе се воведе правда во таа пустина, и праведност ќе заживее во плодоносното поле.
17ⓦДело на правдата ќе биде мирот, и плод на праведноста — трајно спокојство и сигурност.
18ⓧТогаш народот Мој ќе живее во мирни живеалишта и во безопасни села и во пребивалишта на блажените.
19ⓨИ град ќе паѓа врз гората; градот ќе слезе во долината[8].
20ⓩБлажени сте вие: ќе сеете при сите води и ќе испраќате таму и вол и магаре.