1 Коринтјаните 14:1-40 MKDB2006 - Bible AI

¹ⓨСтремете се кон љубовта; рев­нувај­те за духовните дарови, а осо­бено да пророкувате.

²Зашто оној, кој зборува на друг ја­зик, тој не им зборува на луѓе, туку на Бога; бидејќи никој не го разбира, а со Духот кажува тајни;

³ⓩкој, пак, пророкува, тој им зборува на луѓето за надградување, охрабрува­ње и утешување.

⁴Кој зборува на друг јазик, тој се надградува сам себе; а кој пророкува, тој ја надградува Црквата.

⁵ⓐНо јас би сакал сите вие да зборува­те на други јазици, а уште повеќе да пророкувате: зашто, кој пророкува, е поголем од оној, кој зборува јазици — ос­вен ако и ги толкува, за да се надградува Црквата.

⁶Сега, ако дојдам кај вас, браќа, и ви зборувам на други јазици, каква полза ќе имате од мене, ако не ви соопштувам или со откровение, или со знаење, или со пророштво, или со поука?

⁷И бездушните предмети, како кавалот или гуслата, што даваат глас, ако не даваат разни гласови, како ќе се разбере што свири кавалот или гуслата?

⁸Зашто, ако трубата не дава разбирлив глас, тогаш кој ќе се готви за бит­ка?

⁹Така и вие, ако со јазикот свој не из­говарате разбирливи зборови, како ќе се разбере она што го зборувате? Ќе бидете како оние кои говорат во ветер.

¹⁰Во светот има којзнае колку разни гласови, и ниеден од нив не е без зна­че­ње.

¹¹Ако, пак, не го разбирам значењето на тие гласови, тогаш за оној што збо­рува ќе бидам туѓинец, а и тој за мене туѓинец.

¹²Така и вие, бидејќи сте ревнители за духовни дарови, грижете се да ги до­биете во изобилство, за надградување на Црквата.

¹³ⓑЗатоа, оној што зборува на друг ја­зик, нека се моли за дар да може да го толкува.

¹⁴ⓒЗашто, ако се молам на друг јазик, се моли мојот дух; умот, пак, мој ос­та­нува бесплоден.

¹⁵Па што да се прави? Ќе Му се мо­лам со дух, ќе се молам и со ум; ќе Го воспевам Бога со дух, ќе Му пеам со ум.

¹⁶ⓓЗашто, ако благословуваш со дух, како ќе рече „амин!“ на твоето благода­рење простиот човек, кога не разбира што велиш?

¹⁷Ти благодариш убаво, но другиот не се надградува.

¹⁸Му благодарам на Мојот Бог, зашто зборувам на други јазици повеќе од сите вас;

¹⁹но в црква повеќе сакам да кажам пет зборови разбирливи, за да поучам и други, отколку илјадници зборови на непознат јазик.

²⁰ⓔБраќа, по умот немојте да бидете како деца; за злото бидете како дечиња, а по умот зрели.

²¹ⓕВо Законот е напишано: „На други јазици и со друга уста ќе му зборувам на овој народ, но и така нема да Ме пос­луша, вели Господ.“

²²Затоа јазиците не се знак за оние што поверувале, туку за оние што не поверувале; пророкувањата, пак, не се за оние што не веруваат, туку за оние што веруваат.

²³ⓖАко, пак, целата Црква се собере на едно место и сите почнат да зборуваат на непознати јазици, а дојдат и прости луѓе или безверници, нема ли да речат дека сте полуделе?

²⁴ⓗНо, ако сите пророкуваат, а дојде некој прост човек или безверник, него сите ќе го обвинат и сите ќе го осудат,

²⁵ⓘтака што тајните на срцето ќе му се откријат, и тој, ќе падне на колена, ќе Му се поклони на Бога и ќе рече: „Навистина, Бог е во вас.“

²⁶ⓙПа што, браќа? Кога ќе се собира­те, и секој од вас има — кој псалм, кој поука, кој јазик, кој откровение, кој толкување, — сѐ нека биде за надградување.

²⁷Ако некои зборуваат на непознат јазик, двајца или најмногу тројца, нека зборуваат по ред, а еден да толкува.

²⁸Ако пак, нема толкувач, тогаш в црква да молчат, а нека си зборуваат во себе и на Бога.

²⁹ⓚПророците, пак, да зборуваат двајца или тројца, а другите да расудуваат.

³⁰Но, ако на некој друг што седи му дојде откровение, тогаш првиот нека замолчи.

³¹И така, еден по друг можете сите да пророкувате, та сите да се поучувате и сите да се охрабрувате.

³²ⓛИ пророчките духови им се покоруваат на пророците;

³³ⓜзашто Бог не е Бог на безредие, ту­ку на мирот. Како што е по сите цркви меѓу светиите,

³⁴ⓝжените ваши по црквите да молчат: ним не им е допуштено да зборуваат, туку да се потчинуваат, како што вели и Законот.

³⁵Ако, пак, сакаат да научат нешто, нека ги прашаат мажите свои дома; зашто срамно е жена в црква да зборува.

³⁶Зар од вас излезе словото Божјо? Или, пак, само до вас стигна?

³⁷ⓞАко некој мисли дека е пророк или надарен со дух, нека знае дека ова што ви го пишувам е заповед Господова.

³⁸А кој не разбира, нека не разбира.

³⁹ⓟИ така, браќа, настојувајте да пророкувате, но не забранувајте да се збо­рува и на други јазици.

⁴⁰Сѐ нека биде достојно и уредно.