Повторени закони 3:1-29 MKDB2006 - Bible AI

¹И се свртевме оттаму и појдовме кон Башан, и башанскиот цар Ог излезе во борба против нас со целиот свој народ, кај Едреи.

²И ми рече Господ: „Не плаши се од него, зашто Јас ќе ти го предадам во раката твоја него, и целиот народ негов, и целата земја негова; и ти ќе направиш со него така, како што направи со аморејскиот цар Сихон, кој живееше во Есевон.“

³И Господ, Бог наш, ни го предаде во рацете наши и Ог, царот башански, и целиот народ негов; и го разбивме, така што од него не остана никој жив.

⁴ⓕТогаш му ги презедовме сите гра­дови негови, па не остана град, што не бевме го презеле од нив: шеесет гра­дови, целата област Аргов во царството на Ог Башански.

⁵Сите тие градови беа утврдени со високи ѕидови, порти и довратници, без да го сметаме големиот број села.

⁶ⓖИ ние ги ставивме под клетва, како што направивме со Сихон, царот хеш­бонски, уништувајќи ги сите градови заедно со мажите, жените и децата;

⁷а целиот добиток и пленот од градовите го разграбавме.

⁸ⓗИ во тоа време ја презедовме од ра­цете на двајцата цареви аморејски земјата од оваа страна на Јордан, од по­токот Арнон па сѐ до планината Ермон;

⁹Сидончаните го викаат Ермон Сирјон, а Аморејците го нарекуваат Се­нир.

¹⁰Сите градови во рамнината, целиот Галаад и целиот Башан до Салеха и Едреи, беа градови од царството на Ог Башански;

¹¹зашто башанскиот цар Ог беше единствен преживеан од Рефаимците. Ете, неговиот мртовечки сандак сѐ уште може да се види во Рава, главен град на Амонците: железен одар — долг девет лакти, а широк четири лакти, машки лакти.

¹²ⓘИ тогаш ја добивме во наследство таа земја, почнувајќи од Ароер, кој е кај потокот Арнон; а половината од планината Галаад со нејзините градови му ја предадов на Рувимовото и на Гадовото племе.

¹³Остатокот, пак, од Галаад и целиот Башан, царството на Ог, му го пре­дадовме на половината од Мана­сиевото племе: целата област Аргов, со цел Башан. Таа земја се нарече Рефаимска.

¹⁴Јаир, Манасиевиот потомок, ја презеде целата област Аргов, дури до пределите Гесуриски, и Маахатски, и ги нарече тие башански места Јаирови се­ла, според своето име, како што се викаат тие и до ден денес.

¹⁵ⓙНа Махир му го дадов Галаад;

¹⁶а на племето Рувимово и Гадово им дадов од Галаад дури до потокот Арнон, земјата меѓу потокот и пределот до по­токот Јавок, граница на Амоновите по­томци;

¹⁷ⓚзападната, пак, граница оди по долината на Јордан, помеѓу Генисарет­ското Езеро и Мртвото Море, до ис­точното подножје на Фазга.

¹⁸Тогаш и ви заповедав, велејќи: „Гос­под, Бог ваш, ви ја даде таа земја во владение; сите способни за војна, от­како ќе се вооружите, појдете пред браќата ваши, синовите на Израел;

¹⁹само жените ваши, децата ваши и добитокот ваш, нека останат во гра­до­вите ваши, што ви ги дадов,

²⁰додека Господ не им даде спокој­ство на вашите браќа, како и вам, и додека тие не ја наследат таа земја, која Господ, Бог ваш, им ја дава од онаа страна на Јордан; тогаш вратете се секој во своето наследство, што ви го дадов.“

²¹ⓛА на Исус му заповедав во она вре­ме, велејќи: „Очите твои видоа сѐ, што Господ, Бог ваш, им направи на тие двај­ца цареви; исто ќе направи Господ и со сите царства, преку кои ќе минуваш.

²²Не плашете се од нив, зашто Гос­под, Бог наш, Сам се бори за нас.“

²³ⓜИ Му се помолив на Господ во она време, велејќи:

²⁴„Господи, Боже, Ти почна да го покажуваш на слугата Свој величието Свое и силата Своја; па има ли некој бог на небото или на земјата, кој би можел да прави такви дела, како Твоите, и со таква моќ, каква што е Твојата?

²⁵Дај ми да минам и да ја видам онаа прекрасна земја преку Јордан, тие убави планински предели и Ливан.“

²⁶ⓝНо Господ ме презре заради вас и не ме послуша, и ми рече Господ: „Доста, во иднина да не ми говориш повеќе за тоа;

²⁷ⓞискачи се на врвот од Фазга и крени ги очите кон морето и кон север, кон југ и кон исток; погледни со очите, зашто нема да го минеш Јордан;

²⁸ⓟдај му совет на Исус, поткрепи го и охрабри го; зашто тој ќе го предводи овој народ и тој ќе им го раздели наследството во таа земја, на која ти ќе погледнеш.“

²⁹ⓠИ останавме во долината спроти Бет-Пеор.