Повторени закони 14:1-29 MKDB2006 - Bible AI

¹ⓝВие сте чеда на Господ, вашиот Бог; не правете зарези на телото свое и не ја стрижете косата над очите свои за умрено;

²ⓞзашто вие сте свет народ на Господ, вашиот Бог, и Господ вас ве избра од сите народи, што се на земјата, за да бидете Негов народ.

³Не јади ништо нечисто.

⁴Еве ги животните што можете да ги јадете: говедо, овца, коза,

⁵елен, срна, бивол, див вол и жирафа.

⁶Секое животно што има разделени копита и на двете копита длабок зарез, и секое животно што прежива, јадете го.

⁷Од оние, што преживаат и имаат разделени копита со длабок зарез, не јадете само: камила, питом зајак и див зајак, зашто тие, иако преживаат, нивните копита не се разделени: тие се нечисти за вас;

⁸и свињата, бидејќи, иако копитата ѝ се разделени, но таа не прежива: таа е нечиста за вас; месото нивно не јадете го и до труповите нивни не се допирај­те.

⁹Од сите водни животни јадете ги сите оние, што имаат перки и лушпи;

¹⁰а другите што немаа перки и лушпи, не јадете ги: тие се нечисти за вас.

¹¹Секоја чиста птица јадете ја;

¹²но од нив не треба да ги јадете овие: орелот, грифот, галебот,

¹³јастребот, соколот, мршојадецот и сличните на нив;

¹⁴и секаков гавран од кој било вид;

¹⁵нојот, ластовицата, кукавицата и сличните на нив;

¹⁶бувот, ибисот, лебедот и сличните на нив;

¹⁷чавката, пеликанот и корморанот;

¹⁸штркот, чапјата, пупунецот и лилјакот.

¹⁹Сите четириножни крилести гадинки се нечисти за вас, да не ги јадете.

²⁰Секоја чиста птица јадете ја.

²¹ⓟНе јадете ништо умрено; дај му го на придојдениот, што е во твоите градови; нека го јаде тој, или продај му го на туѓинецот, зашто ти си народ свет за Господ, твојот Бог. Не вари јаре во млекото на неговата мајка.

²²ⓠОдделувај десеток од секој плод на семињата свои, род од нивите твои секоја година,

²³пред Господ, твојот Бог, во место, што Тој ќе го одбере, за да престојува името Негово; таму јади од десетокот од пченицата твоја, од виното твое и од маслото твое, и првородените од крупниот и од ситниот твој добиток, за да се научиш да се плашиш од Господ, твојот Бог, во сите денови.

²⁴Ако, пак, патот твој е долг, така што не ќе можеш да го принесеш тоа, бидејќи далеку е од тебе местото, што ќе го одбере Господ, твојот Бог, за пребивалиште на името Негово, за да те благослови Господ, твојот Бог,

²⁵тогаш продај го тоа според цената и земи го среброто во рака и оди на местото, што ќе го одбере Господ, твојот Бог;

²⁶и со тоа сребро изнакупи таму сѐ, што душата ќе ти посака: волови, овци, вино или друг алкохолен пијалак и сѐ друго што душата ќе ти посака; и јади таму пред Господ, твојот Бог, и развесели се ти и твоите домашни.

²⁷И левитот, кој е во твојот град, не го изоставај, бидејќи тој нема ни дел ни наследство со тебе.

²⁸ⓡНа крајот од секои три години од­дели ги десетоците од сите твои произ­води во текот на последната година и стави го тоа во градовите свои,

²⁹ⓢпа нека дојде левитот, бидејќи тој нема дел и наследство со тебе, и придој­дениот, и сиракот, и вдовицата, што се во твоите градови, и нека јадат и нека се наситат за да те благослови Господ, твојот Бог, во секоја работа, што ќе ја вршат рацете твои.